出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
29:1 立亚伦kah伊ê Kiáⁿ孙做祭司ê规定
(利8：1-36)
「你kā in分别做圣，做祭司来服事我，tio̍h ánne行：取一只公ê牛，两只无缺点公ê绵羊，
29:2 koh取无酵饼kah搅油ê无酵饼，以及抹油无酵ê薄饼，lóng tio̍h用好ê面粉来做。
29:3 Chiahê饼tio̍h hē tī一kha筐，贮tī筐里带来，koh牵hit只公ê牛kah两只公ê绵羊来。
29:4 「Tio̍h hō͘亚伦kah伊hiahê kiáⁿ来到会幕ê门口，用水kā in洗身躯。
29:5 Tio̍h the̍h hiahê衫裤来，kā亚伦穿内衫kah祭司服内面ê外袍，以及祭司服连捕褂，mā kā伊縖用奇巧ê工夫所织祭司服ê带。
29:6 Kā帽á戴tī伊ê头壳，kā圣ê冕旒叠tī帽á ê顶面。
29:7 Tio̍h用抹ê油倒tī伊ê头壳来kā伊抹油。
29:8 「Tio̍h hō͘伊ê kiáⁿ来，kā in穿内衫。
29:9 Koh用带kā亚伦kah伊hiahê kiáⁿ縖，用巾kā in包头壳，in照永远ê例得tio̍h祭司ê职。Koh tio̍h kā亚伦kah伊hiahê kiáⁿ行设立ê礼。
29:10 「你tio̍h牵hit只公ê牛来到会幕前，亚伦kah伊hiahê kiáⁿ tio̍h tī牛ê头壳顶hōaⁿ手。
29:11 你tio̍h tī上主ê面前，tī会幕ê门口，thâi hit只牛。
29:12 取它ê血淡薄á，用指头á抹tī坛ê四角，kā血lóng piàⁿ tī坛脚。
29:13 Tio̍h kā所有五脏ê油、肝顶面ê网纱kah两粒腰子，以及腰子ê油lóng烧tī坛顶。
29:14 独独牛ê肉kah它ê皮，以及它ê屎，lóng tio̍h tī营外用火烧，是做赎罪祭。
29:15 「你tio̍h牵一只公ê绵羊来，亚伦kah伊hiahê kiáⁿ tio̍h tī hit只羊ê头壳顶hōaⁿ手。
29:16 Tioh8thâihit只羊，kā它ê血hiù tī坛ê四箍围。
29:17 Tio̍h kā羊切做一块一块，kā五脏kah腿洗清气，然后lok tī切kui块ê肉kah头ê顶面。
29:18 Tio̍h kā kui只羊tī坛顶烧，这是献hō͘上主ê烧祭，是用火烧hō͘上主芳芳ê祭。
29:19 「你tio̍h kā第二只公ê绵羊牵来，亚伦kah伊hiahê kiáⁿ tio̍h tī羊ê头壳顶hōaⁿ手。
29:20 你tioh8thâi hit只羊，取它ê血淡薄á，抹tī亚伦正pêng ê耳á垂kah伊hiahê kiáⁿ 正pêng ê耳á垂，koh抹tī in正手ê大头拇kah正脚ê大头拇，koh kā血hiù tī坛ê四箍围。
29:21 你tio̍h取坛顶ê血淡薄á kah抹ê油，hiù tī亚伦kah伊ê衫，koh hiù tī伊ê kiáⁿ kah伊ê kiáⁿ ê衫；伊kah伊ê衫，伊ê kiáⁿ kah伊ê kiáⁿ ê衫，lóng分别做圣。
29:22 「Koh tio̍h取hit只羊ê油kah它ê肥ê尾，以及盖五脏ê油kah肝顶ê网纱、两粒腰子kah腰子ê油，以及正pêng ê腿。(这是承接圣职ê礼仪所献ê羊)。
29:23 Koh tùi hit-kha hē tī上主ê面前贮无酵饼ê筐á内，the̍h一块饼，一块搅油ê饼，一块薄饼，
