约翰福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权) 客语 现代客语 福州话 粤语和合本 希腊文(WH-NT) 下载档案 关于语音圣经
4 耶稣kah撒马利亚ê妇人人
法利赛派ê人听tio̍h耶稣比约翰招tio̍h khah chē门徒,mā kā khah chē人洗礼。
2 其实耶稣kakī 无kā人洗礼,是他ê门徒kā人洗礼。
3 耶稣听tio̍h chitê tāichìto̍h离开偤太,koh tńg去加利利省。
4 他tio̍h经过撒马利亚。
5 耶稣来到撒马利亚一个叫做叙加ê城,chitê城óa近雅各hō͘伊ê kiáⁿ约瑟ê hit块地;tī hia有雅各ê水井。
6 耶稣行路行kah真倦,to̍h坐tī井边;hit时差不多是中昼。
7 有一个撒马利亚ê妇人人来chhiūⁿ水,耶稣kā她讲:「水分我lim一下。」
8 Hit时,他ê门徒已经入去城内买食物。
9 撒马利亚ê妇人人kā他讲:「祢是偤太人,ná ē对我—撒马利亚ê妇人人讨水lim?」Hit当时,偤太人kah撒玛利亚人无往来。
10 耶稣应讲:「你若知上帝hō͘人ê恩赐,koh知对你讲『水分我lim一下』ê是啥人,你一定ē kā他求,他ē kā活水hō͘你。」
11 妇人人讲:「先生,祢无chhiūⁿ水ê器具,井koh深,祢beh tùi tó位得tio̍h活水?
12 阮ê祖先雅各留chit口井hō͘阮,伊kakī kah kiáⁿ孙以及chengseⁿ,lóng lim chit口井ê水。祢kám ē比雅各khah伟大?」
13 耶稣应讲:「Lim chit口井水ê人lóng ēkoh嘴干,
14 独独lim我所beh hō͘伊lim ê水ê人,永远bē koh嘴干。因为我所beh hō͘伊lim ê水,tī伊ê内面会成做水泉,一直chhèng起来,hō͘伊得tio̍h永远ê活命。」
15 妇人人讲:「先生,请hō͘我chitê水,我chiah bē koh嘴干,mā免koh来chiah远chhiūⁿ水。」
16 耶稣kā她讲:「去叫lín翁来chia。」
17 妇人人应讲:「我无翁。」耶稣kā她讲:「你讲无翁,无m̄ tio̍h。
18 你bat有五个翁,taⁿ kah你同居ê m̄是你ê翁;你ánne讲无m̄ tio̍h。」
19 妇人人kā他讲:「先生,我看祢是先知。
20 阮祖先tī chitê山敬拜,m̄ koh,lín讲耶路撒冷chiah是敬拜ê所在。」
21 耶稣kā她讲:「妇人人,tio̍h信我,时beh到à。Hit时,lín bē tī chitê山,mā bē tī耶路撒冷敬拜天父。
22 Lín m̄知lín teh敬拜啥物,阮知阮teh敬拜啥物,因为拯救是对偤太人出来ê。
23 M̄ koh,时teh beh到,现今to̍h是。真正敬拜ê人,ē用心神kah真诚来敬拜天父,因为天父ài chit款人敬拜他。
24 上帝是神,敬拜他ê人tio̍h用心神kah真诚来敬拜。」
25 妇人人kā他讲:「我知基督teh beh来临。他若到,ē kā一切ê tāichì kā阮讲。」
26 耶稣kā她讲:「Chit-má teh kah你讲话ê to̍h是。」
27 Hit时,耶稣ê门徒tńg来,in看tio̍h耶稣kah妇人人teh讲话,感觉奇怪,独独无人问妇人人讲:「你beh创啥物?」á是问耶稣讲:「祢ná ē kah妇人人讲话?」
28 妇人人to̍h kā水瓶放hē ・leh,入去城内kā人讲:
29 「Lín来看,chitê人kā我过去ê tāichì lóng kā我讲。Chitê人kám to̍h是基督?」
30 Into̍h出城beh去看耶稣。
31 Hit时,门徒kā耶稣讲:「老师,来食。」
32 M̄ koh,耶稣应讲:「我有lín所m̄知ê食物thang食。」
33 门徒to̍h问来问去,讲:「Kám有人hō͘他食物?」
34 耶稣kā in讲:「遵照差派我来ê hit位ê旨意,koh完成他ê工作,to̍h是我ê食物。
35 Lín kám无ánne讲:『Koh四月日to̍h有thang收成ā』?我kā lín讲,lín看四面ê田园,五谷已经熟,thang收成ā。
36 收成ê人已经teh领工钱,koh为tio̍h永远ê活命teh积聚五谷,hō͘掖种ê人kah收割ê人做伙欢喜。
37 因为俗语讲:『一个掖种,另外一个收成』,实在讲了真tio̍h。
38 Lín无劳苦耕作ê田园,我差 lín去收成;lín享受别人劳苦耕作ê成果。」
39 Hitê城有真chē撒玛利亚人信耶稣,因为hitê妇人人见证讲:「Chitê人kā我过去ê tāichì lóng kā我讲。」
40 所以,撒玛利亚人来见耶稣,求他kah in tòa,他to̍h tī hia tòa两日。
41 因为听tio̍h耶稣ê道理,来信ê人koh khah chē。
42 Hiahê人kā妇人人讲:「阮taⁿ m̄是tùi你ê话来信,是因为阮亲身听tio̍h耶稣ê道理,阮知他真正是世间ê救主。」
43 耶稣医好官员ê Kiáⁿ
(太8:5-13;路7:1-10)
两日后,耶稣离开hia去加利利省。
44 因为耶稣kakī bat讲:「先知tī kakī ê故乡bē受尊重。」
45 耶稣来到加利利省ê时,加利利人kā他欢迎,因为chiahê人去耶路撒冷过Pôaⁿ过节ê时,mā有看tio̍h他tī节期中一切所做ê tāichì。
46 耶稣koh来到加利利省ê迦拿,to̍h是他kā水变做酒ê所在,tī hia有一个迦百农官员ê kiáⁿ破病。
47 伊听见耶稣tùi偤太省来到加利利省,to̍h去求他落去迦百农医治伊ê kiáⁿ,因为伊ê kiáⁿ teh beh死à。
48 耶稣kā伊讲:「Lín若无看tio̍h神迹奇事,一定m̄信。」
49 Hitê官员应讲:「先生,趁我ê细kiáⁿ iáu未死,紧来去。」
50 耶稣kā伊讲:「你tńg去,你ê kiáⁿ bē死。」Hitê人相信耶稣kā伊讲ê话,to̍h tńg去。
51 伊tī路中tú tio̍h伊ê奴仆,奴仆kā伊讲伊ê kiáⁿ活起来à。
52 伊to̍h问in伊ê kiáⁿ是tang时chiah好起来,in应讲:「昨昏下晡一点,热就退。」
53 老父知影hit时tútú是耶稣讲:「你ê kiáⁿ bē死。」ê时。伊kakī kah全家ê人to̍h lóng信耶稣。
54 这是耶稣tùi偤太省来到加利利省以后,所行ê第二pái神迹。
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。