民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
6:1 上主吩咐摩西讲：
6:2 「你tio̍h吩咐以色列人，kā in讲：无论男女hē特别ê愿，to̍h是献身者ê愿，tio̍h kakī 分别归hō͘上主。
6:3 伊to̍htioh8离开酒kah厚酒，mā m̄ thang lim啥物酒ê醋kah厚酒ê醋，m̄ thang lim啥物葡萄ê汁，mā m̄ thang食青ê葡萄kah干ê葡萄。
6:4 Tī所有kakī 分别做圣ê日，见若葡萄树所出ê，tùi核到皮lóng m̄ thang食。
6:5 「Tī伊下愿kakī 分别做圣hiahê日，m̄ thang hō͘剃头刀到伊ê头壳；到伊kakī 分别归hō͘上主ê日满，伊tio̍h做圣，chhut-chāi伊ê头毛发长。
6:6 Tī伊kakī 分别做圣归上主hiahê日，m̄ thang óa近身尸。
6:7 伊ê老父á是老母á是兄弟á是姊妹死ê时，伊m̄ thang为tio̍h in hō͘ kakī 无清气，因为伊kakī 分别做圣归上帝ê凭据是tī伊ê头壳。
6:8 Tī伊kakī 分别做圣hiahê日，伊是归tī上主来做圣。
6:9 「若tī伊ê身边忽然有人死，致使bak tio̍h伊kakī 分别做圣ê头壳，伊to̍htioh8 tī kakī 清气ê日剃头，to̍h是tī第七日剃头。
6:10 第八日，伊tio̍h用两只斑鸽 á是两只粉鸟kiáⁿ，带到会幕门口，交带祭司。
6:11 祭司tio̍h献一只做赎罪祭，一只做烧祭，kā伊赎罪，因为伊tùi身尸来有罪，koh tio̍h tī hit日hō͘伊ê头壳做圣。
6:12 伊tio̍h koh用伊分别做圣ê日，分别来归上主，koh tio̍h牵一只未满年ê羊káng-á，做补过失ê祭；总是，以前ê日无算数，因为伊kakī 分别做圣ê已经无清气。
6:13 「献身者kakī 分别做圣ê日满了后，hitê例to̍h是ánne；人tio̍h chhōa伊到会幕ê门口。
6:14 伊tio̍h kā伊ê礼物献hō͘上主，to̍h是一只无缺点未满年ê绵羊káng-á，做烧祭，一只无缺点未满年ê绵羊母á，做赎罪祭，koh用一只无缺点ê绵羊káng，做谢恩ê祭；
6:15 koh用一筐ê无酵饼，to̍h是调和油kah幼面粉做ê饼，kah抹油无酵ê薄饼，以及伊ê素祭，kah灌奠ê祭。
6:16 「祭司tio̍h the̍h chiahê到上主ê面前，来献hitê人ê赎罪祭kah烧祭。
6:17 伊mā tio̍h kā hit只羊káng kah hit筐无酵饼，献hō͘上主做谢恩ê祭，祭司mā tio̍h续献伊ê素祭kah灌奠。
6:18 献身者tio̍h tī会幕门口剃kakī 分别做圣ê头，kā kakī 分别做圣ê头毛hē tī谢恩祭下面ê火顶。
6:19 「献身者剃伊kakī 分别做圣ê头毛了后，祭司to̍h tio̍h取已经煮ê羊káng一支前腿，koh tùi筐á内the̍h一个无酵饼，kah一个无酵ê薄饼，lóng hē tī伊ê手。
6:20 祭司tio̍h the̍h chiahê做摇祭，摇tī上主ê面前；这kah所摇ê胸，所举ê腿，lóng做圣物，归hō͘祭司，然后献身者chiah thang lim酒。
6:21 「下愿ê献身者为tio̍h伊分别kakī 所献ê礼物做圣，kah伊以外所ē得tio̍h ê献hō͘上主，to̍h是chitê例。伊ánne下愿，to̍h tio̍h照分别kakī 做圣ê例来行。」
6:22 祭司ê祝福
上主吩咐摩西讲：
6:23 「你tio̍h吩咐亚伦kah伊ê kiáⁿ讲：Lín tio̍h ánne kā以色列人祝福，对in讲：
6:24 『愿上主kā你赐福，保护你。
6:25 愿上主hō͘他ê面ê光照你，施恩hō͘你。
6:26 愿上主欢喜ê面看你，赏赐hō͘你平安。』
6:27 Án-ne，in beh kā我ê名hē tī以色列人ê顶面，我mā beh赐福hō͘ in。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。