出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
28:1 「你tio̍h tùi以色列人ê中间，hō͘你ê阿兄亚伦kah伊hiahê kiáⁿ来你chia，thang做祭司，来服事我，to̍h是亚伦kah亚伦ê kiáⁿ拿答、亚比户、以利亚撒、以他玛。
28:2 你tio̍h kā你ê阿兄亚伦做圣ê衫，hō͘伊荣光koh súi。
28:3 Koh tio̍h吩咐所有心有智慧ê，to̍h是我用智慧ê圣神所充满ê人，kā亚伦做衫，kā伊分别做圣，thang做祭司来服事我。
28:4 In所tio̍h做ê衫，to̍h是捕褂、祭司服、外袍、有花ê内衫、帽、腰带。In tio̍h kā你ê阿兄亚伦kah伊ê kiáⁿ做圣ê衫，hō͘伊做祭司来服事我。
28:5 In tio̍h用金kah蓝色、紫色、朱红色ê料，以及幼苎来做。
28:6 「In tio̍h用金kah蓝色、紫色、朱红色ê料，以及过纺ê幼苎，用奇巧ê工夫来做祭司服。
28:7 Tio̍h有披肩两块，连tī双pêng hō͘它相连。
28:8 祭司服顶面奇巧ê工夫所织ê带，tio̍h kah它相siâng ê做法，hō͘它相连做一个，用金kah蓝色、紫色、朱红色ê料，以及过纺ê幼苎来做。
28:9 Tio̍h the̍h两块红玛瑙，tī顶面刻以色列chiahê kiáⁿ ê名，
28:10 六个名tī chit块宝石，其他六个名tī hit块宝石，lóng照in出世ê次序。
28:11 Tio̍h用刻宝石ê手工，亲像刻印á，照以色列chiahê kiáⁿ ê名，刻tī chit两块宝石，入tī金槽里。
28:12 Tio̍h kā chit两块宝石安置tī祭司服ê披肩顶，为以色列人做记念石。亚伦tio̍h tī两 个肩胛头背in ê名，tī上主ê面前来做记念。
28:13 Tio̍h用金做两块槽，
28:14 koh用纯金，亲像phah索á，来做两条链á，kā chiahê phah成ê链á，安置tī hiahê槽里。」
28:15 捕褂
(出39：8-21)
「你tio̍h用奇巧ê工夫，做一个判决ê捕褂；tio̍h kah祭司服相siâng ê做法：用金kah蓝色、紫色、朱红色ê料，以及过纺ê幼苎来做。
28:16 捕褂tio̍h四方，拗双重，长一掠，阔一掠。
28:17 你tio̍h kā chiahê宝石入tī它ê顶面，有宝石四chōa：一chōa是红宝石、黄玉、赤玉，这是第一chōa；
28:18 第二chōa是绿宝石、蓝玉、金刚石；
28:19 第三chōa是紫色ê玛瑙、白玛瑙、紫色水晶；
28:20 第四chōa是青玉、红玛瑙、碧玉。这lóng tio̍h入tī金槽内。
28:21 Chiahê宝石照以色列ê kiáⁿ ê名，总共十二块，亲像刻印á，每块刻一个名，为tio̍h十二支族来做。
28:22 Tio̍h用纯金phah链á，亲像索á，安置tī捕褂。
28:23 Tī捕褂tio̍h做两 个金环，kā chit两 个环安置tī捕褂ê双头。
28:24 Tio̍h kā所phah ê hit两条金链á，连tī捕褂双头ê两 个环。
28:25 Kā所phah ê两条链á ê双头，连tī两 个槽，安置tī祭司服披肩ê头前。
28:26 你tio̍h做两 个金环，hē tī捕褂双头ê墘，近祭司服ǹg内hit-pêng。
28:27 Koh tio̍h做两 个金环，安置tī 祭司服披肩下面ê头前，óa近相连ê所在，tī祭司服奇巧ê工夫所织ê带ê顶面。
28:28 In tio̍h用蓝色ê幼带，kā捕褂ê环kah祭司服ê环缚相连，hō͘它连tī祭司服奇巧ê工夫所织ê带，hō͘捕褂kah祭司服无离缝。
28:29 「亚伦入去圣所ê时，tio̍h kā判决ê捕褂所刻以色列ê kiáⁿ ê名，带tī伊ê胸前，tī上主ê面前tiāⁿ-tiāⁿ 做记念。
28:30 你tio̍h kā乌陵kah土明hē tī判决ê捕褂内；亚伦到上主ê面前ê时，hiahê tio̍h tī伊ê胸前。亚伦tio̍h tī上主ê面前tiāⁿ-tiāⁿ kā以色列ê判决挂tī胸前。」
28:31 其他祭司ê圣服
(出39：22-31)
「你tio̍h做祭司服内面ê外袍，kui领是蓝色ê。
28:32 袍顶面ê对中tio̍h为tio̍h头壳留一个领孔，孔ê四箍围织领缘，亲像战甲ê领孔，免得破裂。
28:33 袍四箍围ê下脚pô͘，tio̍h用蓝色、紫色、朱红色ê料，做石榴；袍ê四箍围tī石榴（sia̍h-liû）ê中间tio̍h有金衔铃。
28:34 一粒金衔铃，一粒石榴，tī袍四箍围ê下脚pô͘。
28:35 亚伦服事ê时，tio̍h穿祭司服。伊入去圣所来到上主ê面前，以及出来ê时，我有thang听tio̍h声，hō͘伊免死。
28:36 「Tio̍h用纯金做一个牌，照刻印ê法度刻tī它ê顶面，ánne写：『做圣归上主』。
28:37 Tio̍h用一条蓝色ê幼带，kā它缚tī帽á顶，to̍h是tī帽á ê头前。
28:38 Chitê牌tio̍h挂tī亚伦ê头额，hō͘亚伦来担当以色列人tī一切圣ê礼物所犯ê罪。Chitê牌tio̍h tiāⁿ-tiāⁿ tī伊ê头额，hō͘ in tī上主ê面前得tio̍h接纳。
28:39 「Tio̍h用幼苎织有chōa ê内衫，tio̍h用幼苎布做帽á，koh用绣花ê工夫做腰带。
28:40 「你tio̍h kā亚伦chiahê kiáⁿ做内衫，做腰带，做包头壳ê巾，hō͘ in有荣光koh súi。
28:41 Tio̍h kā你ê阿兄亚伦kah伊ê kiáⁿ穿chiahê物件，koh用油kā in抹，行设立ê礼，kā in分别做圣，hō͘ in做祭司来服事我。
28:42 Tio̍h kā in做幼苎布ê裤来遮（cha̍h）in ê下身，裤tio̍h tùi 腰到大腿。
28:43 亚伦kah伊ê kiáⁿ入去会幕，á是来到坛前beh tī圣所服事ê时，tio̍h穿hiahê物件，免得为in担当罪来死。这是beh kā亚伦kah伊ê kiáⁿ孙做永远ê例。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。