Tùi山頂變形像了後,耶穌就開始帶領門徒kah跟隨者朝向耶路撒冷前進。chit-má已經來到「猶太地區」à。
第2節,法利賽人koh開始teh想怎樣害耶穌,in提出關係摩西律法是m̄是「允准休棄bó͘」。
第3到4節,耶穌無直接回答,卻是ài in先講摩西律法怎樣記載。In回答是摩西律法允准in只要寫休書hō͘ bó͘就ē-tàngà。這是in對申命記第廿四章1節ê解釋。
M̄-koh耶穌認為這是因為in「心腸siuⁿ硬」ê緣故(第5節)。Mā就是講,耶穌認為摩西會án-ne做,是看tio̍h in不聽上帝,只好用chit種方式作規範。
第6到9節,耶穌採用創世記第一章27節,上帝tī太初創造人ê時,有男有女。這講法表示男kah女是仝款地位。續落來耶穌用創世記第二章24節講tio̍h人tio̍h離開父母,kah bó͘結合。表示婚姻ê事,m̄是用cha-po͘人做中心,卻是男女地位仝款,因為這是「一體」ê性命。第9節耶穌強調婚姻是kah性命相關連,因為án-ne,只要是性命ê事,就kah上帝有關係。
第10節,門徒koh一pái問kah chit件事,表示門徒感覺giâu疑。
第11到12節,無論是cha-po͘人á是cha-bó͘人,只要是離婚了後koh再去kah別人結婚,he是屬tī「犯姦淫」之罪。換句話講,耶穌強調既然be̍h離婚,就mài koh再結婚。
|