使徒行传 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
7 司提反ê答辩
大祭司to̍h讲：「Chiahê tāichì kám是ánne？」
2 司提反讲：「各位父老兄弟，请听，咱ê祖先亚伯拉罕iáu未徙去哈兰以前，iáu tòa tī米所波大米ê时，荣光ê上帝对伊显现，
3 kā伊讲：『离开你ê故乡kah亲族，去我beh kā你指示ê所在。』(注：创12：1)
4 亚伯拉罕to̍h离开迦勒底人ê所在，去tòa tī哈兰。伊ê老父死了后，上帝hō͘伊tùi hia徙到lín chitmá teh tòa ê所在。
5 Tī chia，上帝并无hō͘伊产业，连khiā脚ê所在都无。虽然hit时伊iáu未有kiáⁿ，上帝应允beh赐hō͘伊chitê土地，thang做伊kah kiáⁿ孙ê产业。
6 上帝有ánne kā伊讲：『你ê kiáⁿ孙ē出外去tī外国，做人ê奴隶受pháiⁿ款待四百年。』(注：创15：13)
7 上帝koh讲：『我beh审判hitê hō͘ in做奴隶ê国家。后来，我ē hō͘ in出来，tī chitê所在敬拜我。』(注：创15：14)
8 然后上帝kah伊立约，用割礼做记号。因为ánne，伊生以撒了后第八日，to̍h kā伊行割礼。后来，以撒生雅各，雅各生咱十二个族长。
9 「Chiahê族长怨妒约瑟，kā伊卖去埃及；m̄ koh，上帝kah伊同在，
10 救伊脱离一切ê苦难，hō͘伊tī埃及王法老ê面前得tio̍h恩典kah智慧，hō͘法老kā伊设立做埃及ê宰相kah王宫ê总管。
11 后来，埃及kah迦南全地发生饥荒，引起大灾难；咱ê祖先无米粮thang食。
12 雅各听讲埃及有粮食，to̍h差咱ê祖先去hia。这是头一pái。
13 第二pái koh去ê时，约瑟hō͘兄弟认出伊ê身分；因为ánne，法老bat约瑟ê家族。
14 约瑟差人去请伊ê老父雅各kah全家族，总共七十五人去埃及。
15 雅各to̍h落去埃及，后来，伊kah咱ê祖先lóng死tī hia。
16 In ê尸体后来，运tńg来示剑，埋葬tī亚伯拉罕用钱tùi 哈抹ê kiáⁿ孙买来ê hit块墓地。
17 上帝对亚伯拉罕应允ê hitê期ná近，以色列人tī埃及生湠ná兴旺。
18 后来，另外一个m̄ bat约瑟ê王起来统治埃及。(注：出1：8)
19 伊用诡计来对付咱ê民族，虐待咱ê祖先，命令in tio̍h kā in ê婴á tàn tòa外面，hō͘ in死。
20 Hit时，摩西tú出世，是一个非常清秀ê婴á，tī老父ê厝养饲三个月。
21 伊受弃sak ê时，法老ê chabó͘ kiáⁿ kā伊拾去当做kakī ê kiáⁿ养饲。
22 摩西学习埃及人所有ê学问，讲话kah做tāichì lóng有才能。
23 「摩西四十岁ê时，想beh去看kakī ê兄弟—以色列ê同胞。
24 伊看tio̍h一个兄弟hō͘埃及人欺负，to̍h kā伊保护，phah死hitê埃及人，替受委屈ê人报仇。
25 伊想讲kakī ê兄弟ē了解这是上帝用伊ê手来救in；m̄ koh，in无了解。
26 隔tńg工，伊看tio̍h两 个以色列人teh相phah，想beh kā in调解，讲：「Lín是兄弟，ná ē teh互相伤害？」
27 Hitê teh欺负ê人kā摩西sak开，讲：「啥人设立你做阮ê头人，做阮ê判官？
28 你ài beh亲像昨hngthâi死hitê埃及人ánne，来kā我thâi死，是无？」(注：出2：14)
29 摩西一下听tio̍h chit句话to̍h逃走，去tòa米甸人ê所在，tī hia生两 个kiáⁿ。
30 「四十年后，tī西奈山ê旷野，有天使tī刺phè ê火焰中，对摩西显现。
31 摩西看tio̍h chitê景象，感觉真稀奇，行óa去想beh看khah详细ê时，to̍h听tio̍h主ê声讲：
32 『我是lín祖先ê上帝，to̍h是亚伯拉罕、以撒、雅各ê上帝。』(注：出3：6)摩西惊kah phi̍h-phi̍h chhoah，m̄敢看。
