歷代志上 2章1節 到 2章8節   背景資料  上一筆  下一筆
Tùi第二章開始直到第九章,小khóa注意一看就koh khah明顯了,主要lóng是用猶大kiáⁿ孫所產生ê大衛家族為主軸所留落來ê族譜。

Chit份族譜主要就是tùi雅各講tio̍h法勒斯ê希斯崙,然後beh tùi希斯崙ê kiáⁿ蘭續接到耶西,準備接落去紹介耶西ê kiáⁿ大衛。

第1到2節,這是雅各ê kiáⁿ名單,thang參考創世記第三十五23到26節。

第3到4節,這是猶大ê五個kiáⁿ。頭前三個是猶大kah bó͘「巴書亞」,tī創世記第三十八章2節是用「書亞ê cha-bó͘-kiáⁿ」。Chit-ê bó͘為伊生珥、俄南、示拉等。Chia講「珥非常邪惡」,chit句話mā是引用創世記第三十八章7節。M̄-koh聖經作者並無說明伊做甚麼邪惡ê事。Koh講,創世記第三十八章記載ê,m̄-nā是「珥非常邪惡」而已,連「俄南」mā是仝款,無願意盡兄弟ê責任,而且有貪婪ê心,結果mā受tio̍h上帝ê責罰死去。另外有兩個kiáⁿ叫法勒斯kah謝拉,in lóng是因為猶大kah新婦她瑪teh亂倫之下生落來ê kiáⁿ。

第5到8節,chit段經文是記載有關法勒斯kah謝拉ê下一代。Tī第7節特別提起有關「亞干」ê事件,thang參考約書亞記第七章18到26節ê記載,事件是發生tī約書亞chhōa以色列人民攻打耶利哥城ê時chūn。亞干因為貪心,致使上帝受氣。結果造成以色列人民tī攻打艾城ê時chūn慘敗,chit件事後來被發見是因為亞干私藏戰利品引起ê結果,因為án-ne,約書亞kā伊判處死刑,民眾用石頭kā伊kah伊ê全家phah死,並且用火燒毀伊所有ê物件。

重新查詢 專卷研經 歷代志上系列
錯誤回報,請聯繫