出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
40:1 Tio̍h起圣幕
上主吩咐摩西讲：
40:2 「正月初一，你tio̍h起聚集用ê会幕。
40:3 你tio̍h kā法柜hē tī hit内面，用帐帘kā它遮闸。
40:4 扛桌入去，排设顶面ê物。扛灯台入去，点它ê灯。
40:5 扛烧香ê金坛，hē tī法柜前，挂会幕门ê门帘。
40:6 Kā烧祭ê坛，hē tī聚集ê会幕门前。
40:7 Kā洗荡ê盆，hē tī会幕kah坛ê中间，贮水tī盆内。
40:8 Koh tī四箍围khiā埕帷，挂埕门ê门帘。
40:9 「用油抹会幕kah其中所有ê器具来分别做圣，它to̍h成做圣。
40:10 Koh抹烧祭ê坛kah它所有ê器具，kā坛分别做圣，坛to̍h成做至圣。
40:11 Mā tio̍h抹洗荡ê盆，kā它分别做圣。
40:12 「Koh tio̍h chhōa亚伦kah伊hiahê kiáⁿ，来到会幕门前，用水kā in洗。
40:13 Mā kā亚伦穿圣衫，koh用油kā伊抹，kā伊分别做圣，hō͘伊做祭司来服事我。
40:14 Koh chhōa伊hiahê kiáⁿ来，kā in穿内袍。
40:15 Tio̍h kā in抹油，亲像抹in老父相siâng，hō͘ in做祭司来服事我。In受抹油beh永远做祭司，到ta̍k世代。」
40:16 摩西ánne行，lóng是照上主所吩咐伊ê来行。
40:17 第二年正月初一，会幕to̍h khiā起来。
40:18 摩西khiā会幕hē hiahê臼，khiā hiahê板，穿（chhng）hiahê横栱，khiā hiahê柱。
40:19 Tī会幕顶搭布棚，kā布棚ê盖（kòa）盖（khàm）tī它ê顶面，是照上主所吩咐摩西ê。
40:20 Koh kā律法hē tī柜内，用杠穿tī柜里，kā施恩所hē tī柜顶。
40:21 扛柜入来会幕，挂帐帘来遮闸（jia-cha̍h）法柜，是照上主所吩咐摩西ê。
40:22 Koh kā桌á hē tī会幕内，hē tī会幕ê北pêng，hē tī帐帘ê外面。
40:23 Hit顶面用饼排tī上主ê面前，是照上主所吩咐摩西ê。
40:24 Koh hē灯台tī会幕内，kah桌á相对，tī会幕ê南pêng。
40:25 Tī上主ê面前点灯，是照上主所吩咐摩西ê。
40:26 Koh hē金坛tī会幕内ê帐帘前，
40:27 tī hit顶面烧芳料ê香，是照上主所吩咐摩西ê。
40:28 Koh挂会幕门ê门帘。
40:29 Tī聚集ê会幕门前，hē烧祭ê坛，kā烧祭kah素祭献tī hit顶面，是照上主所吩咐摩西ê。
40:30 Kā洗荡ê盆hē tī会幕kah坛ê中间，盆内贮水，thang洗荡。
40:31 摩西kah亚伦kah伊hiahê kiáⁿ，tī hia洗手、洗脚。
40:32 In入去会幕ê时，á是来到坛ê时就洗，是照上主所吩咐摩西ê。
40:33 Tī会幕kah坛ê四箍围khiā帐帷，mā挂帐帷门ê门帘，ánne摩西就完工。
40:34 云遮盖会幕
(民9：15-23)
Hit时，云遮盖会幕，上主ê荣光充满会幕。
40:35 摩西bē tàng入去会幕，因为云停tī hit顶面，koh有上主ê荣光充满tī会幕。
40:36 云tùi会幕收tńg去ê时，以色列人to̍h出发行in ê路程。
40:37 云若无收tńg去，in to̍h无出发行路，一直到云收tńg去。
40:38 日时，上主ê云tī会幕顶；暗时hit中间有火，tī以色列全家ê目chiu 前。Tī in所行ê路程lóng是ánne。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。