列王纪上 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
8:1 迎接约柜入圣殿
(代下5：2-6：2)
Hit时，所罗门聚集以色列ê长老kah ta̍k支族ê首领，以及以色列人hiahê族长，来到耶路撒冷所罗门王hia，beh kā上主ê约柜tùi大卫城，to̍h是锡安，运来。
8:2 Tī以他念月，to̍h是七月ê节期，以色列人lóng聚集来到所罗门王hia。
8:3 以色列ê长老lóng来；hiahê祭司扛约柜。
8:4 Into̍h kā上主ê柜kah会幕，以及布棚内一切圣ê器具运来；祭司kah利未人lóng kā它扛起来。
8:5 所罗门王kah聚集来到伊hia ê以色列ê全会众，tī约柜前献羊kah牛做祭祀，数目chē到bē算得，mā算bē了。
8:6 祭司扛上主ê约柜来到它ê所在，入去hit间后殿，to̍h是至圣所，kā它hē tī ki-lō͘-peng ê翼下。
8:7 因为ki-lō͘-peng thí开in ê翼，tī柜ê所在ê顶面，所以有ki-lō͘-peng tī hit顶面遮盖柜kah它ê杠（kǹg）。
8:8 Hiahê杠真长，杠尾tī后殿前ê圣所看ētio̍h，tī外面to̍h看bē tio̍h；到今á日iáu tī hia。
8:9 柜内只有两块石碑，to̍h是以色列人出埃及地，上主kah in立约ê时，摩西tī何烈山所hē ê，这以外无别项物。
8:10 当祭司tùi圣所出来ê时，有云充满上主ê殿；
8:11 致使祭司为tio̍h云ê缘故bē tàng khiā-teh服事，因为上主ê荣光充满上主ê殿。
8:12 Hit时，所罗门讲：「上主bat讲他ētiàm tī乌乌暗暗ê所在；
8:13 我已经起chit间殿hō͘祢tòa，做祢永远tòa ê所在。」
8:14 所罗门对人民ê教示
(代下6：3-11)
王oa̍t-tńg伊ê面祝福以色列会众；以色列会众lóng khiā起来。
8:15 伊讲：「上主—以色列ê上帝是应该oló ê，因为他亲嘴对我ê老父大卫应允ê，mā亲手kā伊应验。伊讲：
8:16 『Tùi我chhōa我ê子民—以色列人出埃及以来，我m̄ bat tī以色列众支族中间拣一个城，起殿hō͘我ê名tī hia，独独拣大卫治理我ê子民—以色列人。』
8:17 「我ê老父大卫心内有意思，beh为上主—以色列ê上帝ê名起殿。
8:18 总是，上主对我ê老父大卫讲：『你ê心有意思beh为我ê名起殿，你chitê意思真好。
8:19 总是，你m̄ thang起殿，你所亲生ê kiáⁿē为我ê名起殿。』
8:20 「Taⁿ上主应验他所讲ê话，我照上主ê话起来续接我ê老父大卫，坐以色列ê国位，koh为上主—以色列上帝ê名起殿。
8:21 我mā tī hia为约柜准备一个所在，柜内有上主ê约，to̍h是他chhōa咱ê祖先出埃及ê时，kah in所立ê约。」
8:22 所罗门ê祈祷
(代下6：12-42)
所罗门当以色列会众ê面前，khiā tī上主ê坛前，gia̍h起手ǹg天，讲：
8:23 「上主—以色列ê上帝ah，tī天顶，tī地下，无有神明亲像祢守约koh行疼心tī祢hiahê奴仆，to̍h是尽心行tī祢ê面前ê。
8:24 祢对祢ê奴仆—我ê老父大卫所应允ê，祢有守约。祢亲嘴讲ê，有亲手kā它应验，tú照今á日ê款。
