民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
9:1 第二个Pôaⁿ过节
出埃及了后第二年ê正月,上主tī西奈旷野,命令摩西讲:
9:2 「以色列人应该tī定tio̍h ê日期守Pôaⁿ过节,
9:3 tī本月十四黄昏ê时,lín tio̍h tī所定tio̍h ê日来守,照他一切ê律例kah一切ê法度来守。」
9:4 就ánne,摩西吩咐以色列人守Pôaⁿ过节。
9:5 正月十四黄昏ê时,in to̍hti7西奈ê旷野,守Pôaⁿ过节;见若上主所命令摩西ê,以色列人lóng照ánne行。
9:6 有几nā个人hō͘人ê身尸bak tio̍h soah无清气,bē tàng tī hit日守Pôaⁿ过节。当hit日,in来到摩西kah亚伦ê面前。
9:7 Hiahê人kā in讲:「阮因为hō͘人ê身尸bak tio̍h soah无清气,án怎阻挡阮bē tàng tī以色列中,tī所定tio̍h ê日期献礼物hō͘上主?」
9:8 摩西kā in讲:「Lín khiā-teh thèng候,我beh听上主án怎kā lín吩咐。」
9:9 上主吩咐摩西讲:
9:10 「你tio̍h吩咐以色列人讲:Á是lín á是lín ê kiáⁿ孙ê中间,若有人hō͘身尸bak tio̍h soah无清气,á是远远tī路里,犹原tio̍h守上主ê Pôaⁿ过节。
9:11 In tio̍h tī二月十四黄昏ê时来守,chham无酵饼kah苦菜来食。
9:12 M̄-thang留一点á到隔工早起,羊á ê骨一支都m̄ thang phah断。In tio̍h照Pôaⁿ过节chiahê律例来守。
9:13 总是,人若清气mā m̄是tī路中,若kakī 推辞m̄守Pôaⁿ过节,tio̍h tùi伊ê人民中间kā hitê人剪除,因为伊tī所定tio̍h ê日无献礼物hō͘上主,hitê人tio̍h担当伊kakī ê罪。
9:14 「若有出外人寄脚tī lín中间,ài守上主ê Pôaⁿ过节,伊tio̍h照Pôaⁿ过节ê律例kah法度来行;出外人kah本地人tio̍h照仝一个律例来行。」
9:15 云彩
( 出40:34-38)
起会幕hit日,有云遮(cha̍h)tio̍h会幕,to̍h是证据ê布棚;tùi ê-hng到早起,有亲像火ê款式盖tī会幕。
9:16 tiāⁿ-tiāⁿ 是ánne,云遮teh,暗时亲像火ê款式。
9:17 云tùi布棚收tńg去,以色列人to̍h出发;云停ê所在,以色列人to̍h扎营tī hia。
9:18 以色列人照上主ê命令出发,mā照上主ê命令扎营;云停tī会幕顶ê时,in to̍h犹原扎营tī hia。
9:19 云tī会幕顶停真chē日,以色列人to̍h守上主所交带ê,无出发。
9:20 有时云tī会幕顶几nā日,in照上主ê命令犹原扎营tī hia,mā照上主ê命令出发。
9:21 有时tùi ê-hng到早起云遮teh,早起时云收tńg去,in to̍h出发;无论日时暗时,云收tńg去,in to̍h出发。
9:22 云停tī会幕,无论是两日á是一月日á是一年,以色列人犹原扎营tī hia,无出发;总是,云收tńg去,in to̍h出发。
9:23 In遵thàn上主ê命令扎营,mā遵thàn上主ê命令出发;in守上主所交带ê,lóng照上主托摩西所命令ê。
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。