民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
23:1 巴兰对巴勒讲：「你tī chia kā我起七座坛，kā我准备七只牛káng，七只羊káng。」
23:2 巴勒照巴兰ê话来行；巴勒kah巴兰tī ta̍k座ê坛，献一只牛káng，一只羊káng。
23:3 巴兰对巴勒讲：「你khiā tī你烧祭ê边á，我暂且进前去，kiámchhái上主来tú tio̍h我；他指示我啥物，我ē kā你讲。」巴兰to̍h去无草木ê山。
23:4 上帝tú tio̍h巴兰，巴兰对他讲：「我已经准备七座坛，tī ta̍k座坛献一只牛káng，一只羊káng。」
23:5 上主用话交带巴兰，koh kā伊讲：「你tńg去巴勒hia，tio̍h ánne kā伊讲。」
23:6 伊to̍htng2去巴勒hia，看tio̍h伊kah摩押ê首领lóng khiā tī伊烧祭ê边á。
23:7 巴兰就提起伊ê歌，讲：巴勒chhōa我tùi亚南来，摩押王chhōa我出东pêng ê山，讲：来！kā我咒诅雅各； 来！咒骂以色列。
23:8 上帝无咒诅ê，我ná ē咒诅？上主无咒骂ê，我ná ē咒骂？
23:9 因为我tùi chiahê山岩看，koh tùi山尾溜观看，你看，chiahê人民beh kakī tòa。无列tī chiahê国ê中间。
23:10 啥人ē tàng算雅各ê土沙？啥人ē tàng算以色列ê四分之一？我愿亲像义人ê死来死，mā亲像伊ê结局来结局。
23:11 巴勒对巴兰讲：「你对我做ê是啥物？我叫你来咒诅我ê对敌，你看，你lóng是kā in祝福。
23:12 巴兰应讲：「上主所交带我ê话，我kám免tio̍h谨慎来讲？」
23:13 巴兰第二pái ê预言
巴勒对伊讲：「求你kah我去别位，tī hia thang看tio̍h in，你只有会看tio̍h in ê一角头，bē tàng 所有看tio̍h；tī hia tio̍h 为我kā in咒诅。」
23:14 Tùi hit时，巴勒to̍h chhōa巴兰到Só-hui ê山野，上毗斯迦ê山头，起七座坛，ta̍k座坛献一只牛káng，一只羊káng。
23:15 巴兰对巴勒讲：「你tòa chia，khiā tī你烧祭ê边á，thèng候我去hia见上主。」
23:16 上主tú tio̍h巴兰，用话交带伊，koh讲：「你tńg去巴勒hia，tio̍h ánne讲。」
23:17 伊to̍htng2去巴勒hia，看tio̍h伊khiā tī烧祭ê边á，摩押ê首领mā kah伊tī hia。巴勒问伊讲：「上主kám有讲啥物话？」
23:18 巴兰就提起伊ê歌，讲：巴勒，起来听；西拨 ê kiáⁿ，你àⁿ耳孔来听我。
23:19 上帝m̄是亲像人，ē讲白贼， mā m̄是人ê kiáⁿ，会后悔；他已经讲：kám无行？他讲出，kám无应验？
23:20 你看，我奉命祝福，他所应允ê福气，我bē kā它péng倒tńg。
23:21 他无看tio̍h雅各有过失，tī以色列无看tio̍h有奸恶， 上主—伊ê上帝kah伊同在；tī in中间有oló王ê声。
23:22 上帝chhōa in出埃及；in亲像有野牛ê力。
23:23 雅各中绝对无法术，以色列中mā无占卜；到时论起雅各kah以色列beh讲：上帝行hiahni̍h大ê tāichì！
23:24 你看，chiahê人民起来亲像母ê狮， 挺身亲像公ê狮； iáu未食所la̍k tio̍h ê物，iáu未lim受咬死ê ê血， 决断无倒teh。
23:25 巴勒对巴兰讲：「你lóng m̄ thang kā in咒诅，mā m̄ thang kā in祝福。」
23:26 巴兰应巴勒讲：「我kám无kā你讲，见若上主所讲ê，我beh遵thàn？」
23:27 巴兰第三pái ê预言
巴勒对巴兰讲：「来！我chhōa你去别所在，kiámchhái上主欢喜你tī hia为我kā in咒诅。」
23:28 巴勒to̍h chhōa 巴兰到hitê看落去，会看tio̍h旷野ê毗珥 ê山顶。
23:29 巴兰对巴勒讲：「你tī chia kā我起七座坛，koh tī chia kā我准备七只牛káng，七只羊káng。」
23:30 巴勒就照巴兰ê话去行，tī ta̍k座坛献一只牛káng，一只羊káng。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。