33 主kā伊讲：『你ê鞋tio̍h thǹg起来，因为你khiā ê所在是圣地。
34 我确实有看tio̍h我ê子民tī埃及teh受苦，mā有听tio̍h in teh叫苦ê声。我降临来beh kā in拯救。Taⁿ你来，我beh差你去埃及。』(注：出3：5，7)
35 「Chitê摩西to̍h是以色列人bat kā伊拒绝，问伊讲：『啥人设立你做阮ê头人，做阮ê判官？』ê hit位，上帝却通过tī刺phè中对伊显现ê天使，差派伊做领袖，做拯救者。
36 摩西chhōa in出埃及，tòa tī埃及、红海kah旷野四十年，行真chē奇事神迹。
37 Chitê摩西bat对以色列ê kiáⁿ孙讲：『上帝beh tùi lín兄弟中间，为lín兴起一个亲像我chit款ê先知。』(注：申18：15)
38 摩西mā bat kah tī西奈山对伊讲话ê天使以及咱ê祖先，tī旷野做伙见面，伊mā有得tio̍h活活ê信息来传hō͘咱。
39 咱ê祖先m̄肯听伊ê话，颠倒kā伊拒绝，想beh倒tńg去埃及。
40 In kā亚伦讲：『你tio̍h kā阮造神明来做头chhōa阮，因为chitê chhōa阮出埃及ê摩西m̄知tú tio̍h啥物tāichì。』(注：出32：1)
41 Hit时，in to̍h造牛á-kiáⁿ ê像，对hitê偶像献祭，欢喜in kakī ê手所做ê偶像。
42 上帝oa̍t头无ài chhap，chhut-chāi in去敬拜天象。Tú亲像先知ê册所记载：以色列ê子民，lín tī旷野四十年，kám bat献牲礼á是祭物hō͘我？
43 Lín扛摩洛 ê布棚， kah Lāi-hán神ê星， to̍h是lín造来拜ê偶像； 我 beh kā lín迁徙去巴比伦hit-pêng！(注：摩 5：25-27)
44 「咱祖先tī旷野有thang做见证ê会幕，to̍h是上帝对摩西ê指示，照伊所看tio̍h ê款式来起造ê。
45 后来，咱ê祖先既然承接chitê ē幕，上帝to̍h tùi in ê面前kā外族赶走。In占领hitê土地了后，to̍h kah约书亚kā会幕徙去hia，一直到大卫ê时代。
46 大卫有得tio̍h上帝ê恩典，求上帝允准in kā雅各ê上帝chhōe一个tòa ê所在。
47 M̄ koh，后来，为上帝起圣殿ê是所罗门。
48 「其实至koân上帝并无tòa tī人ê手所起ê厝，亲像先知所讲：
49 』主讲：天是我ê宝座， 地是我ê脚踏。 Lín beh kā我起啥物款ê厝？ 我安息ê所在tī tó位？
50 这一切kám m̄是我亲手创造ê？」(注：赛66：1-2)
51 「Lín ná ē chiahni̍h固执！Lín ê心硬，耳孔m̄听话，kah lín ê祖先仝款，tiāⁿ-tiāⁿ 悖逆圣神！
52 Tó一个先知无受tio̍h lín祖先ê迫害？预言hitê公义ê奴仆teh beh来临ê人，lóng hō͘ lín害死。Taⁿ lín成做出卖kohthâi死chitê奴仆ê人。
53 Lín是tùi天使领受上帝ê律法，竟然无teh遵守！」
54 司提反Hông Tìm死
In听tio̍h司提反chiahê话，心内非常受气，对伊咬牙切齿。
55 独独司提反hō͘圣神充满，gia̍h头看天，看tio̍h上帝ê荣光，mā看tio̍h耶稣khiā tī上帝ê正pêng。
56 伊讲：「你看！我看tio̍h天开，人子khiā tī上帝ê正pêng！」
57 众人耳孔掩teh，大声hoah，做一个chhi̍h óa去，
58 kā司提反赶出去城外，用石头kā伊tìm。做见证ê人kā in ê外衫交hō͘一个名叫做扫罗ê少年人去顾。
59 In用石头tìm司提反ê时，司提反祈求讲：「主耶稣ah，求祢接纳我ê灵魂！」
60 伊跪落去，大声叫，讲：「主ah，m̄ thang用chitê罪归hō͘ in！」伊讲soah to̍h死去。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。