8:25 上主—以色列ê上帝ah，祢有应允祢ê奴仆—我ê老父大卫讲：『你ê kiáⁿ孙若谨慎in ê所做，行tī我ê面前，亲像你行tī我ê面前，就属tī你ê beh tī我ê面前坐以色列ê国位永无断』，taⁿ求祢kā它应验。
8:26 以色列ê上帝ah，祢对祢ê奴仆—我ê老父大卫所讲ê，求祢hō͘它成做事实。
8:27 「上帝kám真正会tòa tī地chiūⁿ？你看，天kah chiahê天ê天尚且无够额thang hō͘祢tòa，何况我所起ê chit间殿？
8:28 上主—我ê上帝ah，愿祢àⁿ落数念祢ê奴仆ê祈祷kah恳求，来听祢ê奴仆今á日tī祢面前所祈祷ê求叫。
8:29 愿祢暝日看顾chitê殿，to̍h是祢所讲起ê『我ê名beh tī hia』ê所在，来听祢ê奴仆所beh ǹg chit所在祈祷ê祈祷。
8:30 祢ê奴仆kah祢ê子民—以色列人ǹg chit所在祈祷ê时，愿祢听in ê祈求，愿祢tī天里—祢tòa ê所在来听in ê祈求，祢听tio̍h ê时to̍h kā in赦免。
8:31 「人若得罪伊ê厝边，koh有人用一个chiùchōa kah伊chiùchōa，伊若来chit间殿，tī祢ê坛前chiùchōa ê时，
8:32 求祢tī天里垂听来kā伊办理；审判祢chiahê奴仆，定pháiⁿ人ê罪，照伊所行ê报应tī伊ê头壳；定义人做义，照伊ê义来hō͘伊。
8:33 「设使祢ê子民—以色列人，因为得罪祢，chiah tī对敌ê面前thâi输，in若归向祢，认祢ê名，koh tī chit间殿祈祷，kā祢恳求，
8:34 求祢tī天里听in ê祈祷，来赦免祢ê子民—以色列ê罪，hō͘ in tńg来祢所赏赐hō͘ in ê祖先ê地。
8:35 「设使in得罪祢，致使天关密，无落雨；祢kā in刑罚ê时，in若ǹg chit所在祈祷，认祢ê名，离开in ê罪，
8:36 求祢tī天里听in ê祈祷，赦免祢ê奴仆kah祢ê子民—以色列ê罪；tī祢教示in所tio̍h行ê好路ê时，koh落雨tī祢ê地，to̍h是祢赏赐祢ê子民做产业ê。
8:37 「Chitê地若有饥荒、瘟疫、干燥、朽烂、草蜢、剪虫，á是in ê对敌tī in hiahê城ê地kā in围困，无论有啥物灾祸，啥物破病，
8:38 祢ê子民—以色列ê群众，无论是个人，á是群众，若ta̍k个知kakī 心内ê灾祸，ǹg chit间殿gia̍h起手，无论án怎恳求，án怎祈祷，
8:39 愿祢tī天里，祢所tòa ê所在，来听，来赦免，来施行。祢知in ê心，照in ta̍k人ê行为来款待in，(因为世间ta̍k人ê心，只有祢知)，
8:40 hō͘ in tī祢赏赐hō͘阮祖先ê地，一世人敬畏祢。
8:41 「若是外邦人，in m̄是属祢ê子民—以色列，伊为tio̍h祢ê名tùi远远ê所在来ê，
8:42 (因为in听tio̍h祢ê大名，大权能ê手，伸出ê手。)若来ǹg chitê殿祈祷，
8:43 愿祢tī天里祢tòa ê所在，来听in ê祈祷，照外邦人一切所对祢求ê来行，hō͘天下万民lóng bat祢ê名，敬畏祢，亲像祢ê子民—以色列，koh hō͘ in知我所起chit间殿是用祢ê名来称呼ê。
8:44 「祢ê子民若出去祢所差in去ê路kah对敌交战，mā ǹg祢所拣ê城，kah我为tio̍h祢ê名所起ê殿，来对上主祈祷，
