| 章节 | 现代台语2021版汉字经文 | 注释 |
| 4:1 | 耶稣受试探( 太 4:1-11 可 1:12-13 )耶稣受圣神充满，对约旦河转来。伊互圣神导去旷野， | |
| 4:2 | 伫遐四十日久受魔鬼试探。彼个期间伊拢无食什么，许个日子过了，腹肚就枵。 | |
| 4:3 | 魔鬼对伊讲：「既然你是上帝的子，命令此块石头变做饼！」 | |
| 4:4 | 耶稣应讲：「圣经有记载：『人啲活毋若倚靠饼。』」 | |
| 4:5 | 然后魔鬼导耶稣去到高的所在，一目𥍉久将天下万国互伊看， | |
| 4:6 | 给伊讲：「诸个一切的权势及荣华，我拢欲互你；因为诸个一切已经拢交互我，我欲互什么人就互彼个人。 | |
| 4:7 | 所以，你若跪落来拜我，诸个一切拢总是你的。」 | |
| 4:8 | 耶稣应讲：「圣经有记载：
着拜主 — 你的上帝， 只有服事伊。」 | |
| 4:9 | 魔鬼阁导耶稣去耶路撒冷，互伊徛伫圣殿上高的所在，给伊讲：「既然你是上帝的子，对遮跳落去， | |
| 4:10 | 因为圣经有记载：『上帝会为着你命令伊的天使来保护你』； | |
| 4:11 | 阁讲：
𪜶会用手给你扶啲， 互你的脚𣍐磕着石头。」 | |
| 4:12 | 耶稣应讲：「圣经有记载：『毋通试探主 — 你的上帝。』」 | |
| 4:13 | 所有的试探拢用了，魔鬼就离开耶稣，听候后遍的机会。 | |
| 4:14 | 耶稣开始伫加利利传道( 太 4:12-17 可 1:14-15 )耶稣受圣神的权能充满，转去加利利。伊的名声传到四围逐地区。 | |
| 4:15 | 伊伫逐个会堂教示人，受众人尊敬。 | |
| 4:16 | 耶稣伫拿撒勒受拒绝( 太 13:53-58 可 6:1-6 )耶稣倒去伊长大的所在拿撒勒，照习惯伫安歇日入去会堂。伊徛起来欲读圣经。 | |
| 4:17 | 有人提一卷先知以赛亚的册互伊，伊就搋开，寻着一所在有记载：
| |
| 4:18 | 主的神临到我，
因为伊用油抹我， 互我传好消息互散赤人。 伊差派我宣布： 受掠的得着解放， 无看见的阁看见， 受压迫的得着自由， | |
| 4:19 | 宣布主恩惠的年。 | |
| 4:20 | 耶稣给册卷起来，还互会堂的助理，就坐落去。会堂内的众人拢注目给伊看。 | |
| 4:21 | 伊就给𪜶讲：「此段圣经，今仔日恁啲听的时已经实现啦。」 | |
| 4:22 | 大家拢称赞耶稣，对伊所讲仁慈的话感觉奇怪，讲：「此个人岂毋是约瑟的子？」 | |
| 4:23 | 耶稣对𪜶讲：「恁一定会引用『医生啊，着医治你家己』此句俗语来对我讲：『阮有听着你伫迦百农做真多代志，今嘛着伫你的故乡做。』」 | |
| 4:24 | 耶稣阁讲：「我实在给恁讲，先知无一个伫家己的故乡受欢迎。 | |
| 4:25 | 我给恁讲实话，伫以利亚的时代有旷旱三年半久，逐所在有大饥荒，彼时以色列中有真多寡妇； | |
| 4:26 | 以利亚并无受差去𪜶遐，只有去西顿 撒勒法一个寡妇遐。 | |
| 4:27 | 先知以利沙的时，以色列中有真多麻疯病人，除去叙利亚人乃缦以外，无一个得着清气。」 | |
| 4:28 | 会堂内所有的人一下听着诸个话真受气。 | |
| 4:29 | 𪜶徛起来，给耶稣赶出城外，扭到山崁，欲给伊捙落去；𪜶的城是起伫山顶。 | |
| 4:30 | 耶稣却对𪜶中间行过，做伊去。 | |
| 4:31 | 耶稣医好邪神附身的人( 可 1:21-28 )耶稣落去加利利的迦百农城，逐个安歇日拢有啲教示人。 | |
| 4:32 | 𪜶对伊的教示感觉非常希奇，因为伊的话有权威。 | |
| 4:33 | 会堂内有一个互无清气的鬼神附身的人，伊大声喝： | |
| 4:34 | 「拿撒勒人耶稣，你插阮！你来欲毁灭阮是无？我知你是什么人；你是上帝的圣者。」 | |
| 4:35 | 耶稣给伊责备讲：「恬恬！对此个人出去！」鬼伫众人的面前给伊摔倒，就对伊出去，拢无给伊伤害着。 | |
| 4:36 | 众人真着惊，讲来讲去：「伊的话哪赫厉害？伊用权威及能力命令邪神，𪜶就出去。」 | |
| 4:37 | 耶稣的名声就传到四围逐所在。 | |
| 4:38 | 耶稣医好真多病人( 太 8:14-17 可 1:29-34 )耶稣离开会堂，入去西门𪜶兜。西门的丈姆破病，发热真烧；有人给耶稣讲此个代志。 | |
| 4:39 | 耶稣徛倚去伊的边仔，责备热病，热就退；妇仁人随时起来给𪜶侍候。 | |
| 4:40 | 日落的时，众人将有逐种病的人拢导来寻耶稣。耶稣一个一个给𪜶按手，拢给𪜶医好。 | |
| 4:41 | 嘛有鬼对真多人的身躯出来，喝讲：「你是上帝的子！」耶稣给𪜶责备，毋准𪜶讲，因为𪜶知耶稣是基督。 | |
| 4:42 | 耶稣伫会堂传道( 可 1:35-39 )天一下光，耶稣就出城去偏僻无人住的所在。归阵人啲寻伊，寻着就给伊留啲，无爱伊离开。 | |
| 4:43 | 毋拘耶稣给𪜶讲：「我嘛着去别个城市传上帝国的福音；这是上帝差派我来的目的。」 | |
| 4:44 | 伊就继续伫犹太逐个会堂传道。 |