以西结书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
14 Siōng-chú Chek-pī Pài Ngó͘-siōng
Ū kúi-nā-ê I-su-la-el ê tiúⁿ-ló lâi góa chia, chē tī góa ê bīn-chêng.
2 Siōng-chú ê ōe chiū lîm-kàu góa, kóng,
3 " Jîn-chú, chiahê lâng í-keng kā in ê ngó͘-siōng chiap-la̍p tī in ê sim, koh hē ē tì-sú hoān chōe ê chó͘-gāi tī kakī ê bīn-chêng. Góa kám ē hō͘ i mn̄g siáⁿ-mi̍h?
4 " Só͘-í, lí tio̍h tùi in kóng, ' Chì-koân Siōng-chú ánne kóng: I-su-la-el ê chú-bîn tiong-kan, kiàn-nā chiap-la̍p i ê ngó͘-siōng tī i ê sim-lāi ê lâng, koh hē ē tì-sú hoān chōe chó͘-gāi tī i kakī ê bīn-chêng, koh lâi kìⁿ sian-ti ê, Góa — Siōng-chú tī i só͘ kiû ê tāichì, beh chiàu i ê chē-chē ngó͘-siōng lâi ìn-tap i,
5 tì-sú Góa thang hō͘ I-su-la-el ê chú-bîn sim-lāi kakī chek-pī, in-ūi in lóng ūi tio̍h in ê ngó͘-siōng lâi kah Góa so͘-oán. '
6 " Só͘-í, lí tio̍h kā I-su-la-el ê chú-bîn kóng: Chì-koân Siōng-chú ánne kóng, ' Tio̍h hôe-thâu, oa̍t tńg-lâi lī-khui lín ê ngó͘-siōng, oa̍t-tńg bīn, m̄ thang chun-thàn lín it-chhè khó-ò͘ⁿ ê tāichì. '
7 In-ūi I-su-la-el ê chú-bîn á-.sī tī I-su-la-el tiong kià-kha ê chhut-gōa lâng, kiàn-nā kah Góa keh-tn̄g, chiap-la̍p i ê ngó͘-siōng tī i ê sim-lāi, koh hē ē tì-sú hoān chōe ê chó͘-gāi tī i kakī ê bīn-chêng, koh lâi kìⁿ sian-ti, siūⁿ beh ūi kakī ê tāichì lâi mn̄g Góa ê, Góa — Siōng-chú beh chhin-sin kā i ìn-tap.
8 Góa beh tùi hit khoán lâng pìⁿ-bīn, hō͘ i chò lâng ê kàm-kài, hō͘ lâng chò ōe-pèⁿ, hō͘ lâng tio̍h-kiaⁿ kah gāng-.khì, Góa mā beh tùi Góa ê chú-bîn tiong kā i chián-tû. Lín chiū ē chai Góa sī Siōng-chú.
9 " Sian-ti nā bê-he̍k lâi kóng chi̍t kù ōe, to̍h-sī Góa — Siōng-chú bê-he̍k hit-ê sian-ti; Góa mā beh chhun chhiú kā i kong-kek, kā i tùi Góa ê I-su-la-el chú-bîn tiong tû-bia̍t.
10 In ē tam-tng kakī ê chōe-kò. Sian-ti ê chōe-kò kah lâi kiû mn̄g i ê lâng ê chōe-kò lóng sī kāng-khoán,
11 thang hō͘ I-su-la-el ê chú-bîn bô koh kiâⁿ bê-lō͘ lī-khui Góa, bô koh in-ūi ta̍k chióng ê chōe-kò kā kakī òe lahsap. Chóng-.sī, in ē chò Góa ê chú-bîn, Góa beh chò in ê Siōng-tè. Che sī chì-koân Siōng-chú kóng ê. "
12 Nó͘-ah, Ta-ni-el, Io-buh
Siōng-chú ê ōe lîm-kàu góa, kóng,
13 " Jîn-chú, nā ū kok tùi in ê pōe-ge̍k lâi tek-chōe Góa, Góa mā beh chhun chhiú kā i kong-kek, toān-choa̍t i só͘ óa-khò ê bí-niûⁿ, hō͘ ki-hng lîm-kàu tī i, tùi in tiong-kan chián-tû lâng kah chengseⁿ;
14 kî-tiong sûi-jiân ū Nó͘-ah, Ta-ni-el, Io-buh chit saⁿ-ê lâng, in chí ū ē in-ūi in ê gī lâi kiù kakī ê sèⁿ-miā niā-niā. Che sī chì-koân Siōng-chú kóng ê.