8:45 愿祢tī天里来听in ê祈祷kah恳求，来kā in判断。
8:46 「祢ê子民若得罪祢，(因为无有无犯罪ê人)，祢对in受气，kā in交hō͘对敌，致使对敌掠in到对敌ê地，á是远，á是近ê所在，
8:47 in若tī所掠去ê地，心内倒tńg来想，来悔改，koh tī掠in ê人ê地，恳求祢讲：『阮有罪，阮有悖逆，阮有做pháiⁿ』；
8:48 in若tī受掠去ê所在，to̍h是对敌掠in去ê所在，尽心、尽性归服祢，koh ǹg本地，to̍h是祢赏赐hō͘ in祖先ê地kah祢所拣ê城，以及我为tio̍h祢ê名所起ê殿，来对祢祈祷，
8:49 愿祢tī天里祢所tòa ê所在，听in ê祈祷kah恳求，kā in判断；
8:50 koh赦免祢ê子民得罪祢ê，以及in一切得罪祢ê罪过，hō͘ in tī掠in ê人ê面前得tio̍h怜悯，致使掠in ê人kā in怜悯。
8:51 因为in是祢ê子民，祢ê产业，是祢chhōa in出埃及，tùi铸铁ê炉中出来ê。
8:52 「愿你开目chiu 开来看顾祢ê奴仆，kah祢ê子民—以色列ê祈祷，来听in一切对祢恳求ê。
8:53 至koân上主ah，因为祢bat tùi地chiūⁿ众人ê中间kā in分别出来做祢ê产业，是照祢chhōa阮ê祖先出埃及ê时，托祢ê奴仆摩西所讲ê。」
8:54 祝福人民
所罗门tī上主ê坛前，脚头u跪teh，伸手ǹg天，已经对上主祈祷恳求了后，to̍h起来。
8:55 伊khiā ・leh，大声祝福以色列全会众，讲：
8:56 「上主是应该tio̍h oló ê，因为他一切所应允ê，赏赐平安hō͘他ê子民—以色列；见若托他ê奴仆摩西所应允ê好话，无一句落空。
8:57 愿上主—咱ê上帝kah咱同在，亲像他kah咱ê祖先同在。愿他无离开咱，无放sak咱，
8:58 hō͘咱ê心归向他，来行他一切ê道路，守他所命令咱ê祖先ê诫命、律例、法度。
8:59 我taⁿ tī上主ê面前所祈求chiahê话，愿chiahê话暝日近tī咱ê上帝—上主，koh日日照所合宜ê为他ê奴仆判断，mā为他ê子民—以色列判断，
8:60 hō͘地chiūⁿ万民知影上主是上帝，他以外无别个。
8:61 所以，lín ê心tio̍h完全ǹg上主—咱ê上帝，遵thàn他ê律例，守他ê诫命，亲像今á日ánne。」
8:62 圣殿献堂典礼
(代下7：4-10)
王kah以色列众人做伙tī上主ê面前献祭。
8:63 所罗门献谢恩ê祭，to̍h是献hō͘上主牛二万二千只，羊十二万只。Án-ne，王kah以色列众人，为上主ê殿行献殿ê礼。
8:64 当hit日，王分别上主殿前院中ê所在为圣，tī hia献烧祭、素祭kah谢恩祭ê油，因为上主头前ê铜坛siuⁿ细，bē容允得hiahê烧祭、素祭kah谢恩祭ê油。
8:65 Hit时，所罗门kah以色列人民，to̍h是tùi哈马ê路口到埃及ê溪，lóng kah伊聚集成做大会，tī上主—咱ê上帝ê面前守节筵七日koh七日，共十四日。
8:66 第八日，王差人民散去；in to̍hka7王祝福；因为上主对他ê奴仆—大卫kah他ê子民—以色列所施出一切ê恩惠，in to̍h欢喜，心内快乐，ta̍k个tńg去in ê布棚。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。