利未记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
19:1 圣洁kah正义ê诫命
上主吩咐摩西讲：
19:2 「你tio̍h吩咐以色列全会众对in讲：Lín tio̍h做圣，因为我—上主—lín ê上帝是圣。
19:3 Lín ta̍k人lóng tio̍h孝敬老母kah老父，mā tio̍h守我hiahê安息。我是上主—lín ê上帝。
19:4 Lín m̄ thang偏ǹg偶像，mā m̄ thang为kakī 铸造神明；我是上主—lín ê上帝。
19:5 Lín献谢恩祭hō͘上主ê时，tio̍h献thang得tio̍h接纳ê。
19:6 Tī献ê日á是隔日食祭物，若有chhun到第三日ê tio̍h用火烧掉。
19:7 第三日若koh食tio̍h，这是thang讨厌ê，bē tàng接纳。
19:8 凡若食hiahê祭物ê人，一定tio̍h担当伊ê罪过，因为伊亵渎上主ê圣物，hitê人一定tio̍h tùi伊ê人民中hông剪除。
19:9 「Lín收割田ê五谷，田ê角头m̄ thang割到尽，ka-la̍uh ê mā m̄ thang拾。
19:10 葡萄园果子m̄ thang挽了了，mā m̄ thang拾葡萄所lak ê果子，tio̍h留hō͘ sànchhiah人kah出外人。我是上主—lín ê上帝。
19:11 「Lín m̄ thang偷the̍h，m̄ thang欺骗，大家m̄ thang讲白贼。
19:12 Lín m̄ thang kí我ê名lâm-sám chiùchōa，来亵渎你ê上主ê名。我to̍h是上主。
19:13 「M̄-thang欺负你ê厝边，mā m̄ thang抢夺伊ê物，做工人ê工钱m̄ thang留tī你hia kui暝到天光。
19:14 M̄-thang骂臭耳聋ê，mā m̄ thang hē阻碍ê物tī chheⁿmê ・ê ê面前，tio̍h敬畏你ê上帝。我to̍h是上主。
19:15 「Lín审判m̄ thang无公道，m̄ thang偏袒sànchhiah人，mā m̄ thang看重有势力ê人，tio̍h照公道审判你ê厝边。
19:16 M̄-thang tī你ê人民ê中间四界行毁谤人，mā m̄ thang做见证ài害死你ê厝边。我to̍h是上主。
19:17 「你m̄ thang心内怨恨你ê兄弟，一定tio̍h责备你ê厝边，免得为tio̍h伊担当罪过。
19:18 M̄-thang报仇，mā m̄ thang埋怨你本国ê人民，tio̍h疼厝边亲像kakī 。我to̍h是上主。
19:19 「Lín tio̍h守我ê律例。M̄-thang hō͘ lín ê chengseⁿ kah无同类ê交合；m̄ thang用两样ê种籽参插掖tī你ê园地，m̄ thang用两样ê料参插做衫，穿tī你ê身躯。
19:20 「女婢做人定tio̍h，iáu未受赎，未得tio̍h tháu放，人若kah她行奸淫，两人tio̍h受刑罚，总是，m̄ thang hō͘伊死，因为女婢iáu未得tio̍h自由。
19:21 Hitê chapo͘人tio̍h用补过失ê祭，to̍h是一只绵羊káng，牵到会幕门口，上主ê面前，做补过失ê祭。
19:22 祭司tio̍h用补过失祭ê羊káng，tī上主ê面前赎伊所犯ê罪，伊所犯ê罪to̍h得tio̍h赦免。
19:23 「Lín到迦南地ê时，栽种ta̍k种会食得ê果子树，lín tio̍h kā hiahê果子看做kah未受割礼ê相siâng。M̄-thang食头三年ê果子，lín tio̍h kā hiahê果子看做是未受割礼ê。
19:24 到第四年所结ê果子lóng tio̍h做圣，用伊来oló上主。
19:25 到第五年，lín tio̍h食hiahê果子，ē tàng hō͘它kā lín结khah chē果子。我是上主—lín ê上帝。
19:26 「Lín m̄ thang食kâⁿ血ê物，m̄ thang用法术，mā m̄ thang占卜。
19:27 头壳ê四箍围m̄ thang剃，嘴须ê四箍围mā m̄ thang髡。
19:28 Lín m̄ thang为死人割kakī ê肉，mā m̄ thang tī身躯刺记号。我是上主。
19:29 「M̄-thang凌辱你ê chabó͘ kiáⁿ hō͘她去做娼妓，恐惊地chiūⁿlóng归ǹg淫乱，地chiūⁿ满满大pháiⁿ。
19:30 「Lín tio̍h守我hiahê安息，敬我ê圣所。我是上主。
19:31 「M̄-thang偏ǹg hiahê hō͘鬼附身ê，kah行邪术ê，mā m̄ thang去问in，致到hō͘ in òe lahsap。我是上主—lín ê上帝。
19:32 「Tī白头毛ê人面前，你tio̍h khiā起来，mā tio̍h尊敬老人ê面，koh tio̍h敬畏你ê上主。我是上主。
19:33 「若有出外人寄脚tī lín ê所在，kah lín tòa，to̍h m̄ thang欺负in。
19:34 「Kah lín tòa ê出外人，lín tio̍h看in亲像本地人相siâng，mā tio̍h疼in亲像本身，因为lín mā bat tī埃及地做出外人。我是上主—lín ê上帝。
19:35 「Lín审判ê时m̄ thang无公道，tī尺，tī秤，tī 斗，lóng tio̍h公道。
19:36 Tio̍h用公道ê秤á来秤，公道ê秤锤，公道ê伊法，公道ê欣。「我是上主—lín ê上帝，bat chhōa lín出埃及地ê。」
19:37 Lín tio̍h守我一切ê律例，kah我一切ê法度，来遵行。我是上主。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。