章节 | 全民台语圣经汉罗经文 | 注释 |
2:1 | 天地kah它一切所有ê已经造完成。 | |
2:2 | Tī第七日,上帝完成他所创造ê工,to̍h tī第七日,歇他一切所做ê工。 | |
2:3 | 上帝tī第七日赐福,定做圣日,因为tī chit日,上帝停他一切创造ê工,就安息。 | |
2:4 | 天地创造ê来历,tī上主—上帝造地kah天ê日,亲像下底: | |
2:5 | 伊甸园山野一切ê草木iáu未有tī地里,山野一切ê菜蔬iáu未生长,因为上主—上帝无落雨tī地里,mā无人thang种作hitê土地。 | |
2:6 | 总是,有雾tùi地起,滋润全地面。 | |
2:7 | 上主—上帝用地chiūⁿê土沙粉chhiau做人(注:Tī希伯来文,「人」kah「地」有共同ê字根;「人」kah人名「亚当」mā是仝一个字根。),pûn活ê气入去伊ê鼻孔,人to̍h成做有灵魂ê活命。 | |
2:8 | 上主—上帝tī东方,tī伊甸,安置一个园,kā所造ê人hē tī hia。 | |
2:9 | 上主—上帝hō͘ ta̍k种ê树tùi地里发起来,好看mā好食。Τī园ê中间,koh有活命ê树kah分别善恶ê树。 | |
2:10 | 伊甸有河流出来,灌ak hitê园,tùi hia分开做四条。 | |
2:11 | 头一条名叫做Pi-sióng,to̍h是se̍h流tī 哈腓拉全地ê,tī hia有出金。 | |
2:12 | hit位ê金是真好,mā出珍珠碧玉。 | |
2:13 | 第二条名叫做基训,to̍h是se̍h流tī古实全地ê。 | |
2:14 | 第三条名叫做底格里斯,to̍h是流tī亚述ê东pêng ・ê。第四条to̍h是幼发拉底。 | |
2:15 | 上主—上帝kā hitê人hē tī伊甸园,来种作kah顾守。 | |
2:16 | 上主—上帝吩咐hitê人讲:「园内ta̍k种树ê果子,lóng thang随意来食。 | |
2:17 | 总是,分别善恶ê树,它ê果子m̄ thang食,因为食ê日,你一定ē死。」 | |
2:18 | 上主—上帝讲:「人单身kakī tòa m̄好,我beh kā伊造一个帮赞ê,来kah伊匹配。」 | |
2:19 | 上主—上帝用土做山野ta̍k种ê走兽,以及空中ta̍k种ê飞鸟,koh chhōa hiahê活物来到hitê人ê面前,看伊beh称in啥物名。见若伊所称ta̍k种活物ê,to̍h做hitê活物ê名。 | |
2:20 | Hitê人to̍h kā一切ê chengseⁿ、空中ê飞鸟kah山野一切ê走兽lóng号名;总是,chhōe无一个thang做hitê人ê帮赞,来kah伊匹配。 | |
2:21 | 上主—上帝hō͘ hitê人困重眠,伊to̍h困;就the̍h伊ê 一支脇骨,koh用肉kā它包起来。 | |
2:22 | 上主—上帝to̍h kā tùi hitê人所the̍h出来ê脇骨,造成一个chabó͘人,koh kā她chhōa来见hitê人。 | |
2:23 | Hitê人讲:「Taⁿ chitê是我骨内ê骨,肉内ê肉;我beh kā她叫做chabó͘人,因为她是tùi chapo͘人the̍h出来ê。 | |
2:24 | 所以,人beh离开伊ê父母,kah伊ê bó͘结联,in to̍h成做一体。 | |
2:25 | 翁bó͘两人lóng仝款thǹgpaktheh,mā无感觉见笑。 |