利未记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
20:1 死刑ê规定
上主吩咐摩西讲：
20:2 「你tio̍h koh对以色列人讲：见若以色列人á是tī以色列中寄脚ê出外人，用kakī ê kiáⁿ儿献hō͘摩洛ê，一定tio̍h hō͘伊死，hit地方ê人tio̍h用石头kā伊tìm死。
20:3 我mā beh对hitê人变面，kā伊tùi人民中间剪除，因为伊用kiáⁿ儿献hō͘摩洛，kā我ê圣所òe lahsap，亵渎我ê圣名。
20:4 Hitê人用kiáⁿ儿献hō͘摩洛，hit所在ê人若tèⁿ做无看tio̍h，mā无hō͘伊死，
20:5 我beh对hitê人kah伊ê家变面，kā伊kah所有tòe伊行邪淫ê，to̍h是kah摩洛行邪淫ê，lóng kā伊tùi人民中间剪除。
20:6 「人偏ǹg hō͘鬼附身ê kah行邪术ê，tòe in行邪淫，我beh对hitê人变面，kā伊tùi人民中间剪除。
20:7 所以，lín tio̍h kakī 圣洁来成圣，因为我是上主—lín ê上帝。
20:8 Lín tio̍h守我ê律例来做。我是hō͘ lín成圣ê上主。
20:9 「见若咒诅老父á是老母ê，一定tio̍h hō͘伊死；伊咒诅老父á是老母，伊ê罪tio̍h归tī伊ê身上。
20:10 「Kah别人ê bó͘行奸淫，to̍h是kah伊厝边ê bó͘行奸淫ê，奸夫kah淫妇一定tio̍h hō͘ in死。
20:11 人kah后母私通ê，to̍h是凌辱伊ê老父；in两人一定tio̍h hō͘ in死，in ê罪归tī in。
20:12 人kah新妇私通ê，一定tio̍h hō͘ in两人lóng死；in行逆伦ê tāichì，in ê罪归tī in。
20:13 人若亲像kah chabó͘人交合相siâng去kah chapo͘人交合，in两人行可恶ê tāichì；一定tio̍h hō͘ in死，in ê罪归tī in。
20:14 人若娶bó͘续娶bó͘ ê老母，to̍h是极pháiⁿ ê tāichì，tio̍h用火kā chit三个人烧死，免得lín中间有chit款ê pháiⁿ行为。
20:15 人kah兽交合，伊一定tio̍h死，mā tio̍h kā hit只兽thâi死。
20:16 Cha-bó͘人亲近兽来kah它交合，你tioh8thâi死hitê chabó͘人kah兽，一定tio̍h hō͘ in死，in ê罪归tī in。
20:17 「人若牵伊ê姊妹，无论同父á是同母ê，伊看她ê下身，她看伊ê下身，这是见笑ê tāichì；in tio̍h tī伊ê人民ê目chiu 前hông剪除。伊有露现伊ê姊妹ê下身，tio̍h担当伊ê罪。
20:18 Cha-bó͘人经期到，人若kah她同房，露现她ê下身，ánne，伊有露现chabó͘人ê血源，chabó͘人mā有露现伊ê血源，in两 个tio̍h tùi in ê人民中间hông剪除。
20:19 「老母ê姊妹á是老父ê姊妹，m̄ thang露现in ê下身，ánne to̍h是凌辱骨肉ê亲，in tio̍h担当in kakī ê罪。
20:20 人若kah伊ê婶姆私通，to̍h是凌辱伊ê叔伯；in tio̍h担当in kakī ê罪，会一世人无kiáⁿ。
20:21 人娶兄弟ê bó͘，这是lahsap ê tāichì，伊有凌辱伊ê兄弟，in一定ē无kiáⁿ。
20:22 「所以，lín tio̍h守我一切ê律例kah我所有ê法度来行，免得我所chhōa lín去tòa ê地kā lín吐出去。
20:23 我tī lín ê面前所赶出ê人民，lín m̄ thang遵thàn in ê风俗，因为in行chiahê所有ê tāichì，所以，我讨厌in。
20:24 总是，我bat对lín讲：Lín会承接in ê地，我beh用hitê地赏赐hō͘ lín做产业，to̍h是流奶kah蜜ê地。我是上主—lín ê上帝，tùi 万民ê中间kā lín分别出来。
20:25 所以，lín tio̍h分别清气kah无清气ê兽，清气kah无清气ê鸟只；á是兽，á是禽，á是爬tī地里所有ê活物，我所kā lín分别做无清气ê，lín m̄ thang为tio̍h in致使kakī 做出thang讨厌ê tāichì。
20:26 Lín tio̍h归tī我来做圣，因为我是圣ê上主，tùi万民ê中间kā lín分别出来，来归tī我。
20:27 「有鬼附身á是行邪术ê，无论男女一定tio̍h hō͘伊死；人tio̍h用石头kā in tìm死，in ê罪tio̍h归tī in kakī 。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。