创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
26:1 以撒居留基拉耳
亚伯拉罕ê时，头一pái饥荒以后，hit所在koh有饥荒。以撒to̍h去基拉耳，来到腓利士ê王亚比米勒hia。
26:2 上主对伊出现，讲：「你m̄ thang落去埃及，tio̍h tòa tī我所指示你ê地。
26:3 你寄脚tī chitê地，我ē kah你同在，kā你赐福，因为我beh kā chiahê地lóng hō͘你kah你ê kiáⁿ孙。我ē坚固我对你ê父亚伯拉罕所chiù ê chōa。
26:4 我ē加添你ê kiáⁿ孙，亲像天顶ê星hiah chē，koh beh kā chiahê地lóng hō͘你ê kiáⁿ孙。地chiūⁿ万国ē koh因为你ê kiáⁿ孙，来得tio̍h福气。
26:5 这是因为亚伯拉罕听我ê话，守我ê吩咐、我ê命令、我ê律例、我ê法度。」
26:6 以撒to̍h去tòa tī基拉耳。
26:7 Hit所在ê人问起伊ê bó͘，伊to̍h讲：「她是我ê小妹。」伊m̄敢讲：「是我ê bó͘」。心内想：恐惊hit所在ê人ē为tio̍h利百加ê缘故来thâi我，因为她面貌真súi。
26:8 以撒tòa tī hia已经久。有一工，腓利士王亚比米勒tùi窗á看出去，看tio̍h以撒kah伊ê bó͘利百加teh滚笑。
26:9 亚比米勒叫以撒来，kā伊讲：「她实在是你ê bó͘，你ná ē讲：她是我ê小妹？」以撒讲：「因为我心内想：恐惊我ē为tio̍h她来死。」
26:10 亚比米勒讲：「你对阮所做ê是啥物事？我ê人民中间，险险á有人kah你ê bó͘做伙困，ánne，你to̍h hō͘阮陷落罪。」
26:11 Tùi hit时起，亚比米勒to̍h吩咐众人讲：「凡若kha̍p tio̍h chitê人kah伊ê bó͘ ê，定tio̍h beh kā伊处死。」
26:12 以撒tī hit所在种作，hit年得tio̍h百倍，因为上主赐伊福气。
26:13 伊to̍h成做大好额，ná久ná大，到成做大富户。
26:14 伊有羊群、牛群，mā有真chē奴仆，所以腓利士人to̍h怨妒伊。
26:15 当伊ê老父亚伯拉罕iáu tī ・leh ê时，伊ê老父ê奴仆所开ê井，腓利士人lóng kā伊塞掉，用土thūn满。
26:16 亚比米勒kā以撒讲：「你tio̍h离开阮去，因为你比阮崭然khah强盛。」
26:17 以撒to̍h离开hia，tī基拉耳ê山谷搭布棚，tiàm hia tòa。
26:18 当伊ê老父亚伯拉罕iáu tī ・leh ê时，所开hiahê水井，到亚伯拉罕死了后，lóng hō͘腓利士人thūn去。以撒重新koh再开井，犹原照in老父所号ê名来kā hiahê井号名。
26:19 以撒ê奴仆tī山谷teh掘，tú tio̍h一个活水ê井。
26:20 基拉耳ê牧者kah以撒ê牧者相争，讲：「Chitê水是阮ê。」以撒就号hit口井ê名叫做E-sek，因为in kah伊相争。
26:21 In koh再开一口井，in为chit口井koh相争，所以kā hit口井ê名叫做Sit-nah。
26:22 In离开hia，koh开一口井，in无为chit口井koh相争，to̍h kā它号名叫做Le-ho-bot，意思是讲：「上主taⁿ hō͘阮开阔ê地，阮beh tī chitê地兴旺。」
26:23 以撒tùi hia tńg去别是巴。
26:24 Hit暝，上主对伊出现，讲：「我是你ê老父亚伯拉罕ê上帝。M̄免惊，因为我kah你同在。我beh kā你赐福，hō͘你ê kiáⁿ孙兴旺，这lóng是为tio̍h我ê奴仆亚伯拉罕ê缘故。」
26:25 伊to̍hti7 hia起一座坛，求叫上主ê名，koh tī hia搭伊ê布棚。以撒ê奴仆to̍h tī hia开一口井。
26:26 以撒kah亚比米勒立约
亚比米勒kah伊ê朋友A-hu-cha̍t以及伊ê军长Pi-kol，tùi基拉耳来见以撒。
26:27 以撒对in讲：「Lín既然怨恨我，叫我离开lín，taⁿ是án怎ē来我chia？」
26:28 In讲：「阮明明看tio̍h上主kah你同在，所以阮讲，咱中间，to̍h是你kah阮中间 tio̍h chiùchōa，请hō͘阮kah你立约：
26:29 你无害阮，亲像阮mā m̄ bat kha̍p tio̍h你，独独好款待你，送你安然tńg去。Taⁿ你是上主所赐福ê。」
26:30 以撒to̍h为in设宴席，in to̍h食就lim。
26:31 透早起来，大家互相chiùchōa。以撒送in出发，in to̍h安然离开伊去。
26:32 Siâng hit日，以撒ê奴仆来，kā in开井ê tāichì通知伊，讲：「阮得tio̍h水à。」
26:33 伊to̍hka7 hit口井ê名叫做示巴，所以，到今á日，hitê城ê名叫做别是巴。
26:34 以扫有两 个外邦Bó͘
以扫四十岁ê时，娶赫人Be-lī ê chabó͘ kiáⁿ Iû-tit，kah赫人以伦 ê chabó͘ kiáⁿ巴实抹做bó͘。
26:35 Chit两 个chabó͘人tiāⁿ-tiāⁿ hō͘以撒kah利百加心内大忧闷。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。