但以理书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
7:1 但以理ê异象
（7:1-12:13）
—看见四只大兽
当巴比伦王伯沙撒元年，但以理tī床里梦见，心内有看tio̍h异象，伊to̍hka7 hitê梦写落来，koh讲起其中ê大意。
7:2 但以理讲：我暗时看tio̍h异象，你看，天里ê四面忽然起风，吹tī大海ê顶面。
7:3 有四只兽，真大只，tùi海里起来，款式各无相仝。
7:4 头一只亲像狮，有鹰鸟ê翼。我看tio̍h它ê翼受拔起来，koh tī地chiūⁿ得tio̍h扶起，来hō͘它ê两支脚khiā起来，亲像人teh khiā，mā hō͘它有人ê心。
7:5 你看，koh有一只兽是第二只，亲像熊。它挺起它身躯ê一pêng，它ê嘴内有三支脇骨，kâm tī嘴齿中。In kā它讲：『起来，吞食chē-chē肉。』
7:6 后来，我koh看，你看，koh有一只兽，款式亲像豹，尻脊骿有四个翼亲像鸟；chit只兽有四个头壳，koh有权柄hō͘它。
7:7 后来，我tī暗时ê异象中teh看，你看，有第四只兽，thang惊thang懔，koh不止强猛，它有大支ê铁齿，它吞咬拆碎，所chhun落来ê koh用脚thún踏。它kah以前hiahê兽lóng无仝款，koh有发十支角。
7:8 我teh看hiahê角，你看，hit中间有另外发一支细支角；以前hiahê角ê中间有三支角，tī细支角ê头前hâm根拔起来。你看，chit支角有目chiu 亲像人ê目chiu ，koh有嘴teh讲大话。
7:9 看见古早to̍h存在ê人
我koh看tio̍h hiahê排列ê宝座，有一个tùi古早to̍h有ê坐teh。伊ê衫裤白kah亲像雪，伊ê头毛亲像真清气ê羊毛。伊ê宝座to̍h是火焰，伊ê轮á亲像火teh to̍h。
7:10 有火亲像溪流发出，流tī伊ê面前；kā伊服事ê人有千千，跟tòe tī伊ê面前ê有万万；审判ê tāichì lóng准备便便，册lóng掀开。
7:11 Hit时，因为hit支角teh讲大话ê声，我to̍h kā它看，看tio̍h hit只兽受thâi，它ê身躯受毁坏，hông hiat tī火里烧。
7:12 讲tio̍h其他hiahê兽，in ê权lóng失落，总是，in ê性命iáu留teh，直到tī定tio̍h ê时、定tio̍h ê日期。
7:13 我tī暗时ê异象中teh看，你看，有一个亲像人ê款，伊坐天顶ê云来到tī hitê tùi古早to̍h有ê，in to̍hchhoa7伊到hitê人面前。
7:14 伊to̍h赏赐伊有权柄、荣光、国位，hō͘万民、万国，万腔口ê人lóng kā伊服事。伊ê权柄是永远ê权柄，bē无去，伊ê国位一定bē废无去。
7:15 异象ê解说
我—但以理，我ê心神tī我ê内面teh忧闷，心内ê异象hō͘我不安。
7:16 我to̍h去chhōe hiahê khiā tī边á ê一个，问伊chiahê tāichì ê实在情形。伊to̍h对我讲，koh解明hiahê tāichì hō͘我知：
7:17 Hit四只大兽是四个王，ē tùi地chiūⁿ兴起。
7:18 总是，至koân上帝圣ê子民ē得tio̍h国位，久长掌理国权，永远无soah。
7:19 Hit时，我ài知第四只兽ê实在情形，它kah in hiahê兽无仝，不止thang惊，它ê嘴齿是铁ê，它ê爪是铜ê，它吞咬拆碎，所chhun落来ê koh用脚来thún踏；
7:20 我koh ài知它头壳所发十支角ê实在情形，kah hit支另外发ê角，hō͘三支角lak落来tī它ê头前，to̍h是有目chiu ，有嘴讲大话ê角，它ê款式比它ê同类ê khah强猛。
7:21 我看tio̍h chit支角kah圣ê子民交战，来thâi赢in。
7:22 直到hitê tùi古早to̍h有ê来，kā至koân上帝ê子民判断，一直到圣徒得tio̍h国位ê日期。
7:23 伊ánne讲：「第四只兽会做地chiūⁿê第四国，她kah所有ê国无仝，koh ē吞咬全地，会thún踏，kā它拆碎。
7:24 讲tio̍h hit十支角，to̍h是tùi hitê国内beh兴起十个王。后来，另外有一个王兴起，kah前hiahê无仝，伊ēhō͘三个王屈服tī伊ê面前。
7:25 伊ē讲话来忤逆至koân上帝，mā ē苦毒至koân上帝ê圣ê子民，mā想beh改换节期、律法。In会hông交tī伊ê手，经过一时，koh两时，koh半时。
7:26 后来，审判官会坐位，in ē抢夺王ê权，kā它毁坏，hō͘伊灭亡到彻底。
7:27 普天下ê国位、权柄kah列国ê威权lóng交hō͘至koân ê圣ê子民。他ê国是永远ê国，见若有权ê lóng ē服事顺服他。」
7:28 Chitê tāichì到chia结束。我—但以理心内想了真不安，面mā变色，总是，我kā chitê tāichì khǹg tī心内。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。