创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
34:1 底拿Hông强奸
利亚kā雅各所生ê chabó͘ kiáⁿ底拿，出去beh见hit所在ê chabó͘ gín-á。
34:2 Hit所在ê头人希未人哈抹ê kiáⁿ示剑看tio̍h她，to̍h kā她khiú来做伙困，kā她凌辱。
34:3 伊ê心恋慕雅各ê chabó͘ kiáⁿ底拿，爱chitê chabó͘ kiáⁿ，to̍h用好话kā她安慰。
34:4 示剑kā伊ê老父哈抹讲：「求你kā我聘chitê chabó͘ gín-á hō͘我做bó͘。」
34:5 雅各听tio̍h示剑òe lahsap伊ê chabó͘ kiáⁿ底拿。Hit时，伊hiahê kiáⁿ kah伊ê chengseⁿ tī山里，所以，雅各恬恬无出声，thèng候in tńg来。
34:6 示剑ê老父哈抹出来见雅各，beh kah伊讲话。
34:7 雅各hiahê kiáⁿ听tio̍h chitê tāichì，to̍h tùi山里tńg来，ta̍k个lóng m̄甘愿，非常受气，因为示剑tī以色列做出见笑ê tāichì，kah雅各ê chabó͘ kiáⁿ做伙困；这本来to̍h是无应该做ê tāichì。
34:8 哈抹kah in参详讲：「我ê kiáⁿ示剑ê心欣慕lín ê chabó͘ gín-á，求lín kā她hō͘我ê kiáⁿ做bó͘。
34:9 Lín kah阮大家结亲，lín thang kā lín ê chabó͘ kiáⁿ hō͘阮，lín mā thang娶阮ê chabó͘ kiáⁿ。
34:10 Lín kah阮做伙tòa。地tī lín ê面前，lín thang tòa chia khiā，做senglí，建置产业。
34:11 示剑对chabó͘ gín-á ê老父kah她ê兄弟讲：「愿tī你ê面前得tio̍h恩典，lín对我所求ê我lóng beh hō͘ lín。
34:12 Chhut-chāi lín beh对我讨gōa chē聘金kah礼物，我一定照lín所讲ê hō͘ lín，只有ài lín kā chabó͘ gín-á hō͘我做bó͘。」
34:13 雅各hiahê kiáⁿ，因为示剑òe lahsap in ê小妹底拿，to̍h用奸诈ê话来应示剑，kah伊ê老父哈抹。In对in讲：
34:14 Kā阮ê小妹hō͘无受割礼ê人做bó͘，chitê tāichì阮做bē到，因为he是阮ê见笑。
34:15 Lín所有ê chapo͘人，若lóng亲像阮相siâng受割礼，阮chiah ē tàng答应lín。
34:16 阮to̍h kā阮ê chabó͘ kiáⁿ hō͘ lín做bó͘，阮mā 娶lín ê chabó͘ kiáⁿ；阮to̍h kah lín做伙tòa，成做仝一个人民。
34:17 设使lín m̄听阮ê话来受割礼，阮to̍h beh带阮ê小妹来去。」
34:18 哈抹kah伊ê kiáⁿ示剑，欢喜in ê话。
34:19 Hitê少年人做chitê tāichì，lóng无延chhiân，因为伊爱雅各ê chabó͘ kiáⁿ，而且伊tī in老父ê家siōng尊贵。
34:20 哈抹kah伊ê kiáⁿ示剑，来到in ê城ê门口，kā in ê城ê人讲：
34:21 「Chiahê人kah咱和好，不如准in tī chitê地tòa，做senglí；koh再讲，chitê地mā开阔，会容允得in。咱thang娶in ê chabó͘ kiáⁿ做bó͘，mā thang kā咱ê chabó͘ kiáⁿ嫁hō͘ in。
34:22 总是，tio̍h有一项，hiahê chiah beh允咱，kah咱tòa，成做仝一个人民；to̍h是咱中间所有ê chapo͘人lóng tio̍h受割礼，亲像in受割礼ánne。
34:23 伊ê牛、羊、财产kah一切ê chengseⁿ，kám无lóng归tī咱？只有tio̍h允准in，in to̍hbeh kah咱tòa。」
34:24 见若tùi城门出来ê人lóng遵thàn哈抹kah伊ê kiáⁿ示剑ê话；就ánne，见若tùi城门出来ê chapo͘人lóng受割礼。
34:25 到第三日，群众当teh痛疼ê时，雅各两 个kiáⁿ，to̍h是底拿ê阿兄西缅kah利未，lóng gia̍h刀，趁人无tiuⁿ-tî ê时来到城内，thâi死所有ê chapo͘人，
34:26 mā用刀thâi死哈抹kah伊ê kiáⁿ示剑，chhōa底拿tùi示剑ê厝出来，to̍h离开hia。
34:27 雅各hiahê kiáⁿ为tio̍h in小妹受òe lahsap，to̍h来到受thâiê人hia，抢劫in ê城。
34:28 In抢in ê羊群、牛群kah驴á，以及城内kah田里所有ê物件。
34:29 koh kā in所有ê货物kah钱财，一切ê gín-á kah chabó͘人，以及ta̍k块厝所有ê物件lóng抢去。
34:30 雅各kā西缅kah利未讲：「Lín连累tio̍h我，hō͘我tī chit所在tòa ê人民中间，to̍h是tī迦南人kah比利洗人ê中间有臭名。而且我ê人额少，in一定ē聚集来攻击我，phah我，我kah全家ê人lóng ē灭亡。」
34:31 In讲：「伊kám thang款待阮小妹亲像娼妓？」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。