15 " Góa nā hō͘ ok-siù keng-kòe hit-ê tē lâi kā i sún-hoāi, hō͘ hit só͘-chāi hong-hùi, in-ūi chiahê siù ê iân-kò͘, tì-sú bô lâng tùi hia keng-kòe;
16 Sûi-jiân ū chit saⁿ-ê lâng tī in tiong-kan, chì-koân Siōng-chú kóng: Góa kí Góa ê éng-oán oa̍h-miā lâi chiùchōa, in bē tàng kiù in ê kiáⁿ-jî, chí ū in pún-sin tit tio̍h kiù niā-niā, tē-hng iû-goân hong-hùi.
17 " Á-sī Góa hō͘ to-kiàm lîm-kàu hit-ê só͘-chāi, kóng: To-kiàm, lí tio̍h keng-kòe hit-ê só͘-chāi, tì-sú Góa tùi in tiong-kan chián-tû lâng kah chengseⁿ;
18 sûi-jiân ū chit saⁿ-ê lâng tī in tiong-kan, chì-koân Siōng-chú kóng: Góa kí Góa ê éng-oán oa̍h-miā lâi chiùchōa, in bē tàng kiù in ê kiáⁿ-jî, chí ū in pún-sin tit tio̍h kiù niā-niā.
19 " Á-sī Góa hō͘ un-e̍k liû-hêng tī hit-ê só͘-chāi, hō͘ Góa piàⁿ-chhut siau-bia̍t sèⁿ-miā ê tōa siū-khì tī in ê téng-bīn, thang tùi in tiong-kan chián-tû lâng kah chengseⁿ;
20 sûi-jiân ū Nó͘-ah, Ta-ni-el, Io-buh tī in tiong-kan, chì-koân Siōng-chú kóng: Góa kí Góa ê éng-oán oa̍h-miā lâi chiùchōa, in bē tàng kiù in ê kiáⁿ-jî, chí ū ē in-ūi in ê gī lâi kiù kakī ê sèⁿ-miā niā-niā. "
21 Chì-koân Siōng-chú ánne kóng, " Hô-hòng Góa kā Góa sì hāng ê tōa chai-hō, to̍h-sī to-kiàm, ki-hng, ok-siù, un-e̍k, kàng-lo̍h tī Ê-lú-sa-lèm, tùi hit tiong-kan chián-tû lâng kah chengseⁿ, kám m̄-sī koh khah bē tàng kiù-.tit?
22 Lí khòaⁿ, ē ū só͘ chhun lo̍h-.lâi ê lâng lâu-.leh, to̍h-sī siū lia̍h chhut-.lâi ê kiáⁿ-jî; lí khòaⁿ, in ē chhut-lâi-kàu lín chia, lín ē khòaⁿ tio̍h in ê só͘ kiâⁿ, só͘ chò, kóng tio̍h Góa só͘ kàng-lo̍h tī Ê-lú-sa-lèm ê chai-hō, to̍h-sī Góa it-chhè kàng-lo̍h tī in téng-bīn ê, lín chiū ē tit tio̍h an-ùi.
23 Lín khòaⁿ tio̍h in ê só͘ kiâⁿ, só͘ chò, chiū ē siū an-ùi, chiū ē chai Góa tī Ê-lú-sa-lèm só͘ kiâⁿ ê m̄-sī bô-iân bô-kò͘. " Che sī chì-koân Siōng-chú kóng ê. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。