列王纪上 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
22:1 米该亚先知警告亚哈
(代下18：2-27)
以色列kah亚南三年无交战。
22:2 到第三年，偤大王约沙法落去以色列王hia。
22:3 以色列王对伊ê奴仆讲：「Lín kám m̄知基列ê拉末是咱ê？咱竟然恬恬无tùi亚南王ê手抢tńg来？」
22:4 亚哈kā约沙法讲：「你kám beh kah我去基列ê拉末交战？」约沙法kā以色列王讲：「我亲像你ê，我ê人民亲像你ê人民，我ê马亲像你ê马。」
22:5 约沙法kā以色列王讲：「请你今á日问上主ê意思。」
22:6 以色列王to̍h聚集先知差不多四百人，问in讲：「我tio̍h去基列ê拉末来交战，á是tio̍h ánne soah去？」In讲：「Thang上去，因为主ē kā伊交tī王ê手。」
22:7 约沙法讲：「Tī chia kám无上主ê先知，hō͘咱thang问伊？」
22:8 以色列王kā约沙法讲：「Iáu有一个人，是音拉 ê kiáⁿ米该亚，咱thang对伊来问上主。总是，我怨恨伊，因为伊所预言我ê，lóng无好话，只有灾祸niā-niā。」约沙法讲：「请王m̄ thang ánne讲。」
22:9 以色列王就召一个官员来，讲：「你去叫音拉ê kiáⁿ米该亚赶紧来。」
22:10 以色列王kah偤大王约沙法，ta̍k个坐伊kakī ê座位，穿礼服，tī撒马利亚城门口开阔ê所在，众先知ta̍k个tī in ê面前预言。
22:11 基拿拿ê kiáⁿ西底家做铁ê角，讲：「上主ánne讲：『你ē用chiahê角触亚南人，直到in灭亡。』」
22:12 众先知lóng ánne预言讲：「Thang上去基列ê拉末，ē得胜，因为上主ē kā伊交tī王ê手。」
22:13 Hitê去叫米该亚ê使者，kā伊讲：「你看，众先知lóng讲仝款ê话，对王讲好事，求你所讲ê mā kah in相仝，平平讲好话。」
22:14 米该亚讲：「我kí永远活ê上主来讲，上主对我讲啥物，我ē照ánne讲。」
22:15 米该亚来到王ê面前，王问伊讲：「米该亚，阮thang上去基列ê拉末来交战，á是tio̍h ánne soah去？」伊应讲：「Thang 上去，ē得胜，上主ē kā伊交tī王ê手。」
22:16 王对伊讲：「我tio̍h几pái kah你chiùchōa？你托上主ê名，只有tio̍h用真实kā我讲！」
22:17 米该亚讲：「我看tio̍h以色列众人四散tī山里，亲像无牧者ê羊。上主ánne讲：『Chiahê无主人，in ta̍k个thang平安tńg去in ê家。』」
22:18 以色列王kā约沙法讲：「我kám无kā你讲？Chitê人所beh预言我ê，无讲好话，只有灾祸niā-niā。」
22:19 米该亚讲：「所以，你tio̍h听上主ê话；我看tio̍h上主坐tī宝座，天顶ê万军khiā tī他ê左右。
22:20 上主讲：『啥人ē引诱亚哈，hō͘伊上去基列ê拉末，死tī hia？』Chitê讲ánne，hitê讲ánne。
22:21 后来，有一个神明出来，khiā tī上主ê面前，讲：「我beh引诱伊。」
22:22 上主问伊讲：『你beh用啥物法度？』伊讲：『我beh出去，tī伊众先知ê嘴做白贼ê神明。』上主讲：『你ē kā伊引诱，mā ē kā伊成，出去，做你去ánne做！』
22:23 Taⁿ上主用白贼ê神明入去tī你chiahê先知ê嘴。上主讲tio̍h你ê时，讲你有灾祸à。」
22:24 基拿拿ê kiáⁿ西底家进前来，siàn米该亚ê嘴phóe，讲：「上主ê灵tùi tó一条路离开我来kah你讲？」
22:25 米该亚讲：「你看，你入去bih tī kakī ê内房，hit日你to̍h ē看tio̍h。」