29:24 lóng hē tī亚伦ê手kah伊ê kiáⁿ ê手，tī上主ê面前摇来做摇祭。
29:25 你tio̍h tùi in ê手接来，tī坛顶烧祭ê顶面烧，做芳芳ê祭献tī上主ê面前，是用火烧hō͘上主ê祭。
29:26 「亚伦受设立ê礼仪所献ê公羊，你tio̍h取它ê胸，tī上主ê面前摇来做摇祭，这是你ê份额。
29:27 「行设立ê礼仪所献ê公羊，hitê摇祭ê胸kah举祭ê腿，to̍h是所摇ê，所举起ê，你tio̍h kā它分别做圣，to̍h是属tī亚伦kah伊hiahê kiáⁿ ê。
29:28 这tio̍h做亚伦kah伊ê kiáⁿ孙tùi以色列人所得tio̍h永远ê份额，因为是举祭。Tio̍h tùi以色列人平安祭ê中间做举祭，to̍h是in献hō͘上主ê举祭。
29:29 「亚伦ê圣衫tio̍h留hō͘伊后代ê kiáⁿ孙，thang穿来受抹油，mā穿来受设立。
29:30 伊hitê续接伊做祭司ê kiáⁿ，ta̍k pái入去会幕，tī圣所服事ê时，tio̍h穿七日。
29:31 「行设立ê礼仪所献公羊ê肉，你tio̍h tī圣ê所在煮。
29:32 亚伦kah伊ê kiáⁿ tio̍h tī会幕ê门口，食chit只羊ê肉kah筐á内ê饼。
29:33 In tio̍h食所用来赎罪ê物，hō͘ in担当职务，mā kā in分别做圣；独独外人m̄ thang食，因为he是圣物。
29:34 Hitê行设立ê礼仪所献ê肉á是饼，若有留到隔工早起ê，你tio̍h kā所留ê用火烧，m̄ thang食，因为是圣ê物。
29:35 「你tio̍h照我所吩咐ê一切对亚伦kah伊ê kiáⁿ ánne行，行设立ê礼tio̍h七日。
29:36 Ta̍k日tio̍h献公ê牛一只做赎罪祭，你为坛赎罪ê时tio̍h hō͘它清气，mā tio̍h kā它抹油来分别做圣。
29:37 你tio̍h为坛赎罪七日，hō͘它成圣，坛to̍h成做至圣。见若摸tio̍h伊ê人lóng分别做圣。」
29:38 每工Tio̍h献ê祭
(民28：1-8)
「你所tio̍h献tī坛里ê，to̍h是未满年ê羊á两只，ta̍k日tio̍h献。
29:39 早起时tio̍h献一只，黄昏ê时tio̍h献另外一只。
29:40 你tio̍h用十分之一伊法ê幼面粉，来kah kheh好ê油四分之一欣调和，kah一只羊á同齐献，koh用四分之一欣ê酒做灌奠。
29:41 另外hit只羊á tio̍h tī黄昏ê时来献，tio̍h照早起时ê素祭kah灌奠ê礼仪来料理，用火烧hō͘它芳芳来献hō͘上主。
29:42 这beh tī上主ê面前kah会幕ê门口，做lín ta̍k世代tiāⁿ-tiāⁿ 献ê烧祭。我ētī hia kah lín相会，kah你讲话。
29:43 我ētī hia kah以色列人相会，会幕to̍h ē因为我ê荣光成做圣。
29:44 我beh hō͘会幕kah坛做圣，mā beh hō͘亚伦kah伊hiahê kiáⁿ做圣，做祭司来服事我。
29:45 我beh tiàm tī以色列人ê中间，做in ê上帝。
29:46 In会知影我是上主—in ê上帝，是chhōa in出埃及地，thang hō͘我tiàm tī in中间。我是上主—in ê上帝。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。