民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
18:1 祭司kah利未人ê职责
上主对亚伦讲：「你kah你chiahê kiáⁿ，kah你ê本族，tio̍h做伙担当圣所ê罪；你kah你chiahê kiáⁿ mā tio̍h担当lín祭司职ê罪。
18:2 你tio̍h chhōa你ê兄弟利未ê支族，你ê祖先ê支族，进前来，hō͘ in kah你联合来侍候你；m̄ koh，你kah你ê kiáⁿ，lóng tio̍h tī法柜ê会幕前。
18:3 In tio̍h做你ê差用，mā tio̍h做布棚ê差用，独独m̄ thang óa近圣所ê器具kah坛，免得in kah lín lóng死。
18:4 In tio̍h kah你联合，mā tio̍h做会幕ê差用，料理布棚所有ê工；总是，外面人m̄ thang óa近lín。
18:5 Lín tio̍h做圣所ê差用，kah坛ê差用，免得受气koh到tī以色列人。
18:6 你看，我bat tùi以色列人ê中间拣选lín ê兄弟利未人，来赏赐hō͘ lín，kah归上主，来料理会幕ê工。
18:7 所以，你kah你ê kiáⁿ tio̍h做伙守祭司ê职，料理坛kah帐帘内所有ê工。Lín tio̍h ánne服务，我已经亲像送物件hō͘ lín来赏赐hō͘你祭司职责ê工。见若外面人近óa-ê，一定hō͘伊死。
18:8 祭司应得ê物
上主koh kā亚伦讲：「你看，我已经用献hō͘我ê举祭，to̍h是以色列人分别做圣ê物，交你来保守；因为你受抹油，chiahê物归你kah你ê kiáⁿ孙，做永远ê份额。
18:9 无经过火，至圣ê物ê中间，属tī你ê是chiahê：见若in ê礼物，in ê素祭，in ê赎罪祭，in ê补过失祭，in所献hō͘我ê，lóng做至圣，归hō͘你kah你ê kiáⁿ孙。
18:10 你tio̍h看chiahê物做至圣来食，见若chapo͘丁lóng thang食，你tio̍h掠chitê物做圣。
18:11 「Chiahê mā是你ê，礼物ê举祭以及以色列人所献ê摇祭，我lóng赏赐hō͘你kah你ê kiáⁿ儿，做永远ê份额；见若tī你厝内清气ê人lóng thang食。
18:12 「Siōng好ê油，siōng好ê酒，siōng好ê五谷，to̍h是in起头熟献hō͘上主ê，我lóng赏赐hō͘你。
18:13 In ê地起头熟ê物，所献hō͘上主ê，lóng归hō͘你；你厝内清气ê人lóng thang食。
18:14 「以色列中所有分别做圣献hō͘我ê，lóng tio̍h归hō͘你。
18:15 「见若有肉体头chiūⁿ生ê，无论人á是chengseⁿ，in所献hō͘上主ê，lóng归tī你；总是，人头chiūⁿ生ê你tio̍h kā伊赎回；无清气ê chengseⁿ头chiūⁿ生ê，你mā tio̍h kā它赎回。
18:16 Tī满月以外所tio̍h赎回ê，tio̍h照你所估ê价，照圣所ê舍客勒，用银五舍客勒kā伊赎回；一舍客勒是二十季拉。
18:17 总是，头chiūⁿ生ê牛，头chiūⁿ生ê绵羊，头chiūⁿ生ê山羊，你m̄ thang赎回；这是圣，tio̍h hiù它ê血tī坛里，tio̍h烧它ê油做火祭，做芳芳ê祭献hō͘上主。
18:18 Hiahê肉归tī你，亲像所摇ê胸kah正腿归tī你相siâng。
18:19 「见若圣物ê举祭，是以色列人献hō͘上主ê，我lóng赏赐hō͘你kah你ê kiáⁿ儿，做永远得tio̍h ê份额；这是hō͘你kah你ê kiáⁿ孙，tī上主ê面前，做永远bē废无ê约。
18:20 上主对亚伦讲：「你tī in ê所在m̄ thang有产业，tī in ê中间mā m̄ thang有份额；tī以色列人中，我to̍h是你ê份额，是你ê产业。」
18:21 利未人应得ê物
上主讲：「你看，tī以色列中所抽ê十分之一，我已经赏赐利未ê kiáⁿ孙做产业；因为in所做ê工是会幕ê工，所以，赏赐hō͘ in，来报答in ê劳苦。
18:22 Tùi taⁿ以后，以色列人m̄ thang óa近会幕，免得in担当罪来死。
18:23 独独利未人tio̍h做会幕ê工，担当in ê罪，这beh做lín ta̍k世代永远ê例。In tī以色列人ê中间m̄ thang有产业；
18:24 因为以色列人所抽ê十分之一，所献hō͘上主做举祭ê，我已经赏赐利未人做产业，所以，我对in讲：『In tī以色列人ê中间m̄ thang有产业。』」
18:25 利未人ê十分之一
上主吩咐摩西讲：
18:26 「你tio̍h吩咐利未人，kā in讲：Lín tùi以色列人ê中间抽十分之一，to̍h是我hō͘ lín做产业ê；hit时lín tio̍h tùi hitê十分之一ê中间koh抽十分之一做举祭，献hō͘上主。
18:27 你ê举祭beh kā lín算做稻埕ê麦，kah满tī葡萄窟ê酒。
18:28 Án-ne，lín tùi以色列中所得tio̍h ê十分之一，tio̍h tùi hitê献举祭献hō͘上主；lín tio̍h tùi hitê，用上主ê举祭hō͘祭司亚伦。
18:29 Lín所得tio̍h一切ê礼物，tio̍h tùi hit中间，kā siōng好ê，to̍h是分别做圣ê份额，献hiahê举祭hō͘上主。
18:30 所以，你tio̍h对in讲：Lín已经tùi hit中间举起hitê至好ê，这to̍h是kā利未人算做稻埕ê五谷，mā亲像酒窟ê酒。
18:31 Lín kah lín ê家眷，ta̍k所在lóng thang食；这是lín ê工钱，是报答lín tī会幕内所做ê工。
18:32 Lín已经tùi hit中间举起hitê至好ê，to̍h无因为ánne来犯罪；lín m̄ thang òe lahsap以色列人ê圣物，免得lín死亡。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。