民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
20:1 加低斯事件
(出17：1-7)
正月间，以色列全会众来到寻ê旷野，人民就tòa tī加低斯。米利暗死tī hia，就埋葬tī hia。
20:2 会众无水thang lim，in to̍h聚集óa来攻击摩西kah亚伦。
20:3 人民to̍h kah摩西计较，讲：「前阮ê兄弟死tī上主ê面前，阮不如 hit时续死。
20:4 Lín ná ē chhōa上主ê会众到chitê旷野，hō͘阮kah阮ê chengseⁿ死tī chia？
20:5 Lín ná ē hō͘阮出埃及，chhōa阮到chitê pháiⁿ所在？无所在thang掖种，mā无无花果，无葡萄，无石榴，koh无水thang lim。
20:6 摩西kah亚伦离开会众来到会幕门口，仆tī地里；上主ê荣光对in显现。
20:7 上主吩咐摩西讲：
20:8 「你tio̍h gia̍h 拐á，你kah你ê阿兄亚伦招集会众；tī in ê目chiu 前，lín命令石磐出水，你为tio̍h人民hō͘水tùi石磐出来，hō͘会众kah in ê chengseⁿ有水thang lim。」
20:9 摩西遵thàn命令，tī上主ê面前gia̍h 拐á。
20:10 摩西kah亚伦招集会众来到石磐前，摩西对in讲：「Lín chiahê悖逆ê人tio̍h听！阮tio̍h hō͘水tùi chitê石磐流出来hō͘ lín lim，是无？」
20:11 摩西kā手gia̍h起来，用拐á phah石磐两下，to̍h有真chē水流出来，会众kah in ê chengseⁿ lóng lim水。
20:12 上主to̍h对摩西kah亚伦讲：「因为lín m̄信我，无tī以色列人ê目chiu 前尊敬我做圣，所以，lín bē tàng chhōa chiahê ē众入去我所赐hō͘ in ê地。」
20:13 Chiahê水名叫做米利巴ê水，是因为以色列人kah上主计较，上主to̍h对in显明kakī 做圣。
20:14 以东王M̄准以色列人通过
摩西tùi加低斯差派使者去见以东王，讲：「你ê兄弟以色列ánne讲：『你知阮所tú tio̍h一切ê艰苦，
20:15 阮ê祖先落去埃及，阮tòa tī埃及真久；埃及人pháiⁿ款待阮kah阮ê祖先。
20:16 阮哀求上主ê时，他听阮ê声，差遣使者chhōa阮出埃及，taⁿ阮tī你极边á ê城加低斯。
20:17 求你容允阮经过你ê地，阮无beh tùi田园kah葡萄园经过，mā无lim chiahê井ê水，独独行大路，无偏左偏右，直直经过你ê地界。』」
20:18 以东王讲：「你m̄ thang tùi我chia经过，免得我gia̍h刀出来抵敌你。」
20:19 以色列人kā伊讲：「阮beh tùi大路行去；设使阮kah chengseⁿ lim你ê水，阮会还你价钱；准我行过去，mài chhap别项。」
20:20 以东王koh讲：「你m̄ thang经过。」以东王to̍h chhōa真chē人出来，用giám硬ê手kā伊抵敌。
20:21 Án-ne，以东m̄准以色列人tùi伊ê地界经过；以色列to̍h oa̍t-tńg离开伊。
20:22 亚伦ê死亡
In tùi加低斯出发，以色列ê全会众来到何珥山。
20:23 上主tī óa近以东边界ê何珥山，吩咐摩西kah亚伦讲：
20:24 亚伦teh beh死亡，因为伊bē tàng入去我赏赐以色列人ê地，因为tī米利巴ê水lín违背我ê命令。
20:25 你chōa亚伦kah伊ê kiáⁿ以利亚撒上去何珥山，
20:26 thǹg亚伦ê衫，kā伊ê kiáⁿ以利亚撒穿；亚伦ē死tī hia，tńg去祖家。」
20:27 摩西照上主所命令ê去行，in三人当会众ê目chiu 前上去何珥山。
20:28 摩西thǹg亚伦ê衫，kā伊ê kiáⁿ以利亚撒穿，亚伦tī hia死tī山顶。然后摩西kah以利亚撒落山。
20:29 会众看tio̍h亚伦已经死，to̍h为亚伦啼哭三十工；以色列全家mā lóng ánne。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。