哥林多前書 7章17節 到 7章24節   背景資料  上一筆  下一筆
Chit段經文講tio̍h有關受呼召成做基督徒ê意義,m̄是在tī是m̄是有受割禮,á是有甚麼社會地位kah身分背景。使徒保羅Tī chit段經文中強調:「每一個人應該保持蒙召ê時ê身分。」並無表示絕對bē-tàng改變,卻是beh先kā蒙召ê時ê基督徒身分hō͘顯明出來,真自然tek,會有機會改變現況。因為信仰本身就是一個極大ê氣力,ē-tàng改變處境。

Chit段經文ê中心信息是非常強烈ê,因為使徒保羅清楚指出一個超出當時社會ê觀念:tī上帝面前,每一個人lóng仝款,無貴賤之別,因為大家lóng是上帝用重價買來ê,lóng是屬tī「基督ê奴隸」。Chit種觀念tī哥林多城是真大ê挑戰,因為連教會內面lóng有分門別派ê時chūn,其所在表明ê意義就是「貴、賤」ê區別,m̄-koh,使徒保羅將「主人、奴隸」ê觀念帶入信仰ê層面,hō͘所有ê信徒lóng tńg來到上帝面前,án-ne,大家lóng同是有罪ê人,mā lóng是耶穌用性命ê代價贖回來ê。

第17節,chit節ē-sái講是chit段經文ê中心思想:每一個人蒙召,lóng有上帝特別ê旨意在其中。

第18到20節,chit三節提起一個蒙上帝呼召成做基督信徒,kah chit-ê人是m̄是有受割禮lóng無關係,mā無需要改變。使徒保羅teh寫hō͘加拉太教會ê書信中mā án-ne強調,割禮á無,kah一個人是m̄是得救lóng無關係,重要ê,是活出新ê性命來,án-ne chiah是siōng重要ê事(參考加拉太書六:15)。

第21到22節,使徒保羅進一步強調:一個做奴隸ê人,會因為受呼召成做基督徒,雖然伊iáu是繼續奴隸ê身分,m̄-koh,伊ê心靈是得tio̍h tháu放ê,是自由ê。M̄-koh只要有機會,就beh hō͘家己tùi主人手中得tio̍h自由。

第23到24節,chia所謂「上帝用重價買來ê」,是teh指耶穌tī十字架上ê犧牲換來得ê。是真珍貴而且值得保留ê身分。Ná親像一個當主人ê人(相對tī奴隸,就是自由人),則知影家己成做基督徒,並m̄是用家己ê能力換來得tio̍h,卻是上帝透過耶穌用重大ê代價贖回有ê,所以tio̍h kā家己看做是福音ê奴僕,這是一種身分ê認bat,mā是對家己信耶穌後性命價值ê改變。

重新查詢 專卷研經 哥林多前書系列
錯誤回報,請聯繫