列王纪下 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
8:1 书念ê Cha-bó͘人Tńg来
有一个chabó͘人，以利沙bat hō͘她ê kiáⁿ koh活ê，mā bat kā她讲：「起来！你kah你ê全家去tòa你所thang tòa ê所在，因为上主命令饥荒临到，ē tī chitê所在七年。」
8:2 chabó͘人to̍h起来，照上帝ê奴仆ê话去行，她kah她ê家to̍h去腓利士人ê地，tī hia tòa七年。
8:3 七年满，hitê chabó͘人tùi腓利士地tńg来，to̍h出去，beh为kakī ê厝宅kah田园求叫王。
8:4 Hit时，王kah上帝ê奴仆ê差用基哈西讲话，讲：「请你kā以利沙所行一切ê大事kā我讲。」
8:5 基哈西teh kā王讲以利沙án怎hō͘死人koh活，tú好hitê chabó͘人，to̍h是伊hō͘她ê kiáⁿ koh活ê，为tio̍h她ê厝宅kah田园来求叫王。基哈西讲：「我ê主，我ê王，chitê是hitê chabó͘人，chitê是伊ê kiáⁿ，to̍h是以利沙hō͘伊koh活ê。」
8:6 王问hitê chabó͘人，她to̍h kā伊讲。王to̍h为tio̍h她派一个官员讲：「见若属chitê chabó͘人ê，lóng tio̍h还她，tùi她离开本所在到今á日，她ê田园所出产ê，mā lóng tio̍h还她。」
8:7 以利沙kah亚南王便哈达
以利沙来到大马士革，亚南王teh破病，有人kā王讲：「上帝ê奴仆来到咱chia。」
8:8 王to̍h kā哈设讲：「你带礼物去见上帝ê奴仆，拜托伊问上主看我chitê病会活á-bē？」
8:9 哈设to̍h去见伊，用四十只骆驼载大马士革ta̍k种ê好物做礼物，去khiā tī伊ê面前，讲：「你ê kiáⁿ亚南王差我来你chia，讲：『我chitê病会活á-bē？』」
8:10 以利沙kā伊讲，你去kā伊回覆，讲：「你一定ē活；总是，上主指示我，伊一定ē死。」
8:11 以利沙注目kā伊看，致使伊见笑。上帝ê奴仆就流目屎。
8:12 哈设讲：「我ê主ná ē teh流目屎？」以利沙应讲：「因为我知你所beh苦毒以色列人ê，用火烧in险要ê所在，用刀kā inthâi死ê壮丁，siak死in ê婴á，破开in有娠孕ê chabó͘人。」
8:13 哈设讲：「你ê奴仆是啥物，只不过是一只狗，ná ē行chitê大事？」以利沙应讲: 「上主有kā我指示，你ē做亚南王。」
8:14 伊离开以利沙，tńg去伊ê主人hia，主人问伊讲：「以利沙kā你讲啥物？」哈设应讲：「伊kā我讲，你一定ē活。」
8:15 隔tńg工，伊the̍h厚ê布ùn水，盖王ê面，王就死。哈设就续接伊做王。
8:16 偤大国ê王约兰
(代下21：1-20)
以色列王亚哈ê kiáⁿ约南第五年，约沙法做偤大王ê时，偤大王约沙法ê kiáⁿ约兰开始坐位。
8:17 约兰坐位ê时，三十二岁，tī耶路撒冷做王经过八年。
8:18 伊行以色列王ê路，kah亚哈ê家无各样，因为伊娶亚哈 ê chabó͘ kiáⁿ做bó͘，行上主所看做pháiⁿ ê tāichì。
8:19 总是，上主因为他ê奴仆—大卫ê缘故，m̄甘灭偤大，照他所应允大卫ê话，永远赏赐一葩灯hō͘伊ê kiáⁿ孙。
8:20 当约南ê年间，以东背叛偤大，脱离伊ê手头，kakī 设立王。
8:21 约南带所有ê战车，过去Cha-il，透暝起来，phah kā伊围困ê以东人kah hiahê车长；人民to̍h逃走，ta̍k个tńg去kakī ê布棚。
8:22 Án-ne，以东人背叛偤大，脱离伊ê手头，到今á日。仝hit时，立拿人mā背叛。
8:23 约南其他ê tāichì，见若伊所行ê，kám无lóng记tī偤大列王ê记录？
8:24 约南kah伊ê祖先同困，tī大卫城kah伊ê祖先同埋葬。伊ê kiáⁿ亚哈谢续接伊做王。
8:25 偤大王亚哈谢
(代下22：1-6)
以色列王亚哈ê kiáⁿ约南十二年，偤大王约兰ê kiáⁿ亚哈谢开始坐位。
8:26 亚哈谢坐位ê时，二十二岁，tī耶路撒冷做王一年；伊ê老母ê名叫做亚她利雅，是以色列王暗利ê chabó͘孙。
8:27 伊行亚哈ê家ê路，行上主所看做pháiⁿ ê tāichì，kah亚哈ê家无各样，因为伊是亚哈ê家ê kiáⁿ婿。
8:28 伊kah亚哈ê kiáⁿ约南做伙去基列ê拉末，kah亚南王哈设交战，亚南人phah伤约南。
8:29 约南王tńg去耶斯列，beh医治伊ê伤，to̍h是伊tī拉末kah亚南王哈设交战ê时，亚南人kā伊phah tio̍h ê。偤大王约兰ê kiáⁿ亚哈谢落去耶斯列，beh探访亚哈ê kiáⁿ 约南，因为伊有破病。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。