民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
10:1 银ê鼓吹
上主吩咐摩西讲：
10:2 「你tio̍h用银phah两支鼓吹，用phah ê法来做，hō͘你用来聚集会众，mā thang叫ta̍k营出发。
10:3 Pûn鼓吹ê时，全会众tio̍h到你hia，聚集tī会幕门口。
10:4 若kantaⁿ pûn一支，众首领，to̍h是以色列ê族长，tio̍h聚集到你hia。
10:5 Pûn大声ê时，东pêng所安ê营lóng tio̍h出发。
10:6 第二pái pûn大声ê时，南pêng所安ê营tio̍h出发。In beh出发，一定tio̍h pûn大声。
10:7 若beh聚集会众，lín tio̍h pûn鼓吹，总是，m̄ thang pûn大声。
10:8 亚伦ê kiáⁿ孙做祭司ê，tio̍h pûn hiahê鼓吹。「这beh做lín代代永远ê例。
10:9 Lín tī本地kah欺压lín ê对敌交战，to̍h tio̍h用鼓吹pûn大声，to̍h tī上主—lín ê上帝ê面前得tio̍h记念，mā beh得tio̍h救来脱离lín ê对敌。
10:10 Mā tī lín快乐ê日kah节期，kah每月ê初一，是tī lín献烧祭kah谢恩祭ê时，mā tio̍h pûn鼓吹。这lóng beh tī lín ê上帝ê面前做记念，我是上主—lín ê上帝。」
10:11 以色列人出发
第二年ê二月二十，云tùi证据ê会幕收tńg去。
10:12 以色列人to̍h照in ê路程出发，离开西奈ê旷野，云停tī 巴兰ê旷野。
10:13 这是in照上主托摩西所命令ê，头一pái出发。
10:14 照in ê军队做头出发ê，是偤大族ê营ê大旗，军队ê统领是亚米拿达ê kiáⁿ拿顺。
10:15 以萨迦支族军队ê统领是苏押ê kiáⁿ拿坦业。
10:16 西布伦ê支族军队ê统领是希伦ê kiáⁿ以利押。
10:17 会幕to̍h拆起来，扛会幕ê是革顺ê kiáⁿ孙kah米拉利ê kiáⁿ孙，to̍h出发行。
10:18 照伊ê军队，流便营ê大旗出发，伊ê军队ê统领是示丢珥ê kiáⁿ以利蓿。
10:19 西缅支族军队ê统领是苏利沙代ê kiáⁿ示路蔑。
10:20 迦得支族军队ê统领是丢珥ê kiáⁿ以利雅萨。
10:21 哥辖人扛圣物ê出发行，in iáu未到ê chìn前，hiahê人ē幕已经搭好。
10:22 照伊ê军队，以法连营ê大旗出发，伊ê军队ê统领是亚米忽ê kiáⁿ以利沙玛。
10:23 玛拿西支族军队ê统领是比大蓿ê kiáⁿ迦玛列。
10:24 便雅悯支族军队ê统领是基多尼ê kiáⁿ亚比但。
10:25 做chiahê营ê路尾队ê，是但ê营ê大旗，照伊ê军队出发；伊ê军队ê统领是亚米沙代ê kiáⁿ亚希以谢。
10:26 亚设支族军队ê统领是俄兰ê kiáⁿ帕结。
10:27 拿弗他利支族军队ê统领是以南ê kiáⁿ亚希拉。
10:28 以色列人照军队ê排列出发，in ê队伍to̍h是ánne：
10:29 摩西对伊ê外戚米甸人流珥ê kiáⁿ Hô-pa讲：「阮beh去上主所bat讲：『我kā它赏赐hō͘ lín ê地。』请你kah阮做伙来去，阮会好款待你，因为上主已经应允赐福气hō͘以色列人。」
10:30 Hô-pa应讲：「我m̄去，我beh tńg去我ê本地本族hia。」
10:31 摩西讲：「求你m̄ thang离开阮，因为你知阮tī旷野tio̍h án怎扎营，你thang做阮ê目chiu 。
10:32 你若beh kah阮去，见若上主所hō͘阮ê福气，阮mā一定ánne hō͘你。」
10:33 以色列人kah约柜向前行
In离开上主ê山，出发行三日ê路程；上主ê约柜tī头前行三日ê路程，kā in chhōe安息ê所在。
10:34 In撤营出发，日时上主ê云tī in ê顶面。
10:35 约柜出发ê时，摩西to̍h讲：「上主ah，求祢起来；愿祢ê对敌四散，愿怨恨祢ê人tī祢ê面前逃走！」
10:36 约柜停ê时，伊to̍h讲：「上主ah，求祢tńg来到以色列千千万万人ê中间！」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。