前一段講上帝用烏鴉送食物hō͘先知以利亞，chit段則講上帝ài先知以利亞去撒勒法一位寡婦ê厝裡，chit-ê寡婦thang供養伊。

第8到9節，上帝ài先知以利亞到西頓附近ê撒勒法去，祂「已經吩咐tòa tī hia ê一個寡婦供養」伊。撒勒法，這是設tī西頓南方大約十三公里ê所在，mā是用來bih起來亞哈追緝ê一個khiā家。Á beh收留伊ê，卻是一個寡婦。

第10到12節，先知以利亞聽從上帝ê話去撒勒法，tú好到à hit-ê城ê城門口，就遇tio̍h了chit-ê寡婦當teh拾木柴。Chit-ê地方顯然iáu有kóa存水，因為án-ne，伊請chit-ê寡婦hō͘伊一kóa水，並hō͘伊一kóa餅，顯然地，chit時飢荒已經嚴重到連先知以利亞lóng餓到一定tio̍h向寡婦ài餅來食。M̄-koh chit-ê寡婦卻講，伊厝裡只chhun「一把麵粉kah一點橄欖油」，伊對先知以利亞講，這是伊用來準備kah伊ê gín-á「最後ê一頓飯了，以後只有等tio̍h餓死」。Chit句話koh khah顯現出飢荒ê嚴重性，必定有真chē人因iau餓來死。

第13到14節，先知以利亞傳出上帝ê應允hō͘ chit位寡婦，ài伊「免擔心」，儘管先去做餅hō͘伊食，並且hō͘ chit位寡婦知影，伊厝裡ê「麵粉用不完，瓶裡ê油mā用不盡」，這真清楚表示上帝會因為為先知以利亞ê緣故，賜福hō͘ in chit-ê寡婦永遠bē缺乏，特別是tī chit極大乾旱ê時刻。

第15到16節，chit兩節講出kui本聖經ê一個重要信息：只要上帝講出ê應允，一定會實現。果然，chit位寡婦厝裡ê麵粉kah油，從來m̄-bat欠缺過，hō͘先知以利亞、chit-ê寡婦，kah伊ê kiáⁿ lóng ē-tàng有「夠額ê食物食」。

Tùi烏鴉送食物到chit位撒勒法ê寡婦厝裡ê麵粉kah油從來m̄-bat欠缺ê神跡，這lóng tī說明一個重要ê信息：上帝忠實ê奴僕，即使tī he siōng困境ê時代內面，mā m̄免擔心，上帝自然會眷顧、帶領。Ná親像以色列人民tī曠野一般，人看做無法度生存ê環境中，上帝用嗎哪養飼，並tùi石磐中出泉水飼in四十年ê時間，hō͘ in ē-tàng安然地進入迦南地。