路加福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权) 客语 现代客语 粤语和合本 希腊文(WH-NT) 下载档案 关于语音圣经
3:1 行洗礼约翰ê传道
(太3:1-12;可1:1-8;约1:19-28)
罗马皇帝Tî-bé-lioh坐位ê第十五年,本丢彼拉多做偤太ê总督,希律做加利利省分封ê王,伊ê兄弟腓力做Î-tó͘-lá-iah kah To-la-kho-nî地方分封ê王,Lū-sa-nî-a做A-mí-lē-neh分封ê王。
3:2 亚那kah该亚法做大祭司ê时,撒迦利亚ê kiáⁿ约翰,tī旷野领受上帝ê话。
3:3 约翰to̍h到约旦河一带ê ta̍k所在,宣扬讲:「Tio̍h悔改来领受洗礼,上帝to̍h ē赦免人ê罪。」
3:4 亲像以赛亚先知tī伊ê册里所记ê话:有声tī旷野teh hoah: Tio̍h为主准备道路,为主修直他ê小路。
3:5 所有ê山谷lóng tio̍h thūn hō͘它tīⁿ, chiahê大小ê山头lóng tio̍h削hō͘它低。弯曲ê路tio̍h取hō͘它直,坎坷ê路tio̍h修hō͘它平。
3:6 万民lóng ē看tio̍h上帝ê拯救。』」(注:赛40:3-5)
3:7 约翰对真chē来beh领受洗礼ê人讲:「Lín chiahê毒蛇,啥人警告lín闪避上帝teh beh发ê受气?
3:8 Tio̍h用日常生活来证明lín ê悔改。M̄-thang kakī 想讲:『有亚伯拉罕做阮ê祖先』,因为我kā lín讲,上帝ē tàng tùi chiahê石头出kiáⁿ孙hō͘亚伯拉罕。
3:9 Taⁿ斧头已经对准树头ā,所有无结好果子ê树,lóng ē锉起来hiat落火。」
3:10 众人问约翰讲:「Án-ne,阮tio̍h án怎做khah好?」
3:11 约翰应讲:「有两领衫ê人,tio̍h分hō͘无衫ê人;有食物ê人,mā tio̍h ánne做。」
3:12 有一kóa抽税ê人mā来beh领受洗礼,in问约翰讲:「老师,阮tio̍h án怎做chiah好?」
3:13 约翰对in讲:「规定ê税以外,m̄ thang kā人加抽。」
3:14 有一kóa兵á mā问约翰讲:「Á阮tio̍h án怎做?」伊应讲:「M̄-thang kā人恐吓the̍h钱,m̄ thang kā人揩油,对lín所领ê薪水tio̍h满足。」
3:15 对约翰ê回应
人民teh期待基督,心内lóng teh想讲约翰无定tio̍h to̍h是基督。
3:16 约翰应群众讲:「我用水kā lín洗礼,独独有一位比我khah有权能ê teh beh来,我连kā他thǹg鞋都bē堪得;他beh用圣神kah火kā lín洗礼。
3:17 他ê手the̍h簸箕,beh kā麦埕全部ê麦á簸清气,kā麦á收入去仓库,m̄ koh,麦hiūⁿ to̍h用bē hoa ê火烧掉。」
3:18 约翰传福音hō͘民众ê时,lóng用真chē方法来苦劝。
3:19 独独约翰责备分封ê王希律,因为伊抢夺小弟ê bó͘希罗底,koh做真chē pháiⁿ tāichì。
3:20 Taⁿ希律koh加一项pháiⁿ tāichì,to̍h是kā约翰关落监。
3:21 耶稣受洗礼
(太3:13-17;可1:9-11)
众人领受洗礼了后,耶稣mā有来领受洗礼。他祈祷ê时,天开,
3:22 圣神降临tī他ê顶面,形状亲像粉鸟,koh tùi天有声讲:「祢是我所疼ê Kiáⁿ,我真kah意祢。」
