创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
42 约瑟ê兄弟到埃及买粮食
雅各看tio̍h埃及有五谷，to̍h kā伊hiahê kiáⁿ讲：「Lín án怎teh相看？」
2 Koh讲：「我听tio̍h埃及有五谷，lín thang落去hia，为咱籴淡薄，hō͘咱thang度生活，免死。」
3 就ánne，约瑟十个阿兄lóng落去埃及，去籴米粮。
4 总是，约瑟ê小弟便雅悯，雅各无差伊kah in阿兄做伙去，因为伊讲：「恐惊伊ētú tio̍h伤害。」
5 来籴米粮ê人中间，以色列hiahê kiáⁿ mā有来，因为迦南地mā有饥荒。
6 当时治理埃及地ê是约瑟，粜米粮hō͘ hit所在ê众人ê mā是伊。约瑟hiahê阿兄来，仆落地kā伊拜。
7 约瑟看tio̍h伊hiahê阿兄，会认得；伊假做生份人，对in讲严厉ê话，问in讲：「Lín tùi tó位来？」In讲：「Tùi迦南地来籴米粮。」
8 约瑟会认得in阿兄，m̄ koh，in bē认得伊。
9 约瑟ē记得以前所梦见关系in ê hiahê梦，to̍h对in讲：「Lín是侦探，beh来探听chit所在ê虚实。」
10 In对伊讲：「阮ê主，m̄是，你ê奴仆来beh籴米粮。
11 阮lóng是一个人ê kiáⁿ，阮是老实人，你ê奴仆m̄是侦探。」
12 约瑟kā in讲：「M̄是ánne。Lín来是beh探听chit所在ê虚实。」
13 In讲：「你ê奴仆十二个兄弟，是迦南地一个人ê kiáⁿ；siōng细汉ê，现今tī阮老父hia，有一个已经死去à。」
14 约瑟kā in讲：「我tú-á讲lín是侦探，chitê话实在无m̄ tio̍h。
15 我kí法老ê性命来chiùchōa，若lín soah尾ê小弟无来到chia，lín bē tàng出chit所在；我beh用ánne来试验lín ê虚实。
16 Lín Tio̍h差lín中间一个人去chhōa lín ê小弟来。Lín chiahê lóng tio̍h关tī chia，thang证明lín ê话，看lín有诚实á无；若无，我kí法老ê性命来chiùchōa，lín一定是侦探。」
17 就ánne，约瑟kā in lóng关tī监里三工。
18 到第三日，约瑟对in讲：「我敬畏上帝，lín tio̍h照我ê话去行，to̍h ē活。
19 Lín若果然是老实人，lín兄弟中tio̍h留一个缚tī监内，总是，lín thang带米粮tńg去，thang救lín厝内ê饥荒。
20 Kā lín soah尾小弟chhōa来我chia，ánne lín ê话to̍h有凭据，lín mā m̄免死。」In就照ánne去行。
21 In做伙讲：「咱对咱ê小弟实在有罪。伊哀求咱ê时，咱有看tio̍h伊心内ê艰苦，mā m̄肯听伊ê话；所以，chit场苦难chiah ē临到咱。」
22 流便应in讲：「我kám m̄是有对lín讲，m̄ thang害hitê gín-á来取罪？M̄ koh，lín m̄听。所以，流伊ê血ê罪，chitmá teh对咱chiahê讨。」
23 In m̄知约瑟听有in teh讲啥，因为tī in中间有用翻译官。
24 约瑟oa̍t-tńg身流目屎，koh oa̍t tńg来kah in讲话。to̍h tī in中间取西缅出来，tī in ê面前kā伊缚teh。
25 约瑟ê众兄哥倒Τńg去迦南
约瑟吩咐人kā五谷入tī in ê器具到满满，mā kā in ta̍k人ê银hē tī in ê布袋内，来还in，koh准备路里ê食物hō͘ in，人to̍h照ánne来kā in准备。
26 Into̍h kā五谷hō͘ in ê驴á载，to̍h离开hia去。
27 到歇暝ê所在，in中间有一个人tháu开伊ê布袋，beh the̍h hō͘驴食，chiah看tio̍h伊ê银犹原tī ・leh，hē tī布袋口。
28 伊to̍hka7伊ê兄弟讲：「我ê银还倒tńg来à！你看，犹原tī我ê布袋内。」In就惊kah心脏强beh定去，phi̍h-phi̍h chhoah，做伙讲：「上帝ánne款待咱，是啥物意思？」
29 In tńg到迦南地，到in老父雅各hia，kā所tú ・tio̍h ê tāichì lóng kā伊讲：
30 「Hitê人，to̍h是hit所在ê主，对阮讲真严厉ê话，kā阮掠做是hit所在ê侦探。
31 阮kā伊讲：『阮是老实人，阮m̄是侦探。
32 阮是十二个兄弟，是阮老父ê kiáⁿ；有一个死去，siōng细汉ê现今kah阮老父tī迦南地。』
33 Hitê人，to̍h是hit所在ê主，kā阮讲：『若ài hō͘我知lín是老实人，lín兄弟中tio̍h留一个tī我chia，lín chiahê thang带五谷tńg去，救lín厝内ê饥荒。
34 Chhōa lín soah尾ê小弟来我chia，我to̍h知lín m̄是侦探，是老实人；ánne我to̍hē kā lín ê兄弟交hō͘ lín，lín mā thang tī chit所在买卖。』」
35 后来，in piàⁿ in ê布袋，想bē到in ta̍k人ê银包lóng tī in ê布袋内；in kah in老父看tio̍h银包to̍h lóng起惊惶。
36 In ê老父雅各kā in讲：「Lín hō͘我失落我ê kiáⁿ。约瑟死去，西缅mā死去，taⁿ lín koh beh chhōa便雅悯去。Chiahê tāichì lóng是害tio̍h我。」
37 流便kā伊ê老父讲：「我若无chhōa伊tńg来交你，你thangthâi我两 个kiáⁿ；做你thang kā伊交带我，我一定chhōa伊tńg来交你。」
38 雅各讲：「我ê kiáⁿ我无beh hō͘伊kah lín去，伊ê阿兄已经死去，只有chhun伊；伊若tī lín所行ê路里tú tio̍h陷害，he就是lín hō͘我白头毛凄惨落阴府。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。