士师记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
21:1 为便雅悯支族ê人Chhōe Bó͘
以色列人tī米斯巴bat chiùchōa讲：「阮中间无kah一个人ē kā chabó͘ kiáⁿ嫁hō͘便雅悯人。」
21:2 人民来到伯特利，tī hia坐tī上主ê面前到ê-hng，出声大啼哭，讲：
21:3 「上主—以色列ê上帝ah，今á日，tī以色列中减一支族，以色列中ná ē有chit款tāichì？」
21:4 隔tńg工天光早起，人民起来，tī hia起一座坛，献烧祭kah平安祭。
21:5 以色列人讲：「Tī以色列众支族中，啥人无kah会众去上主hia？」因为in大chiùchōa讲：「见若无上米斯巴到上主ê面前ê，tio̍h hō͘伊死。」
21:6 以色列人为tio̍h in ê兄弟便雅悯人后悔，讲：「今á日，以色列中断绝一支族à。
21:7 咱已经kí上主来chiùchōa，无beh kā chabó͘ kiáⁿ嫁hō͘ in，taⁿ就in所chhun落来ê人，咱beh tùi tó位hō͘ in有bó͘？」
21:8 Koh讲：「以色列chiahê支族中，tó一个无上米斯巴到上主hia？In就查出基列雅比无kah一个人来到营内会众hia，
21:9 因为点算人民ê时，hiahê tòa tī基列雅比ê人，无kah一个tī hia。
21:10 会众to̍h差一万二千个有大力ê勇士，kā in吩咐讲：「Lín去用刀thâi死tòa tī基列雅比ê人，以及chabó͘人kah gín-á。
21:11 Lín所tio̍h行ê to̍h是ánne：Tio̍h kā所有ê chapo͘人，以及hiahê bat kah chapo͘人同房ê chabó͘人，全部thâi死。」
21:12 In tī基列雅比人ê中间tú tio̍h四百ê iáu未kah chapo͘人同房ê在室女，to̍h kā in chhōa来到迦南地示罗ê军营。
21:13 全会众差人kā临门石磐ê便雅悯人讲，用和平ê话报in。
21:14 Hit时，便雅悯人tńg来，以色列人to̍h kā所留hō͘她活ê基列雅比ê chabó͘ gín-á嫁hō͘ in，iáu koh无够额。
21:15 人民为tio̍h便雅悯人to̍h后悔，因为上主hō͘以色列支族khih一角。
21:16 会中ê长老讲：「便雅悯中间ê chabó͘人已经剿灭，taⁿ就in所chhun落来ê人，咱beh tùi tó位来hō͘ in有bó͘？」
21:17 Koh讲：「便雅悯逃走ê人犹原tio̍h有业hō͘ in，免得以色列中断绝一支族。
21:18 总是，咱bē tàng kā kakī ê chabó͘ gín-á hō͘ in做bó͘，因为以色列人bat chiùchōa讲，kā chabó͘ kiáⁿ嫁hō͘便雅悯人ê，tio̍h受咒诅。」
21:19 In koh讲：「Tī Lī-pho-ná ê南pêng，伯特利ê北pêng，to̍h是tùi伯特利去示剑大路东pêng ê示罗，ta̍k年有上主ê节期。」
21:20 to̍h吩咐便雅悯人讲：「Lín tio̍h去bih tī葡萄园中，
21:21 若看tio̍h示罗ê chabó͘ gín-á出来跳舞，lín tio̍h tùi葡萄园出来，tī示罗ê女子中ta̍k人抢一个做bó͘，倒tńg去便雅悯地。
21:22 In ê父老兄弟若来对阮告诉，阮会对in讲：『请lín带念tio̍h阮，来对in施恩典，因为早前交战ê时，无留chabó͘ gín-á hō͘ in ta̍k人做bó͘。Taⁿ mā m̄是lín hō͘ in；若是，lín to̍h有罪。』」
21:23 便雅悯人to̍h照ánne行，照in ê人额tùi跳舞ê chabó͘ gín-á中间所掠ê来娶in做bó͘，to̍h倒tńg去in本地，koh起城来tòa tī hia。
21:24 Hit时，以色列人离开hia，ta̍k人倒tńg去in ê支族，in ê宗族；tùi hia出来ê ta̍k人lóng tńg去in本地。
21:25 Hit当时，以色列中无王，ta̍k人照伊所看做tio̍h ê来行。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。