以西结书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
10 上主ê荣耀离开圣殿
我观看,看tio̍h ki-lō͘-peng头壳顶kah穹苍ê中间,有亲像蓝色ê宝石,亲像宝座ê形像ê款式。
2 上帝对hitê穿幼苎衫ê人讲:「你入去,tī tńg-se̍h ê轮ê中间,ki-lō͘-peng以下,tùi ki-lō͘-peng ê中间the̍h teh to̍h ê火炭满两手,掖tī城顶。」我to̍h亲目看tio̍h hitê人入去。
3 伊入去ê时,ki-lō͘-peng khiā tī殿ê正pêng,云充满内院。
4 上主ê荣光tùi ki-lō͘-peng hia上去,停tī殿ê户碇ê顶面;殿有云满满,hitê院mā hō͘上主荣光ê灿烂充满。
5 Ki-lō͘-peng ê翼ê声传到外院,亲像全能上帝teh讲话ê声。
6 上主吩咐hitê穿幼苎衫ê人讲:「Tio̍h tùi tńg-se̍h ê轮ê中间kah ki-lō͘-peng ê中间取火。」Hit时,伊to̍h入去,khiā tī一个轮ê边á。
7 有一个ki-lō͘-peng伸出伊ê手,伸到ki-lō͘-peng中间ê火,the̍h kóa起来,hē tī穿幼苎衫ê人ê两支手;hitê人kā它the̍h来,to̍h出去。
8 Tī ki-lō͘-peng ê翼下,有显出人ê手ê款式。
9 我koh观看,看tio̍h ki-lō͘-peng ê边á ê四个轮;chitê ki-lō͘-peng ê边á有一个轮,hitê ki-lō͘-peng ê边á mā有一个轮;轮ê款式亲像黄玉ê色致。
10 讲tio̍h in ê款式,四个lóng仝一样ê形状,亲像轮中有轮。
11 行ê时,四面lóng ē行得,行ê时m̄免oa̍t。头ǹg啥物所在,in to̍htoe3它行,行ê时m̄免oa̍t。
12 In全身躯,in ê尻脊骿,in ê手,in ê翼kah轮,四箍围lóng有目chiu 满满;to̍h是in四个所有ê轮。
13 讲tio̍h chiahê轮,我耳孔中有听tio̍h讲「Tńg-se̍h」 ê。
14 Tāk-ê有四个面,头一个面是ki-lō͘-peng ê面,第二个面是人ê面,第三个面是狮ê面,第四个面是鹰ê面。
15 Ki-lō͘-peng lóng上去;这是我tī迦巴鲁河边所bat看tio̍h ê活物。
16 Ki-lō͘-peng行,轮mā tī边á teh行;ki-lō͘-peng thí开翼tùi地chiūⁿ去,轮mā无oa̍t-tńg身离开in ê身边。
17 Hiahê停,chiahê mā停;hiahê上去,chiahê mā做伙上去;因为活物ê神灵tī in ê内面。
18 上主ê荣光tùi殿ê户碇顶出去,停tī ki-lō͘-peng ê顶面。
19 Ki-lō͘-peng出去ê时就thí开翼,tī我ê目chiu 前tùi土脚上去,轮mā tī in ê身边,停tī上主ê殿东门ê门口。Tī in ê顶面,有以色列上帝ê荣光。
20 这是我早前tī迦巴鲁河边所看tio̍h以色列上帝下面ê活物,我知in是ki-lō͘-peng。
21 Ta̍k个有四个面,ta̍k个有四个翼;in ê翼下有人ê手ê形像。
22 讲tio̍h in ê面ê形像,to̍h是我早前tī迦巴鲁河边所看tio̍h ê面;in ê款式,in ê身躯,lóng是ánne,lóng ta̍k个直直行去。
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。