列王紀上 18章20節 到 18章40節   背景資料  上一筆  下一筆
Chit段經文描述先知以利亞án怎利用獻祭ê方式,hō͘ chiah-ê國王亞哈所供養ê巴力先知kah亞舍拉ê先知,lóng顯露出chiah-ê神明,是假ê神,m̄是真神。

第20節,亞哈果然照先知以利亞ê約定,就kā伊供養ê巴力kah亞舍拉chit兩個神明之先知lóng聚集tī迦密山頂。伊會同意án-ne做,就是beh hō͘先知以利亞知影,伊所供養ê巴力kah亞舍拉神明是真正。伊無認為耶和華上帝chiah是惟一ê真神。為tio̍h án-ne,伊mā召集以色列人民相接tio̍h迦密山頂去觀賞chit件先知世紀大對決ê戲碼。

第21節,chit節ná親像摩西kah約書亞當年對以色列人民所講ê話仝款(參考申命記三十:15、19,約書亞記廿四:14—15),lóng tī說明一件基本ê信仰態度:明確ê選擇。無phú色ê信仰地帶。M̄-koh作者tī chia講以色列人民聽先知以利亞講ê話了後,「一句話mā不講」,這表示in確實是kah亞哈王去拜巴力kah亞舍拉好一段時間了,chiah會對先知以利亞ê話無反應。

第22到24節,先知以利亞真明確地表明,chit-má上帝ê先知只chhun伊ê一個人,巴力kah亞舍拉ê先知加起來就有八百五十個。伊ài kā牛當做獻祭ê方式,看到底耶和華上帝chiah是真正,á是巴力神明是真實ê。M̄-koh chit pái ê獻祭bē-tàng點火,beh hō͘獻祭ê牛pái tī祭壇上,hō͘真正神家己來點火,表示án-ne chiah是真實ê。

火,這teh表示除去雜質ê一種方法。耶穌tī天國譬喻中,時常用「火」來表示末日審判ê方式(參考馬太福音十三:30、42、50,馬可福音九:49,路加福音十六:24)。

第25到26節,先知以利亞先hō͘巴力ê先知kā in ê牛khǹg tī祭壇上,然後開始大聲呼叫巴力,一直求到中晝,ē-sái講是都無任何反應出現。

第27到29節,直到中晝,chiah-ê巴力ê先知既跳koh叫,甚至用刀、短劍phut傷家己流出鮮血,m̄-koh都無得tio̍h巴力任何回應,祭壇iáu-koh lóng無動靜。先知以利亞以諷刺ê話對in講,可能in ê巴力kah亞舍拉神明無聽tio̍h,á是當teh無閒tio̍h,無閒暇。伊用chit種方式刺激chiah-ê假神明ê祭司、先知koh khah賣力tī祭祀禮儀上。M̄-koh直到下晡獻晚祭ê時iáu是仝款無效果。

第30到35節,chit-má tio̍h換先知以利亞獻祭。伊ài民眾khiā到伊ê身邊,然後kā已經荒廢毀壞ê祭壇修築好了後,用十二塊石頭,表示以色列十二支族。然後tī祭壇邊放水,而且吩咐民眾kākhǹg tī祭壇上ê祭物kah木柴lóng灑上水,hō͘祭壇頂ê水流滿祭壇四周ê水溝。這表示tī hiah-ni̍h tâm濕ê祭壇,就算要點燃火種mā非常困難。

第36到37節,先知以利亞行到祭壇前祈禱上帝,請求上帝一定會答應,kā祭壇點to̍h起火,燒掉獻tī祭壇上ê牛,用chit種方式來hō͘已經棄sak上帝遠遠ê以色列人民認出「上主是上帝,hō͘ in 回心轉意」,歸向上帝。

第38到39節,上帝果然垂聽先知以利亞ê祈禱,祂tùi天頂降落大火,m̄-nā燒了獻tī祭壇上ê牛,mā kā祭壇lóng燒了,包括祭壇邊溝渠內面ê水lóng燒乾了,就tī chit時chūn,以色列民眾chiah恍然大悟,講:「上主是上帝;獨獨上主是上帝!」

第40節,先知以利亞就án-ne隨時下令,kā所有巴力kah亞舍拉ê假先知lóng刣死,一個mā不許in逃脫。這mā是為hiah-ê被耶洗碧殺害ê先知報仇。

重新查詢 專卷研經 列王紀上系列
錯誤回報,請聯繫