22:26 以色列王讲：「Tio̍h chhōa米该亚去交hō͘城守亚扪kah王ê kiáⁿ约阿施，讲：
22:27 「王ánne讲：Kā chitê人关tī监里，用苦ê饼kah苦ê水hō͘伊食，thèng候我平安tńg来。」
22:28 米该亚讲：「你若真正平安tńg来，to̍h是上主无托我讲。」伊koh讲：「Chiahê人民，lín lóng tio̍h听！」
22:29 亚哈ê死亡
(代下18：28-34)
以色列王kah偤大王约沙法去基列ê 拉末。
22:30 以色列王kā约沙法讲：「我beh改妆上阵，你thang穿王服。」以色列王就改妆上阵。
22:31 亚南王有吩咐伊ê战车ê官长三十二个，讲：「无论大细m̄ thang kah in交战，只有kah以色列王交战。」
22:32 战车ê官长看tio̍h约沙法，to̍h讲：「这一定是以色列王！」to̍h oa̍t-tńg身beh kah伊交战，约沙法就hoah咻。
22:33 战车ê官长看tio̍h伊m̄是以色列王，to̍h oa̍t-tńg身，无去jiok。
22:34 有一个人偶然开弓射入去以色列王战甲ê kap-chōa，王kā赶车ê讲：「你oa̍t-tńg手，chhōa我出阵，因为我tio̍h重伤。」
22:35 Hit日，交战ê势面ná来ná猛烈，有人扶王tī车里，抵挡亚南人。到日暗，王就死，血tùi tio̍h伤ê所在流到车底。
22:36 日beh落ê时，有号令遍传tī军营中，讲：「Ta̍k人tńg去本城，ta̍k人tńg去本地。」
22:37 王死去，身尸hông带到撒马利亚，in kā王埋葬tī撒马利亚。
22:38 有人tī撒马利亚ê池边洗伊ê车，狗来舐伊ê血，tú照上主所讲ê话（娼妓mā tī hia洗身躯）。
22:39 亚哈其他ê tāichì，见若伊所行ê kah伊所起象牙ê厝，以及所起所有ê城，kám无记tī以色列chiahê王ê记录？
22:40 亚哈kah伊ê祖先同困。伊ê kiáⁿ亚哈谢续接伊做王。
22:41 偤大王约沙法
(代下20：31-21：1)
以色列王亚哈第四年，亚撒ê kiáⁿ约沙法坐位做偤大王。
22:42 约沙法坐位ê时，三十五岁，tī耶路撒冷做王二十五年。伊ê老母ê名叫做A-chu-bah，to̍h是Sil-hí ê chabó͘ kiáⁿ。
22:43 约沙法照ánne行伊ê老父亚撒hiahê路，无oa̍t-tńg离开它，行上主看做好ê tāichì；总是，山头坛iáu未废除，人民犹原tī山头坛献祭烧香。
22:44 约沙法kah以色列王立约和好。
22:45 约沙法其他ê tāichì，kah伊所显出ê能力，kah伊án怎交战，kám无lóng记tī偤大列王ê记录？
22:46 伊ê老父亚撒ê时所留落来ê男性庙倡，约沙法tùi国内kā它除去。
22:47 Hit时，以东无王，有委员teh管理。
22:48 约沙法造他施ê船只，beh去俄斐运金来；总是，无去，因为船tī以旬迦别phah破。
22:49 亚哈ê kiáⁿ亚哈谢kā约沙法讲：「容允我ê奴仆kah你ê奴仆坐船做伙去。」总是，约沙法m̄肯。
22:50 约沙法 kah祖先同困，kah伊ê祖先葬tī伊ê祖先大卫ê城；伊ê kiáⁿ约兰续接伊做王。
22:51 以色列王亚哈谢
偤大王约沙法十七年，亚哈ê kiáⁿ亚哈谢tī撒马利亚坐位，做以色列王，tī以色列做王经过两年。
22:52 伊行上主看做pháiⁿ ê tāichì，照ánne行伊ê父ê路kah伊ê老母ê路，以及hō͘以色列犯罪ê尼八ê kiáⁿ耶罗波安ê路。
22:53 伊照in老父所行ê一切服事巴力来kā伊敬拜，激起上主—以色列上帝ê受气。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。