列王紀上 1章11節 到 1章37節   背景資料  上一筆  下一筆
Chit段經文描述先知拿單án怎策劃反制亞多尼雅chit種排設祭祀禮儀kah筵席ê舉動,mā thang看出先知tī大衛宮廷中扮演重要ê角色。

第11到14節,chia事(tāi)先提起「所羅門ê母親拔示芭」,kah「哈甲ê kiáⁿ亞多尼雅」,chit種用句,已經teh隱喻宮廷ê內鬥,是兩個大衛ê細姨,開始為家己kiáⁿ爭取王位繼承權ê開始。先知拿單對亞多尼雅舉辦獻祭kah排設筵席ê解釋,認為he是一種「立家己做王」ê舉動,已經危害到拔示芭kah所羅門ê性命安全。因為án-ne,伊建議拔示芭去見大衛王,到底大衛beh立甚麼人做王,並且答應當證人,證實亞多尼雅自立為王ê事。

第15到16節,拔示芭chiâⁿ實聽從先知拿單ê建議去見大衛王。

第17到19節,拔示芭提醒大衛bat chiù-chōa beh hō͘伊所生ê kiáⁿ所羅門繼承王位,而chit件「chiù-chōa」ê事,iáu是先知拿單提醒伊去向大衛提起ê。表示用上帝ê名chiù ê chōa言之重要性,是無法度更改。M̄-koh拔示芭向大衛提起,伊bat答應hō͘伊ê kiáⁿ所羅門繼承王位chit件事,聖經並無記載,真可能是大衛私相授受ê事。續落來伊提起亞多尼雅擅自宣佈家己是王,而且有祭司亞比亞他kah元帥約押參與,其實,拔示芭án-ne講,已經teh表明iáu未經過大衛宣佈王位繼承者chìn前,亞多尼雅chit種舉動,等於kah押沙龍家己宣佈為王ê舉止仝款,這mā teh警告大衛tī晚年行動不便ê時,是m̄是會koh一pái tú-tio̍h宮廷篡位ê慘痛經歷。

第20到21節,拔示芭真聰明,伊深知大衛就是殺害伊丈夫烏利亞而奪取伊為細姨,若無保護伊,伊會因chit pái亞多尼雅篡位ê事,kah kiáⁿ所羅門慘遭殺害。

第22到27節,先知拿單照chìn前設計好ê方式,就tī拔示芭進入宮廷面奏大衛關係亞多尼雅篡位ê事ê時,伊tòe後就跟tòe去見大衛,tòe後講亞多尼雅ê舉止,等於是見證了拔示芭所講屬實。拿單聰明ê所在,並m̄是只有講亞多尼雅確實有án-ne做,卻是質問大衛若是允准chit件事,怎樣會無公開宣佈。伊ê意思是hō͘大衛知影,chit件事若趕緊阻止是iáu會赴。Á拿單就是清楚知影大衛犯姦淫罪ê先知,而且約押又koh是大衛心中ê痛。因為án-ne,拔示芭kah先知拿單lóng特別指出約押參與chit pái亞多尼雅ê篡位行動,用chit種方式增加大衛ê無安全感。

第28到31節,大衛隨時用上帝ê名chiù-chōa,beh hō͘所羅門繼承伊ê王位。換句話,chìn前指出大衛已經發過ê誓言並無算數。Á這mā看出晚年ê大衛,神智並m̄是真清楚。

第32到35節,這是大衛王採取積極行動,mā是一種反制亞多尼雅想beh篡位ê計謀,這可能kah押沙龍帶hō͘伊ê傷害經歷有關。大衛ài伊忠心ê部屬,包括先知拿單、祭司撒督、耶何耶大,以及軍事第二號將領比拿雅等人, ài所羅門騎上大衛ê驢á,這真有象徵性ê意義,表示所羅門有繼承王位ê資格,然後ài先知拿單kah祭司撒督膏立所羅門為以色列kah猶大ê王。膏立ê地點為甚麼選tī基訓水泉邊,並無清楚,有可能是為tio̍h beh先行潔淨禮,然後chiah舉行膏立ê儀式。M̄-koh重要ê,是當完成chiah-ê禮儀了後,tńg來到耶路撒冷王宮,hō͘所羅門坐tī王座上,án-ne chiah表示所羅門已經繼任為王。第35節講所羅門是beh當「以色列kah猶大ê統治者」,這是因為第一任ê國王掃羅出tī北部便雅憫支族,而大衛則出tī南部猶大ê支族,因為án-ne,南北兩大族群一直lóng心存芥蒂。

Tio̍h注意在第34、39節,lóng講大衛ài祭司撒督kah先知拿單去膏立所羅門為王,卻m̄是上帝親自對先知á是祭司ê啟示,卻是出tī大衛ê指令。這kah大衛、掃羅lóng是上帝向先知撒母耳啟示揀選、膏立出來ê,完全無仝。Mā tùi chia開始,以色列人民以後ê國王lóng是世襲,而非上帝向先知啟示而膏立ê。這tī信仰上ê意義非常無仝款。

第36到37節,比拿雅聽tio̍h大衛án-ne宣告了後,就表示全力支持所羅門繼承王位。這真清楚說明大衛身邊ê禁衛軍擁護所羅門為王。

重新查詢 專卷研經 列王紀上系列
錯誤回報,請聯繫