马太福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权) 客语 现代客语 粤语和合本 希腊文(WH-NT) 下载档案 关于语音圣经
25:1 十个在室女ê譬喻
「天国亲像下面ê譬喻:十个在室女gia̍h灯出去迎接新郎。
25:2 其中有五个戆ê,五个聪明ê。
25:3 戆ê有gia̍h灯,无另外带油。
25:4 独独聪明ê有gia̍h灯koh有另外带油tī in ê油罐á内。
25:5 新郎khah òaⁿ到,hiahê在室女soah lóng tuh-ku困去。
25:6 半暝有人大声hoah:『新郎来lò͘!紧出来迎接。』
25:7 Hit时,hiahê在室女lóng醒起来,准备点灯。
25:8 戆ê kā聪明ê讲:『请kā lín ê油分一kóa hō͘阮,因为阮ê灯teh beh hoa去à。』
25:9 聪明ê应讲:『阮惊油无够分lín用。Siōng好lín kakī koh去买。』
25:10 In koh去买油ê时,新郎到位。Hiahê准备便便ê在室女kah伊入去赴婚宴,门就关起来。
25:11 「然后,hiahê去买油ê在室女mā来到位,讲:『先生ah,先生ah,请kā阮开门。』
25:12 M̄ koh,新郎应讲:『我实在kā lín讲,我m̄ bat lín。』
25:13 所以,tio̍h谨慎!因为lín m̄知hitê日,hitê时。」
25:14 三个奴仆ê譬喻
(路19:11-27)
「天国mā亲像一个人beh出门去外国,to̍h叫伊ê奴仆来,kā所有ê财产交带in。
25:15 伊照各人ê才tiāu交银币hō͘ in。一个hō͘伊银五千,一个hō͘伊二千,一个hō͘伊一千。然后伊to̍h出门去。
25:16 Hitê领五千ê,随时the̍h去做senglí,koh thàn五千。
25:17 Hitê领二千ê mā仝款,koh thàn二千。
25:18 独独hitê领一千ê出去kā土脚挖一孔,来kā主人交带ê银币埋起来。
25:19 经过真久,主人tńg来,to̍h kah in算账。
25:20 Hitê领五千ê来,koh带五千,讲:『头家ah,你交带我五千,你看,我有koh thàn五千。』
25:21 主人kā伊讲:『真好,好koh尽忠ê奴仆,你既然tī小小ê tāichì尽忠,我beh派你来管理大ê tāichì。入来kah我做伙快乐。』
25:22 Hitê领二千ê mā来,讲:『头家,你交带我二千。你看,我有koh thàn二千。』
25:23 主人kā伊讲:『真好,好koh尽忠ê奴仆,你既然tī小小ê tāichì尽忠,我beh派你来管理大ê tāichì。请入来kah我做伙快乐。』
25:24 最后,hitê领一千ê mā来,讲:『头家ah,我知你是真刻薄ê人,无掖种籽mā beh收割;无种作mā beh收成。
25:25 我真惊,所以,kā你hit一千银币埋tī土脚。Taⁿ你ê银币还你。』
25:26 主人应讲:『Pháiⁿ koh pîntōaⁿ ê奴仆,你既然知我无掖种籽mā beh收割,无种作mā beh收成,
25:27 你应该tio̍h kā我ê银币寄tī钱店,我tńg来ê时thang领本钱kah利息来还我。
25:28 Taⁿ你tio̍h kā hit一千交hō͘有一万银币hitê人。
25:29 因为有ê,我beh hō͘伊chē kah有chhun;无ê,连伊所有ê mā beh kā伊抢来。
25:30 Lín tio̍h kā chitê无路用ê奴仆赶出去外面乌暗ê所在,tī hia伊ē啼哭,咬牙切齿。」
25:31 最后ê审判
「当人子chhōa他ê众天使再临ê时,他ē坐tī荣耀ê宝座,
25:32 万邦会聚集tī他ê面前。他ē亲像牧者kā绵羊kah山羊分开ánne,kā万邦分做两pêng;
25:33 kā绵羊安排tī他ê正pêng,山羊tī倒pêng。
25:34 Hit时,王ē kā正pêng ê讲:『Lín chiahê对我ê天父得tio̍h恩典ê,进前来承接tùi创造宇宙以来to̍h为lín准备ê国度。
25:35 因为我iau ê时,lín有hō͘我食;我嘴干ê时,lín有 hō͘我lim;我出外做客,lín有接待我;
25:36 我thǹgpaktheh ê时,lín有hō͘我穿;我破病ê时,lín有kā我看顾;我tī监里,lín有来kā我探访。』
25:37 Hit时,义人ē应他讲,『主ah,阮tang时看tio̍h祢iau,有hō͘祢食?嘴干,有hō͘祢lim?
25:38 Τang时看tio̍h祢出外,有接待祢?祢thǹgpaktheh,有hō͘祢穿?
25:39 Tang时看tio̍h祢破病á是tī监里,阮有去kā祢探访?』
25:40 王会应讲:『我实在kā lín讲,Lín有ánne好款待我ê兄弟中siōng微细ê一个,to̍h是对待我ánne。』
25:41 然后王ē kā倒pêng ê讲:『Lín chiahê受咒诅ê人,tio̍h离开我,入去为tio̍h魔鬼kah伊ê使者所准备ê永远ê火里。
25:42 因为我iau ê时,lín无hō͘我食;我嘴干ê时,lín无hō͘我lim;
25:43 我出外做客,lín无接待我;我thǹgpaktheh,lín无hō͘我穿;我破病kah tī监里,lín无来kā我探访。』
25:44 Hit时,in mā ē应讲,『主ah,阮tang时看tio̍h你iau,á是嘴干,á是出外,á是thǹgpaktheh,á是破病,á是tī监里,无kā祢照顾?』
25:45 王会应讲:『我实在kā lín讲,lín无ánne好款待我ê兄弟中siōng微细ê一个,to̍h是无ánne对待我。』
25:46 Chiahê人ē受tio̍h永远ê刑罚;m̄ koh,义人ē得tio̍h永远ê活命。」
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。