出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
37:1 造约柜
(出25：10-22)
比撒列用皂荚柴做柜，长两肘半，阔肘半，koân肘半。
37:2 内外用纯金包起来，四箍围做金线齿，
37:3 tī它ê四脚kā它铸四个金环，chit pêng两环，hit-pêng两环。
37:4 用皂荚柴做两支杠，用金包起来。
37:5 kā杠穿tī柜边ê环内，thang扛柜。
37:6 用纯金做施恩所，长两肘半，阔肘半。
37:7 用金做两 个ki-lō͘-peng，用chhia ê方法来做，tī施恩所ê双头，
37:8 chit头一个ki-lō͘-peng，hit头一个ki-lō͘-peng，两 个ki-lō͘-peng tī施恩所ê双头kah它连做一块。
37:9 两 个ki-lō͘-peng koân-koân thí开翼，用in ê翼遮（cha̍h）施恩所，in ê面相对；ki-lō͘-peng ê面àⁿ施恩所。
37:10 造供桌
(出25：23-30)
伊用皂荚柴做桌á，长两肘，阔一肘，koân肘半，
37:11 用纯金包起来，四箍围kā它做金线齿。
37:12 桌á ê四箍围各做一巴掌阔ê横梁，横梁顶ê四箍围做金线齿。
37:13 Kā它铸四个金环，安置tī它ê四脚ê四个角。
37:14 安环ê所在óa近横梁，thang穿杠来扛桌。
37:15 用皂荚柴做两支杠，用金包起来，thang扛桌。
37:16 Mā做桌顶ê器具，它ê盘、碗、瓶、杯thang来灌奠，lóng用纯金来做。
37:17 造灯台
(出25：31-40)
伊用纯金做灯台，灯台ê座kah中柱，它ê杯，它ê枝，它ê花，lóng用phah ê方法，做kui座。
37:18 它ê边á分出六支，灯台ê chit pêng有三支，灯台ê hit-pêng有三支；
37:19 chit pêng每支有三个杯，款式亲像杏花，有枝koh有花；hit-pêng每支mā有三个杯，款式亲像杏花，有枝koh有花。Tùi灯台分出ê六支lóng是ánne。
37:20 灯台柱有四个杯，款式亲像杏花，有它ê枝kah它ê花。
37:21 两支ê下面有一枝kah它相连，koh另外两支ê下面有一枝kah它相连，koh另外两支ê下面有一枝kah它相连；灯台所出ê六支lóng是ánne。
37:22 Hiahê枝kah hiahê花lóng kah它连做一个，lóng用纯金，照phah ê方法来做。
37:23 Mā kā它做七个灯盏，以及它ê剪kah它ê盘，lóng用纯金做ê。
37:24 做灯台kah所有ê器具，用纯金一他连得。
37:25 造香坛
(出30：1-5)
伊用皂荚柴做香坛，长一肘，阔一肘，款式四角形，高两肘，它hiahê角kah坛lóng连做一块。
37:26 坛kah它ê顶面，kah它ê四箍围，kah它hiahê角，lóng用纯金包起来，mā tī它ê四箍围做金线齿。
37:27 Koh kā它做两 个金环，安置tī齿线ê下面，做tī坛ê双pêng两支横杆ê顶面，chiahê环是做穿杠ê路用，thang扛坛。
37:28 用皂荚柴做杠，用金包起来。
37:29 制造油kah香
(出30：21-38)
Koh照做芳味ê方法，做thang抹ê圣油kah上等芳料ê香。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。