出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
39:1 In用蓝色、紫色、朱红色ê料做手工幼ê衫裤，tī圣所穿来服事，koh kā亚伦做圣衫，是照上主所吩咐摩西ê。
39:2 伊用金kah蓝色、紫色、朱红色ê料kah过纺ê幼苎，做祭司服。
39:3 In kā金捶做薄片，剪做线，chham tī蓝色、紫色、朱红色ê料kah幼苎用奇巧ê工夫做ê。
39:4 Koh kā伊做披肩来kā它连做伙，hō͘它双pêng相连。
39:5 Hit顶面用奇巧ê工夫所织ê带，所用来縖ê，kah祭司服相siâng ê做法，kah它连做一块，用金kah蓝色、紫色、朱红色ê料kah过纺ê幼苎来做，照上主所吩咐摩西ê。
39:6 Koh琢（tok）红玛瑙入tī金槽里，照刻印ê方法，tī hit顶面刻以色列hiahê kiáⁿ ê名；
39:7 安置tī祭司服ê披肩，为以色列人做记念石，照上主所吩咐摩西ê。
39:8 造捕褂
(出28：15-30)
伊用奇巧ê师傅ê手工做捕褂，kah祭司服相siâng ê做法，用金kah蓝色、紫色、朱红色ê料以及过纺ê幼苎做ê。
39:9 捕褂是四方ê，拗做双重，长一掠，阔一掠，是双重ê。
39:10 顶面镶宝石四chōa，一chōa是红宝石、黄玉kah红玉，这是第一chōa。
39:11 第二chōa是绿宝石、，蓝宝石kah金刚石。
39:12 第三chōa是紫色ê玛瑙、白色ê玛瑙kah紫色ê水晶。
39:13 第四chōa是绿玉、红玛瑙kah碧玉，chiahê lóng镶tī金槽内。
39:14 Chiahê宝石照以色列ê kiáⁿ ê名，共十二块，亲像刻印，每块刻一个名，为tio̍h十二支族来ánne做。
39:15 In用纯金phah链á，亲像索á，安置tī捕褂。
39:16 In koh做两 个金槽kah两 个金环，kā chit两 个环安置tī捕褂ê双头。
39:17 Kā所phah hit两条金链á，连tī双头ê两 个环。
39:18 用所phah两条链á ê双头，连tī两 个槽，安置tī祭司服披肩ê头前。
39:19 做两 个金环，hē tī捕褂双头ê墘（kîⁿ），óa祭司服ǹg内hit-pêng。
39:20 Koh做两 个金环，安置tī祭司服披肩下面ê头前，óa近相连ê所在，tī祭司服用奇巧ê工夫所织ê带ê顶面。
39:21 In用蓝色ê幼带，kā捕褂ê环kah祭司服ê环缚相连，hō͘它连tī祭司服用奇巧ê工夫所织ê带，hō͘捕褂kah祭司服无离缝，是照上主所吩咐摩西ê。
39:22 制造祭司ê其他圣服
(出28：31-43)伊用织布ê工夫做祭司服内面ê外袍，kui领是蓝色。
39:23 袍ê对中做一个领孔，孔ê四箍围织领缘，亲像战甲ê领孔，免得破裂。
39:24 袍ê下脚pô͘，用蓝色、紫色、朱红色ê料kah过纺ê幼苎，做石榴形ê装饰。
39:25 Koh用纯金做衔铃，用衔铃kâⁿ石榴，hē tī袍ê四箍围下脚pô͘，石榴ê中间；
39:26 一粒衔铃，一粒石榴，一粒衔铃，一粒石榴，tī袍四箍围ê下脚pô͘，thang穿来服事，是照上主所吩咐摩西ê。
39:27 In用织成ê幼苎布，kā亚伦kah伊hiahê kiáⁿ做内衫。
39:28 Mā做幼苎布ê帽á kah幼苎布súi-súi包头壳ê巾，用过纺ê幼苎布做裤。
39:29 Koh用过纺ê幼苎，kah蓝色、紫色、朱红色ê料，用绣花ê手工做腰带，是照上主所吩咐摩西ê。
39:30 In用纯金做圣ê冕旒ê牌，照刻印ê方法，刻字tī hit顶面，ánne写：「做圣归上主」。
39:31 Koh用蓝色ê带，kā牌缚tī帽á顶，是照上主所吩咐摩西ê。
39:32 圣幕完工
(出35：10-19)
就ánne，聚集ê会幕一切ê工lóng做完了后，所有上主所吩咐摩西ê，以色列人lóng照ánne做。
39:33 In送到摩西hia，to̍h是会幕、布棚kah所有ê器具，它ê钩、板、栱、柱、臼，
39:34 染红羊káng皮ê盖，海狗皮ê盖 kah遮闸ê帐帘，
39:35 法柜kah它ê杠，kah施恩所，
39:36 桌á kah它所有ê器具，kah排列ê饼，
39:37 纯金ê灯台kah它ê灯盏，to̍h是排列ê灯盏kah伊所有ê器具，kah点光ê油，
39:38 金坛，抹ê油，香ê芳料，布棚门ê门帘，
39:39 铜坛kah它ê铜ê灯栅，它ê杠kah它所有ê器具，洗荡ê盆kah它ê座，
39:40 埕ê帐帷kah它ê柱，它ê臼，埕门ê门帘，用ê索，钉（tèng）ê钉，以及布棚kah会幕内所有做路用ê器具，
39:41 手工幼ê衫裤，tī圣所穿来服事，kah祭司亚伦ê圣衫，以及伊ê kiáⁿ ê衫，做祭司来服事。
39:42 以色列人照上主所吩咐摩西一切ê话，做一切ê工。
39:43 摩西看tio̍h一切ê工，你看，in已经做成，照上主所吩咐ê，in照ánne做，摩西to̍h kā in祝福。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。