3:23 耶稣ê族谱
(太1:1-17)
耶稣开始传道ê时差不多三十岁。众人看他是约瑟ê kiáⁿ,约瑟是He-lih ê kiáⁿ,
3:24 He-lih是Má-that ê kiáⁿ,Má-that是利未ê kiáⁿ,利未是Me̍h-khi ê kiáⁿ,Me̍h-khi是Ián-ná ê kiáⁿ,Ián-ná是约瑟ê kiáⁿ,
3:25 约瑟是Má-ta-sî-a ê kiáⁿ,Má-ta-sî-a是阿摩司ê kiáⁿ,阿摩司是Ná-om ê kiáⁿ,Ná-om是Ê-su-lih ê kiáⁿ,Ê-su-lih是Nân-gái ê kiáⁿ,
3:26 Nân-gái是Má-at ê kiáⁿ,Má-at是Má-ta-sî-a ê kiáⁿ,Má-ta-sî-a是Se-mé ê kiáⁿ,Se-mé是约瑟ê kiáⁿ,约瑟是偤大ê kiáⁿ,偤大是Iô-a-ná ê kiáⁿ,
3:27 Iô-a-ná是Lē-sah ê kiáⁿ,Lē-sah是Só͘-lô-ba-pek ê kiáⁿ,Só͘-lô-ba-pek是撒拉铁 ê kiáⁿ,撒拉铁是Nê-lí ê kiáⁿ,
3:28 Nê-lí是Me̍h-khi ê kiáⁿ,Me̍h-khi是A-tí ê kiáⁿ,A-tí是Ko-sam ê kiáⁿ,Ko-sam是Ê-má-tám ê kiáⁿ,Ê-má-tám是珥ê kiáⁿ,珥是Iô-sé ê kiáⁿ,
3:29 Iô-sé是Ê-lī-e-chel ê kiáⁿ,Ê-lī-e-chel是Iô-lîm ê kiáⁿ,Iô-lîm是Má-that ê kiáⁿ,Má-that是利未ê kiáⁿ,
3:30 利未是西缅ê kiáⁿ,西缅是偤大ê kiáⁿ。偤大是约瑟ê kiáⁿ,约瑟是Iô-nân ê kiáⁿ,Iô-nân是以利亚金 ê kiáⁿ,
3:31 以利亚金是Me̍h-lé-a ê kiáⁿ,Me̍h-lé-a是Mián-ná ê kiáⁿ,Mián-ná是Mâ-tá-thah ê kiáⁿ,Mâ-tá-thah是拿单 ê kiáⁿ,拿单是大卫ê kiáⁿ,
3:32 大卫是耶西ê kiáⁿ,耶西是俄伯 ê kiáⁿ,俄伯是波阿斯 ê kiáⁿ,波阿斯是撒门 ê kiáⁿ,撒门是拿顺 ê kiáⁿ,
3:33 拿顺是亚米拿达ê kiáⁿ,亚米拿达是亚南 ê kiáⁿ,亚南是以斯仑 ê kiáⁿ,以斯仑是法勒斯 ê kiáⁿ,法勒斯是偤大ê kiáⁿ,
3:34 偤大是雅各ê kiáⁿ,雅各是以撒ê kiáⁿ,以撒是亚伯拉罕ê kiáⁿ,亚伯拉罕是他拉ê kiáⁿ,他拉是拿福ê kiáⁿ,
3:35 拿福是西鹿 ê kiáⁿ,西鹿是拉吴 ê kiáⁿ,拉吴是法勒ê kiáⁿ,法勒是希伯 ê kiáⁿ,希伯是沙拉ê kiáⁿ,
3:36 沙拉是该南 ê kiáⁿ,该南是亚法撒ê kiáⁿ,亚法撒是闪ê kiáⁿ,闪是挪亚ê kiáⁿ,挪亚是拉麦 ê kiáⁿ,
3:37 拉麦是玛土撒拉ê kiáⁿ,玛土撒拉是以诺ê kiáⁿ,以诺是雅列 ê kiáⁿ,雅列是玛勒列ê kiáⁿ,玛勒列是该南 ê kiáⁿ,该南是以挪士 ê kiáⁿ,
3:38 以挪士是设ê kiáⁿ,设是亚当ê kiáⁿ,亚当是上帝ê kiáⁿ。
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。