创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
21:1 以撒ê出世
上主照他以前所讲ê话照顾撒拉，上主就ánne照他所讲ê来完成对撒拉ê应允。
21:2 亚伯拉罕年老ê时，撒拉怀孕；到上帝对伊讲ê日期，to̍h kā伊生一个kiáⁿ。
21:3 亚伯拉罕kā撒拉所生ê kiáⁿ号名叫做以撒。
21:4 以撒出世八日，亚伯拉罕照上帝所吩咐ê kā伊ê kiáⁿ行割礼。
21:5 伊ê kiáⁿ以撒出世ê时，亚伯拉罕一百岁。
21:6 撒拉讲：「上帝hō͘我欢喜笑，见若听tio̍h chitê tāichì ê人，lóng beh kah我做伙欢喜笑。」
21:7 她koh讲：「啥人beh tāi先去kā亚伯拉罕讲：『撒拉beh hō͘婴á suh奶』？因为tī伊年老ê时，我kā伊生一个kiáⁿ？」
21:8 Gín-á渐渐大汉，to̍h断奶。以撒断奶ê日，亚伯拉罕排设大宴席。
21:9 夏甲kah以实玛利Hông赶出
Hit当时，埃及人夏甲kah亚伯拉罕所生ê kiáⁿ teh sńg笑，hō͘撒拉看tio̍h，
21:10 撒拉to̍h对亚伯拉罕讲：「Τio̍h kā chitê女婢kah她ê kiáⁿ赶出去，因为女婢ê kiáⁿ bē tàng kah我ê kiáⁿ以撒仝款做你ê后嗣。」
21:11 亚伯拉罕因为伊ê kiáⁿ ê缘故，不止忧闷。
21:12 上帝kā亚伯拉罕讲：「你m̄ thang为tio̍h chitê gín-á以及你ê女婢忧闷，见若撒拉对你讲ê，你lóng tio̍h听，因为tùi以撒生ê，chiah beh叫做你ê kiáⁿ孙。
21:13 关系女婢ê kiáⁿ，我mā beh hō͘伊成做一国，因为伊mā是你生ê。」
21:14 亚伯拉罕早早起来，the̍h饼kah一皮袋ê水hō͘夏甲，hē tī她ê肩胛头顶，连gín-á mā kah她去。她to̍h离开，来到别是巴ê旷野，to̍h行无路。
21:15 皮袋内ê水用了，夏甲to̍h kā gín-á放tī细欉树脚。
21:16 kakī 行开，行到差不多射一支箭ê远，kah gín-á相对面teh坐，讲：「我mm̄甘看gín-á死。」to̍h出声大啼哭。
21:17 上帝听tio̍h gín-á ê声，上主ê使者tùi天顶叫夏甲讲：「夏甲，你有啥物tāichì？M̄免惊！上主已经听tio̍h gín-á tī hia teh哭ê声。
21:18 起来！Mā hō͘ gín-á起来，用你ê手kā伊牵teh，我beh hō͘伊成做大国。」
21:19 上帝开她ê目chiu ，她随时看tio̍h水井，to̍h kā皮袋贮水贮到满满，续hō͘ gín-á lim。
21:20 上帝kah gín-á同在，伊to̍h渐渐大汉。伊tiàm tī旷野，成做射箭ê人。
21:21 伊tòa tī巴兰ê旷野，伊ê老母tùi埃及地kā伊娶一个bó͘。
21:22 亚伯拉罕kah亚比米勒定约
Hit当时，亚比米勒kah伊ê军长Pi-kol对亚伯拉罕讲：「见若你所行ê tāichì，上主kah你同在。
21:23 Taⁿ你tī chia tio̍h kí上主kah我chiùchōa，m̄ thang欺负我kah我ê kiáⁿ，以及我ê孙。我án怎好款待你，你mā tio̍h照ánne款待我，以及你所寄脚ê所在。」
21:24 亚伯拉罕讲：「我beh chiùchōa。」
21:25 早前亚比米勒ê奴仆霸占一口水井，亚伯拉罕为tio̍h chitê tāichì对亚比米勒埋怨。
21:26 亚比米勒讲：「啥人做chitê tāichì我m̄知，你mā无kā我讲，到今á日我chiah听tio̍h。」
21:27 亚伯拉罕kā羊kah牛hō͘亚比米勒，两人to̍h做伙立约。
21:28 亚伯拉罕kā七只母ê羊羔另外放tī一个所在。
21:29 亚比米勒问亚伯拉罕讲：「你kā七只母ê羊羔另外放tī一个所在，是啥物意思？」
21:30 亚伯拉罕应讲：「你tio̍h tùi我ê手收chit七只母ê羊羔，做我开chit口井ê证据。」
21:31 所以，hit所在叫做别是巴，因为in两人tī hia有chiùchōa。
21:32 In tī别是巴立约，亚比米勒to̍h kah伊ê军长Pi-kol出发tńg去腓利士地。
21:33 亚伯拉罕tī别是巴栽一欉垂丝柳树，koh tī hia求叫上主—永远tī ・leh ê上帝ê名。
21:34 亚伯拉罕tī腓利士人ê地寄脚真chē日。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。