出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
25:1 为圣所奉献
(出35：4-9)
上主kā摩西讲：
25:2 「你kā以色列人讲，tio̍h献礼物hō͘我，见若心所甘愿ê，lín thang kā伊收来做礼物hō͘我。
25:3 所tio̍h收ê礼物，to̍h是金、银、铜；
25:4 蓝色、紫色、朱红色ê料；幼苎、山羊毛ê布料；
25:5 染红ê公羊皮、海狗皮；
25:6 皂荚柴、点灯ê油；芳芳ê品料thang做膏油来抹，mā做芳香；
25:7 红玛瑙，kah别种ê宝石，thang镶祭司服kah捕褂。
25:8 In tio̍h kā我起圣ê所在，hō͘我thang tiàm tī in中间。
25:9 照我一切所指示你ê，to̍h是会幕kah其中器具ê款式，lín tio̍h照ánne来造。」
25:10 约柜
(出37：1-9)
「In tio̍h用皂荚柴做一个柜，长两肘半，阔肘半，koân肘半。
25:11 你tio̍h用纯金来包，内外lóng tio̍h包，四箍围mā tio̍h镶齿形金边。
25:12 你tio̍h铸四个金环，安置tī它ê四脚，chit pêng两环，hit-pêng两环。
25:13 Tio̍h用皂荚柴做两支杠，用金包起来。
25:14 Tio̍h kā杠穿tī柜边ê环内，thang用来扛柜。
25:15 Chiahê杠tio̍h tiāⁿ-tiāⁿ tī柜ê环内，m̄ thang抽出来。
25:16 Tio̍h kā我所beh赏赐hō͘你ê律法hē tī柜内。
25:17 「Tio̍h用纯金做施恩所，长两肘半，阔肘半。
25:18 Tio̍h用金做两 个ki-lō͘-peng，用phah ê方法来做，安置tī施恩所ê双头。
25:19 Chit头做一个ki-lō͘-peng，hit头做一个ki-lō͘-peng，双头ê ki-lō͘-peng kah施恩所，tio̍h kui块做相连。
25:20 两 个ki-lō͘-peng tio̍h koân-koân thí开翼，用in ê翼遮施恩所。In ê面tio̍h相对，ki-lō͘-peng ê面tio̍h àⁿ施恩所。
25:21 Tio̍h kā施恩所安置tī柜顶，koh kā我所beh赏赐hō͘你ê律法hē tī柜内。
25:22 我beh tī hia kah你聚会，koh beh tùi施恩所顶面，to̍h是tùi法柜ê顶面，两 个ki-lō͘-peng ê中间，kah你讲我所beh吩咐你传hō͘以色列人一切ê tāichì。」
25:23 排设供祭物ê桌á
(出37：10-16)
「你tio̍h用皂荚柴做一块桌á，长两肘，阔一肘，koân肘半。
25:24 Tio̍h用纯金来包，四箍围镶齿形金边。
25:25 桌á ê四箍围，各做一巴掌阔ê横梁，横梁顶ê四箍围镶齿型金边。
25:26 你tio̍h做四个金环，安置tī它ê四脚ê四角。
25:27 安置环 ê所在tio̍h óa近横梁，thang穿杠来扛桌。
25:28 Tio̍h用皂荚柴做两支杠用金来包，thang用来扛桌。
25:29 Tio̍h做盘、碗、杯、瓶，thang用来灌奠；lóng tio̍h用纯金来做。
25:30 桌顶tio̍h tiāⁿ-tiāⁿ hē排列ê饼tī我ê面前。」
25:31 灯台
(出37：17-24)
「你tio̍h用纯金做一个灯台，灯台ê座kah中柱，它ê杯、它ê目、它ê花，lóng用phah ê方法做kui座。
25:32 Tī它ê边á tio̍h分出六支；灯台ê chit pêng tio̍h有三支，灯台ê hit-pêng tio̍h有三支。
25:33 Chit-pêng每支有三个杯，款式亲像杏花，有枝有花；hit-pêng每支mā有三个杯，款式亲像杏花，有枝有花。Tùi灯台分出ê六支lóng是ánne。
25:34 灯台柱有四个杯，款式亲像杏花，有它ê枝kah它ê花。
25:35 两支ê下面有一枝kah它相连，koh两支ê下面有一枝kah它相连，koh两支ê下面有一枝kah它相连。灯台所发出ê六支lóng是ánne。
25:36 Hiahê枝kah hiahê花，lóng kah它连做一个，lóng用纯金，照phah ê方法来做。
25:37 Tio̍h kā它做七个灯盏，tio̍h点hiahê灯，hō͘它照光tī对面。
25:38 灯台ê蜡烛火、剪刀kah它ê盘lóng tio̍h用纯金来做。
25:39 做灯台kah这一切ê器具，用纯金一他连得。
25:40 你tio̍h谨慎做chiahê物件，lóng tio̍h照我tī山顶kā你指示ê款式。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。