撒母耳记下 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
7:1 拿单传上主ê话Hō͘大卫
(代上17：1-15)
当王tiàm tī厝内，上主mā已经hō͘伊脱离四箍围ê对敌，得tio̍h安静ê时，
7:2 王kā拿单先知讲：「你看，我tiàm tī柏香柴ê厝内，总是，上主ê柜tiàm tī帐帘内。」
7:3 拿单对王讲：「见若你ê心所想ê lóng thang去做，因为上主kah你同在。」
7:4 Hit暝，上主ê话临到拿单讲：
7:5 「你去kā我ê奴仆—大卫讲，上主ánne讲：『你kám ē起厝hō͘我tòa？
7:6 Tùi我chhōa以色列人出埃及ê日到今á日，我m̄ bat tiàm tī厝里，tiāⁿ-tiāⁿ tī布棚kah会幕行。
7:7 见若我kah以色列人所行到ê所在，kám bat对以色列一支族ê士师，to̍h是我命令照顾我ê子民—以色列人ê，讲：Lín ná ē无kā我起柏香柴ê厝？』
7:8 「Taⁿ你tio̍h kā我ê奴仆—大卫讲，万军ê上主ánne讲：『我tùi羊椆中，你teh饲ê羊群中，拣你来做我ê子民—以色列人ê君王。
7:9 你无论去tó位，我tiāⁿ-tiāⁿ kah你同在，tī你ê面前剪除你所有ê对敌。我一定hō͘你得tio̍h大名，亲像世上hiahê伟人ê大名。
7:10 我beh为tio̍h我ê子民—以色列人定tio̍h一个所在，kā in栽培，hō͘ in tòa tī kakī ê所在，无koh迁徙，凶恶ê匪类无koh亲像早前kā in搅扰，
7:11 mā无亲像tùi我命令士师管理我ê子民—以色列人ê日，我ē hō͘你脱离所有ê对敌，得tio̍h安静，而且上主kā你讲，上主ē kā你建立你ê家。
7:12 到你ê日子已经满，你kah你ê祖先做伙困ê时，我ē设立你所出ê kiáⁿ孙来续接你，我mā ē坚固in ê国。
7:13 伊ē为我ê名起殿，我ē坚固伊ê国位，一直到永远。
7:14 我beh做伊ê父，伊ē做我ê kiáⁿ；伊若犯罪，我ē用人ê 拐kah世间人ê鞭，kā伊责督。
7:15 总是，我ê慈爱无beh离开伊，亲像我hō͘它离开扫罗，to̍h是我所弃sak tī你ê面前ê。
7:16 你ê家kah你ê国ē永远建立tī你ê面前，你ê国位mā ē坚固到永远。』」
7:17 拿单就照chiahê话，照这一切ê启示，ánne kā大卫讲。
7:18 大卫感恩ê祈祷
(代上17：16-27)
大卫王to̍h入去，坐tī上主ê面前，讲：「至koân上主ah，我是啥人，我ê家算做啥物，祢竟然chhōa我到chitê地位？
7:19 至koân上主ah，这祢iáu看做是小khóa，祢koh讲起祢ê奴仆ê家ē到tī久长。至koân上主ah，这是人间ê例。
7:20 大卫iáu有啥物thang对祢讲？至koân上主ah，祢知祢ê奴仆。
7:21 为tio̍h祢ê话，koh照祢ê心，祢行这一切ê大事，hō͘祢ê奴仆知。
7:22 上主—上帝ah，祢是至大，照阮ê耳孔所听tio̍h ê，无一个ē tàng比得祢，祢以外无有上帝。
7:23 地chiūⁿ有啥物国亲像祢ê子民—以色列人？to̍h是上帝去kā in救赎，归tī kakī 做子民，hō͘伊有名声，koh tī祢ê子民ê面前，to̍h是祢tùi埃及kah列邦，以及in hiahê神明所救赎出来ê，为tio̍h lín行大事，为tio̍h你ê地做thang惊ê tāichì？
7:24 祢bat为kakī 建立祢ê子民—以色列永远做祢ê子民；上主ah，祢mā做in ê上帝。
7:25 「上主—上帝ah，taⁿ祢所讲起祢ê奴仆kah祢ê奴仆ê家，愿祢永远kā伊坚固，照祢所讲ê来行。
7:26 愿人永远尊祢ê名做大，讲：『万军ê上主是管理以色列ê上帝。』而且祢ê奴仆—大卫ê家ē tī祢ê面前坚固。
7:27 万军ê上主，以色列ê上帝ah，因为祢启示祢ê奴仆，讲：『我ē kā你建立家。』所以，祢ê奴仆好胆用chitê祈祷来对祢祈祷。
7:28 「Taⁿ至koân上主ah，只有祢是上帝，祢ê话是真实；祢mā用chitê福气应允祢ê奴仆。
7:29 Taⁿ求祢赐福祢ê奴仆ê家，hō͘它永远tī祢ê面前。至koân上主ah，因为祢有讲起，愿祢ê奴仆ê家tùi祢ê赐福来得tio̍h福气，直到永远！」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。