创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
17:1 立约ê记号—割礼
亚伯兰九十九岁ê时，上主对亚伯兰显现，kā伊讲：「我是全能上帝，你tī我ê面前行为tio̍h完全，
17:2 我to̍h beh kah你立我ê约，hō͘你ê kiáⁿ孙非常chē。」
17:3 亚伯兰to̍h仆落tī地里；上帝koh kah伊讲话，讲：
17:4 「我kah你立我ê约，你ē做真chē国ê父。
17:5 Tùi taⁿ以后，你ê名无koh叫做亚伯兰，是beh叫做亚伯拉罕，因为我已经立你做真chē国ê父。
17:6 我beh hō͘你ê kiáⁿ孙非常chē；国度ē tùi你来立，君王ē tùi你来出。
17:7 「我beh kah你，以及你历代ê kiáⁿ孙，设立我ê约做永远ê约；我beh做你kah你ê kiáⁿ孙ê上帝。
17:8 我ē kā你现在出外寄脚ê地，to̍h是迦南全地，赏赐hō͘你kah你ê kiáⁿ孙，做永远ê产业；我mā beh做in ê上帝。」
17:9 上帝koh对亚伯拉罕讲：「你kah你ê kiáⁿ孙，tio̍h历代遵守我ê约。
17:10 Lín中间所有ê chapo͘ ê，lóng tio̍h受割礼；这to̍h是我kah你以及你ê kiáⁿ孙所立ê约，是lín所tio̍h遵守ê。
17:11 Lín tio̍h割lín阳物ê皮，这是beh做我kah lín所立ê约ê记号。
17:12 Lín历代ê chapo͘ ê，无论厝内生ê，á是你ê kiáⁿ孙以外用银tùi外面ê人买来ê，出世了后第八日，lóng tio̍h受割礼。
17:13 你厝内生ê kah你用银买来ê，lóng一定tio̍h受割礼。Án-ne，我ê约beh hē tī lín ê身上，做永远ê约。
17:14 无受割礼ê chapo͘ ê，伊身躯既然无受割礼，是违背我ê约，一定tio̍h tùi人民ê中间除去。」
17:15 上帝koh对亚伯拉罕讲：「你ê bó͘撒莱，m̄ thang koh kā她叫做撒莱，她ê名beh改叫做撒拉。
17:16 我ē赐福hō͘她，我mā ē hō͘你tùi她得tio̍h一个kiáⁿ。我ē赐福hō͘她，她mā ē做列国ê老母；ē有邦国ê王tùi她出。」
17:17 亚伯拉罕to̍h仆teh笑，心内想讲：「一百岁 ê人kám iáu会生kiáⁿ？撒拉已经九十岁ā，kám iáu会生kiáⁿ？」
17:18 亚伯拉罕对上帝讲：「但愿以实玛利活tī祢ê面前。」
17:19 上帝讲：「M̄是lah，你ê bó͘撒拉ē kā你生一个kiáⁿ，你ē kā伊号名叫做以撒。我ē kah伊设立我ê约，做伊ê kiáⁿ孙永远ê约。
17:20 关系以实玛利，我mā有听你求；你看！我已经kā伊赐福，beh hō͘伊兴旺，加添非常chē。伊ē生十二个族长，我mā beh hō͘伊成做大国。
17:21 到明年ê chit时，撒拉ē kā你生以撒，我ē kah伊设立我ê约。」
17:22 上帝kah亚伯拉罕讲soah，to̍h离开伊，上天去。
17:23 Tú-tú hit日，亚伯拉罕照上帝所kā伊讲ê，kā伊ê kiáⁿ以实玛利kah亚伯拉罕厝内一切ê chapo͘人，无论tī厝内生ê，á是用伊ê银买来ê lóng行割礼。
17:24 亚伯拉罕受割礼ê时，九十九岁。
17:25 伊ê kiáⁿ以实玛利受割礼ê时，十三岁。
17:26 Tú-tú hit日，亚伯拉罕kah伊ê kiáⁿ以实玛利同受割礼。
17:27 厝内所有ê人，无论tī厝内生ê，á是用银tùi外面ê人买来ê，lóng kah伊同齐受割礼。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。