罗马书 线上收听:中文和合本 现代中文译本修订版 现代台语 台语圣经 台语(长老会传播中心授权) 客语 现代客语 福州话 粤语和合本 希腊文(WH-NT) 下载档案 关于语音圣经
4:1 用亚伯拉罕做信仰ê模范
Án-ne,对kah咱有血统关系ê祖先亚伯拉罕,咱beh án怎讲?伊kám有得tio̍h啥物?
4:2 亚伯拉罕若是tùi行为来hō͘上帝看做是义人,伊to̍h有理由thang夸口。M-koh tī上帝ê面前,伊无啥物thang夸口。
4:3 因为经典有ánne讲:亚伯拉罕信上帝,所以,上帝to̍h kā伊看做是义人。(注:创15:6)
4:4 工人得tio̍h工钱无算做是恩典,因为he是伊应该得ê。
4:5 M̄ koh,hitê无靠行为,kantaⁿ信hit位ē kā罪人宣判无罪ê上帝ê奴仆,因为伊有chitê信,上帝to̍h kā伊称做义人。
4:6 大卫mā有讲起,一个无做啥物,to̍h hō͘上帝看做是义人ê,hitê人有福气。伊ánne讲:
4:7 过失得tio̍h赦免,罪过得tio̍h消除ê人,实在有福气!
4:8 主无kā伊定罪ê人,实在有福气!(诗32:1-2)
4:9 Taⁿ,chitê福气是只有beh hō͘有受割礼ê人,是无?Á是mā beh hō͘无受割礼ê人?因为咱有讲:亚伯拉罕因为有信上帝,上帝to̍h kā伊看做是义人。
4:10 亚伯拉罕是tang时chūn hō͘上帝看做是义人?是受割礼以前á是以后?是受割礼以前,m̄是以后。
4:11 后来,伊有受割礼,chitê割礼是一种记号,证实伊iáu未受割礼以前to̍h因为有信,to̍h hō͘上帝kā伊认定做义人。所以,对hiahê无受割礼因为有信,to̍h hō͘上帝认定做义人ê人来讲,亚伯拉罕成做in ê祖先。
4:12 伊mā是有受割礼ê人ê祖先,因为in m̄ nā有受割礼,mā有跟tòe咱ê祖先亚伯拉罕iáu未受割礼以前to̍h有ê信心,用伊做模范teh生活。
4:13 亚伯拉罕通过信仰来领受上帝ê应允
上帝应允亚伯拉罕,beh hō͘伊kah伊ê kiáⁿ孙承接chitê世界。Chitê应允,m̄是通过律法,是通过信,chiah hō͘伊得tio̍h上帝kā伊称做义人。
4:14 若遵照律法ê人chiah ē tàng承接上帝ê应允,hit款ê信仰是有ná无,hitê应允mā无路用。
4:15 律法ē引起上帝ê受气;因为若无律法,to̍h无违犯律法ê tāichì。
4:16 所以,应允是用信做根据,这是beh保证应允是出tī上帝白白ê恩典,beh hō͘亚伯拉罕所有ê kiáⁿ孙;m̄ nā是有受割礼ê,mā包含kah亚伯拉罕仝款有信靠上帝ê奴仆;亚伯拉罕是咱众人ê祖先。
4:17 照经典所记载:我设立你做万民ê祖先。(注:创17:5)亚伯拉罕相信ē hō͘死人koh活,ē tùi无创造有ê上帝,koh tùi他领受应允。
4:18 亚伯拉罕tī无ǹg望ê时,iáu koh抱tio̍h ǹg望,相信伊ē成做万民ê祖先,to̍h是照应允所讲ê:你ē有真chē kiáⁿ孙。(注:创15:5)
4:19 Hit时,伊已经chiâⁿ百岁,伊知影kakī ê身躯衰弱kah teh beh死去,伊ê bó͘撒拉mā已经bē生kiáⁿ,m̄ koh,亚伯拉罕无因为ánne来失去信心。
4:20 伊对上帝ê应允无憢疑,伊ê信心反tńg ná坚定,kā荣光归hō͘上帝。
4:21 伊确信上帝一定ē实现他kakī ê应允。
4:22 因为伊有chit款ê信心,上帝chiah kā伊看做是义人。
4:23 「Kā伊看做是义人」(注:创15:6) chit句话,m̄是kantaⁿ为tio̍h亚伯拉罕来写ê,
4:24 mā是为tio̍h咱chiahê人写ê。因为咱有相信上帝hō͘咱ê主耶稣tùi死人中koh活,所以,咱mā ē hō͘上帝看做是义人。
4:25 为tio̍h咱ê罪过,上帝kā耶稣交hō͘人害死,koh为tio̍h beh hō͘咱kah上帝有和好ê关系,上帝有hō͘耶稣koh活。
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。