路加福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
11:1 关系祈祷ê教示
(太6：9-15；7：7-11)
耶稣tī一个所在祈祷。祈祷soah ê时，有一个门徒对他讲：「主ah，亲像约翰有教示伊ê门徒祈祷，求祢mā教示阮祈祷。」
11:2 耶稣kā in讲：「Lín祈祷ê时tio̍h ánne讲：天父ah，愿祢ê名圣，祢ê国临到。
11:3 求祢ta̍k日照时赐阮食物。
11:4 赦免阮ê罪，因为阮mā有赦免辜负阮ê人。M̄-thang chhōa阮入去阮担当bē起ê试探。」
11:5 耶稣koh kā门徒讲：「Lín啥人若有朋友，你半暝去chhōe伊讲：『朋友，the̍h三块饼借我，
11:6 因为我有朋友旅行来chhōe我，我无物thang请伊食。』
11:7 你hitê朋友tùi内面应讲：『Mài吵lah，门已经关，我kah gín-á tī床里teh困。我bē tàng起来the̍h hō͘你。』
11:8 我kā你讲，虽然hitê人bē带念tio̍h朋友情，起来the̍h饼hō͘你，伊iáu koh ē因为你ê迫切恳求，起来the̍h你所需要ê物hō͘你。
11:9 所以，我koh kā lín讲，求ē得tio̍h，chhōe会chhōe ・tio̍h，phah门ē kā lín开。
11:10 因为有求to̍h ē得tio̍h，有chhōe to̍h ēchhōe ・tio̍h，有phah门就ē kā in开。
11:11 Lín做老父ê人，kakī ê kiáⁿ来讨饼，你kám ē the̍h石头hō͘伊？Á是来讨鱼，你kámē kā蛇准做鱼hō͘伊？
11:12 Á是讨卵，你kámē用蝎á虫hō͘伊？
11:13 Lín chiahê人虽然pháiⁿ，iáu koh ē晓用好物hō͘ lín ê kiáⁿ儿，何况lín tī天顶ê天父，他kám bē用圣神来hō͘对他恳求ê人？」
11:14 耶稣kah别西卜ê争议
(太12：22-30；可3：20-27)
耶稣赶一个哑口邪神出去，哑口ê人to̍h讲话。群众lóng感觉奇怪。
11:15 其中有几nā个人讲：「他赶鬼是靠鬼王别西卜。」
11:16 Koh有人beh试探耶稣，要求他行tùi天来ê神迹。
11:17 耶稣知in ê心思，to̍h kā in讲：「国家若kakī 起纷争to̍h ē抛荒，家庭若bē hô一定ē破碎。
11:18 撒旦若kakī 起纷争，伊ê国ná khiāē tiâu？Lín讲我靠别西卜赶鬼，
11:19 我若是靠别西卜赶鬼，lín ê子弟赶鬼是óa靠啥人lè？Án-ne，lín ê子弟会反驳lín ê讲法。
11:20 总是，我若靠上帝ê气力赶鬼，上帝国度就已经tī lín ê中间。」
11:21 「勇士若穿盔甲，gia̍h ke-si teh顾守伊ê厝，伊所有ê财产就安全。
11:22 总是，若有一个比伊khah猛ê来phah赢伊，就ē kā伊所óa靠ê全副武器抢去，koh kā伊ê财物分了了。
11:23 「无为我ê人to̍h是kah我对敌。无协助我ê人to̍h是teh kā我破坏。」
11:24 邪神倒Tńg来
(太12：43-45)
「邪神离开附身ê人了后，经过无水ê地，beh chhōe歇困ê所在chhōe lóng无，to̍h讲：『我beh tńg去我tùi hia出来ê hit间厝。』
11:25 Tńg去到位一看，厝内拚扫kah真清气koh整齐。
11:26 Hitê邪神to̍h koh去带七个比kakī khah pháiⁿ ê邪神来，入去hia tòa。Hitê人ê结局比起头koh khah惨。」
11:27 真正ê福气
耶稣teh讲chiahê话ê时，群众中间有一个妇人人大声对他讲：「生你koh hō͘你suh奶ê妇人人真有福气！」
11:28 M̄ koh，耶稣应讲：「听上帝ê道理来遵守ê人koh khah有福气！」
11:29 要求神迹
(太12：38-42；可8：12)
群众jú来jú chē，耶稣to̍h讲：「Chit世代是pháiⁿ ê世代，in求神迹，m̄ koh，除了约拿ê神迹以外，无koh有神迹hō͘ in。
