创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
30:1 拉结看她kakī 无kā雅各生kiáⁿ，就怨妒她ê大姊。她对雅各讲：「你tio̍h hō͘我有kiáⁿ，若无，我beh死。」
30:2 雅各对拉结受气，讲：「Hō͘你无生ê是上帝，我kám ē tàng代替他？」
30:3 拉结讲：「你看我ê女婢辟拉tī chia，你去kah她同房，hō͘她生kiáⁿ，抱tī我ê脚头u，我mā thang tùi她得tio̍h kiáⁿ。」
30:4 拉结to̍h kā她ê女婢辟拉hō͘伊做bó͘，雅各to̍h kah她同房。
30:5 辟拉怀孕，kā雅各生一个kiáⁿ。
30:6 拉结讲：「上帝kā我判断，mā听我ê声，hō͘我有kiáⁿ。」所以，她kā伊ê名号做但。
30:7 拉结ê女婢辟拉koh怀孕，kā雅各生第二个kiáⁿ。
30:8 拉结讲：「我kah我ê大姊激烈相争，已经得tio̍h khah赢。」to̍h kā伊ê名叫做拿弗他利。
30:9 利亚看kakī 停歇无koh生，to̍h kā她ê女婢悉帕hō͘雅各做bó͘。
30:10 利亚ê女婢悉帕kā雅各生kiáⁿ。
30:11 利亚讲：「佳哉！」to̍h kā伊ê名叫做迦得。
30:12 利亚ê女婢悉帕，koh kā雅各生第二个kiáⁿ。
30:13 利亚讲：「我有福气！Chiahê chabó͘ gín-á lóng ē讲我有福气。」to̍h kā伊号名叫做亚设。
30:14 割麦ê时，流便去田里，得tio̍h催情果，the̍h来hō͘伊ê老母利亚。拉结对利亚讲：「请kā你ê kiáⁿ ê催情果hō͘我。」
30:15 利亚对她讲：「你抢夺我ê丈夫，kám是小khóa tāichì？你koh beh抢夺我ê kiáⁿ ê催情果？」拉结讲：「为tio̍h你ê kiáⁿ ê催情果，所以，今暝伊thang kah你做伙困。」
30:16 到暗，雅各tùi田里tńg来，利亚出去kā伊迎接，讲：「你tio̍h kah我做伙困，因为我已经用我ê kiáⁿ ê催情果倩你。」Hit暝，雅各to̍h kah她做伙困。
30:17 上帝允准利亚，她就怀孕，kā雅各生第五个kiáⁿ。
30:18 利亚讲：「上帝hō͘我工钱，因为我kā女婢hō͘我ê丈夫。」就ánne，kā伊号名叫做以萨迦。
30:19 利亚koh怀孕，kā雅各生第六个kiáⁿ。
30:20 利亚讲：「上帝赏赐我好ê赏赐，我ê丈夫beh kah我tòa，因为我kā伊生六个kiáⁿ。」就ánne，kā伊号名叫做西布伦。
30:21 后来，她生一个chabó͘ kiáⁿ，kā她号名叫做底拿。
30:22 上帝数念拉结，上帝允准她，hō͘她会生kiáⁿ。
30:23 她就怀孕生kiáⁿ；讲：「上帝除去我ê见笑。」
30:24 to̍h kā伊号名叫做约瑟，讲：「愿上主koh加添我一个kiáⁿ。」
30:25 雅各kah拉班谈判
拉结生约瑟了后，雅各对拉班讲：「请差我离开，hō͘我tńg去我ê本所在，我ê故乡。
30:26 请你kā我服事你所得tio̍h ê bó͘-kiáⁿ hō͘我，请容允我去；我án怎服事你，你lóng知。」
30:27 拉班kā伊讲：「我若tī你ê面前得tio̍h恩典，请你kah我tòa，因为我深知上主赐我福气，是因为你ê缘故。」
30:28 拉班koh kā伊讲：「请你定tio̍h你ê工钱，我to̍h hō͘你。」
30:29 雅各kā伊讲：「我服事你án怎，你ê chengseⁿ tī我ê手头án怎，你lóng知。
30:30 我iáu未来ê chìn前，你所有ê真少，taⁿ你大发达；上主kā福气tòe我ê脚来hō͘你，taⁿ我tio̍h到tang时chiah ē tàng为我ê家建置产业？」
30:31 拉班讲：「我tio̍h hō͘你啥物？」雅各讲：「你mā m̄免特别hō͘我啥物，有一项tāichì，你若答应，我to̍h犹原饲你ê羊群来kā in顾守。
30:32 今á日，我beh kā你ê羊群巡一遍，kā绵羊中见若有点ê，有斑ê kah乌色ê，以及山羊中见若有斑ê kah有点ê lóng拨出来，到时chit款ê羊to̍h hō͘我来当做我ê工钱。
30:33 以后你来看我ê工钱，hit中间若有山羊无点、无斑ê，绵羊若m̄是乌色ê，to̍h算是我偷ê；用ánne来证明我ê公道。」
30:34 拉班讲：「好，我愿意照你ê话行。」
30:35 Hit日，拉班就先kā有纹、有斑ê山羊káng，有点、有斑、làng白ê山羊母，以及乌色ê绵羊，lóng拨出来交hō͘伊kakī hiahê kiáⁿ。
30:36 伊hō͘ kakī kah雅各相离有三日ê路程，雅各to̍h去顾拉班其他ê羊。
30:37 雅各the̍h青ê杨树、杏树、枫树，软ê枝，kā树皮剥成白纹，hō͘树枝内白色ê部分露现出来。
30:38 伊kā有白纹ê树枝插tī羊lim水ê水沟kah水槽，hō͘它kah羊相对相；羊来lim水ê时，公母交合。
30:39 羊tī树枝ê对面交合，to̍h生有纹ê、有点ê、有斑ê。
30:40 雅各kā羊á拨出来，hō͘拉班ê羊kah chiahê有纹kah乌色ê羊相对。伊kā kakī ê羊另外放tī一个所在，无hō͘ in kah拉班ê羊lām做伙。
30:41 Tú tio̍h羊群中勇壮ê羊交合ê时，雅各to̍h用树枝插tī水沟内，hō͘羊tī树枝ê对面交合。
30:42 Tú tio̍h羊群中间ê瘦ê，to̍h无插树枝。就ánne，瘦ê归拉班，勇壮ê归雅各。
30:43 雅各就ánne大发达，得tio̍h真chē羊群、女婢、奴仆、骆驼kah驴。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。