申命记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
5:1 十条诫
（出20：1-17）
摩西叫以色列人民来，对in讲：「以色列人，lín tio̍h听我今á日所传hō͘ lín听ê律例kah法度，hō͘ lín thang学习，koh执守来行。
5:2 上主—咱ê上帝tī何烈kah咱立约。
5:3 上主无kah咱ê祖先立chitê约，是kah咱chiahê，to̍h是kah咱今á日所有活tī chia ê人立ê。
5:4 上主tī山顶，tùi火中面对面kah lín讲话。
5:5 (Hit时，我khiā tī上主kah lín ê中间，beh kā上主ê话传hō͘ lín，因为lín为tio̍h hitê火来惊，无上山。)
5:6 「上主讲：『我是上主—你ê上帝，bat chhōa你tùi埃及地，tùi做奴隶ê家出来ê。
5:7 「『我以外你m̄ thang有别个神明。
5:8 「『M̄-thang为kakī 雕刻偶像，无论天顶、地下kah地下水内所有ê物，lóng m̄ thang妆in ê像。
5:9 M̄-thang kā in跪拜，mā m̄ thang kā in服事，因为我—上主—你ê上帝，绝对m̄容允用别个神明kah我匹配。怨恨我ê人，我归咎伊ê罪，tùi父到kiáⁿ，到三四代。
5:10 疼我koh遵守我诫命ê人，我ē施恩hō͘伊，一直到千代。
5:11 「『M̄-thang lāmsám称上主—你ê上帝ê名，因为lāmsám称他ê名ê人，上主一定无掠伊做无罪。
5:12 「『Tio̍h守安息日，掠它做圣，照上主—你ê上帝所命令你ê。
5:13 六日内tio̍h劳苦做你一切ê工。
5:14 独独第七日，to̍h是ǹg上主—你ê上帝来守ê安息，chit日，你kah你ê kiáⁿ儿、奴仆、女婢、牛、驴、chengseⁿ，以及tòa tī你中间ê出外人，一切ê工lóng m̄ thang做，hō͘你ê奴仆kah女婢thang亲像你来安息。
5:15 你mā tio̍h ē记得你以前tī埃及地做奴仆，上主—你ê上帝用大权能ê手，伸出来ê手骨，chhōa你tùi hia出来，因为ánne，上主—你ê上帝命令你tio̍h守安息日。
5:16 「『Tio̍h孝敬你ê老父，你ê老母，照上主—你ê上帝所命令你ê，hō͘你tī上主—你ê上帝所赏赐hō͘你ê所在，日子久长，来享受福气。
5:17 「『M̄-thangthâi死人。
5:18 「『Mā m̄ thang行奸淫。
5:19 「『Mā m̄ thang偷the̍h。
5:20 「『Mā m̄ thang做假ê见证，来陷害你ê厝边。
5:21 「『Mā m̄ thang贪你ê厝边ê bó͘，mā m̄ thang贪你ê厝边ê厝kah伊ê田园，伊ê奴仆、伊ê女婢、伊ê牛、伊ê驴á kah你ê厝边一切所有ê。
5:22 「Chiahê话是上主tī山顶，tùi火中、云中、乌暗中，大声吩咐lín全会众ê，mā无koh加添。他mā kā in写tī两块石碑，交带我。」
5:23 人民Phi̍h-phi̍h-chhoah
(出20：18-21)
「Hit时，火焰烧tī山里，lín听tio̍h hitê tùi乌暗中出来ê声，lín支族所有ê首领kah长老lóng来见我。
5:24 Lín讲：『你看，上主—咱ê上帝显明他ê荣光kah他ê至大hō͘阮看，阮koh听tio̍h他ê声音tùi火中出来。今á日，阮mā知影上主kah人讲话，人iáu会活。
5:25 Taⁿ阮m̄免tio̍h死kám m̄是？因为chitê大火ē kā阮烧灭，阮若koh听tio̍h上主—咱ê上帝ê声，to̍h ē死。
5:26 因为见若有肉体ê，啥人亲像阮听tio̍h永远活命ê上帝tùi火中讲话ê声，iáu koh ē活leh？
5:27 你tio̍h进前去，听上主—咱ê上帝所beh讲一切ê话，kā上主所对你讲一切ê话，你tio̍h对阮讲，阮beh听mā beh ánne行。』
5:28 「Lín对我讲话，上主听tio̍h lín讲话ê声，上主对我讲：『我有听tio̍h chiahê人民讲话ê声，to̍h是in所对你讲ê；in所讲ê话lóng好。
5:29 愿in存chit款ê心来敬畏我，tiāⁿ-tiāⁿ 守我所有ê诫命，thang hō͘ in kah in ê kiáⁿ孙永远得tio̍h福气。
5:30 你去kā in讲：Lín做lín tńg去lín ê布棚！
5:31 若是你，你tio̍h khiā tī我chia，我beh kā你所tio̍h教示in ê一切诫命、律例、法度，kā你讲，hō͘ in tī我所赏赐hō͘ in做产业ê地ánne来行。』
5:32 「所以，lín tio̍h照上主—lín ê上帝所命令lín ê，tio̍h执守来照ánne行，m̄ thang偏左，mā m̄ tio̍h偏右。
5:33 上主—lín ê上帝所命令lín ê路，lín lóng tio̍h照ánne行，hō͘ lín活leh，得tio̍h福气，mā hō͘ lín tī lín所beh承接ê地ê日子，得tio̍h久长。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。