11:30 Tú亲像约拿成做尼尼微人ê神迹，人子mā beh成做chit世代ê神迹。
11:31 Tī审判ê时，南方ê女王beh kah chit世代ê人做伙koh活起来，续kā chit世代ê人定罪，因为hitê女王有tùi地ê极头来听所罗门智慧ê话，何况tī chia有比所罗门khah伟大ê。
11:32 Tī审判ê时，尼尼微人ē kah chit世代ê人做伙koh活起来，soah kā chit世代ê人定罪，因为尼尼微人有tùi约拿所传ê道理来悔改，何况tī chia有比约拿koh khah伟大ê。」
11:33 身躯ê灯
(太5：15；6：22-23)
「无人点灯hē tī无人看见ê所在，á是盖tòa米斗下；一定tio̍h hē tī灯台顶，hō͘入来ê人看tio̍h hitê光。
11:34 你ê目chiu 是身躯ê灯，你ê目chiu 若金，全身躯就光明；你ê目chiu 若花，kui身躯就乌暗。
11:35 所以，tio̍h注意，m̄ thang hō͘你内面ê光暗去。
11:36 你全身躯若lóng光明，无一点á乌暗，to̍h ē亲像灯光iàⁿiàⁿ teh照你，ē hō͘你完全光明。」
11:37 谴责法利赛派kah经学教师
(太23：1-36；可12：38-40；路20：45-47)
耶稣chiahê话讲soah ê时，有一个法利赛派ê人请他食饭。耶稣to̍h入去坐桌。
11:38 Hitê法利赛派ê人看tio̍h耶稣无洗手to̍h来食，感觉真奇怪。
11:39 耶稣to̍h kā伊讲：「Taⁿ lín法利赛派ê人kantaⁿ7清气杯kah盘ê外面，m̄ koh，lín内面充满贪欲kah邪恶。
11:40 Lín chiahê戆人，创造外面ê上帝kám m̄是mā有创造内面？
11:41 Tio̍h kā chiahê杯盘内面ê物the̍h来赈济人，ánne，lín ta̍k项物to̍h lóng清气。
11:42 「Lín chiahê法利赛派ê人有灾祸ah！因为lín kā薄荷、茴香á，kah ta̍k种ê菜蔬十份抽一份献hō͘上帝，m̄ koh，lín无重视公义kah疼上帝ê tāichì。总是，chiahê tāichì tio̍h应该ài做，mā m̄ thang忽略顶面hiahê奉献。
11:43 Lín法利赛派ê人有灾祸ah！因为lín ài tī会堂内坐大位，koh ài tī大路口hō͘人kā lín请安。
11:44 Lín有灾祸lah！因为lín亲像看bē tio̍h ê死人ê墓，人tùi hit顶面行过mā m̄知。」
11:45 有一个律法ê教师应耶稣讲：「老师，祢讲chiahê话mā侮辱tio̍h阮。」
11:46 M̄ koh，耶稣应讲：「Lín chiahê律法教师mā有灾祸ah！因为lín kā人担无法得ê重担hō͘人担；m̄ koh，lín kakī 连一支指头á都m̄肯振动来减轻hiahê重担。
11:47 Lín一定有灾祸ah！因为lín为lín祖先杀害ê先知造墓。
11:48 Án-ne，lín kakī 证实lín mā赞成祖先所做ê tāichì，koh欢喜来造in ê墓。
11:49 所以，上帝ê智慧有讲：『我beh差先知kah使徒去in hia，其中有ê inē kā伊害死，有ê inē kā伊迫害。』
11:50 Án-ne，tùi创造世界以来所流众先知ê血lóng beh kā lín chit世代讨，
11:51 to̍h是tùi亚伯ê血到撒迦利亚死tī殿kah坛ê中间所流ê血。我实在kā lín讲，hiahê血债lóng beh对lín chit世代ê人讨。
11:52 Lín chiahê律法教师有灾祸！因为lín kā开智识ê门ê锁匙gia̍h去。Lín kakī 无beh入去，koh阻挡想beh入去ê人。」
11:53 耶稣tùi hia出来ê时，经学教师kah法利赛派ê人koh khah出力，剧烈攻击耶稣，逼他讲khah chē话。
11:54 In teh等耶稣讲m̄ tio̍h话ê时，thang chhńg他ê话缝。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。