以西结书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
40:1 以西结hō͘主Chhōa去耶路撒冷
阮受掠ê第二十五年,tī年头,月ê初十,城破了后第十四年,tútú hit日,上主ê手hē tī我ê身上,chhōa我来到hia。
40:2 Tī上帝ê异象中,他chhōa我来到以色列地,kā我安置tī真koân ê山,山顶ê南pêng有亲像起造ê城。
40:3 他chhōa我来到hia,你看,有一个人亲像铜ê款式,手the̍h麻索kah测量ê篙尺,khiā tī门口。
40:4 Hitê人对我讲:「人子,见若我所hō͘你看ê,你tio̍h用你ê目chiu 看,用你ê耳孔听,mā tio̍h用你ê心记tiâu ・leh。因为你hông chhōa来chia,是thiau-tî为tio̍h beh hō͘你看chiahê tāichì;见若你所看tio̍h ê,你lóng tio̍h kā以色列ê子民讲。」
40:5 东门
你看,厝ê外面四箍围有墙,hitê人ê手the̍h测量ê篙尺,长六肘,每肘是一肘koh一巴掌。伊to̍h量墙ê厚一篙尺,高一篙尺。
40:6 伊to̍h到ǹg东ê门,上伊ê崎á,量门ê户碇,阔一篙尺,koh一个户碇,阔mā一篙尺。
40:7 Koh量侍卫房,ta̍k间长一篙尺,阔一篙尺,相离五肘;门ê户碇,to̍h是óa近ǹg厝ê门ê门廊,阔一篙尺。
40:8 伊mā量ǹg厝ê门ê门廊,阔一篙尺。
40:9 Koh量门ê廊,阔八肘,它ê柱两肘;hitê门ê门廊是ǹg厝。
40:10 东pêng ê门有侍卫房,chit房三间,hit房三间,lóng仝款ê寸尺;chit pêng ê柱kah hit-pêng ê柱mā是仝款ê寸尺。
40:11 伊量门口,阔十肘,门ê长十三肘。
40:12 侍卫房头前ê界,chit pêng一肘,hit-pêng mā有界一肘;侍卫房chit pêng六肘,hit-pêng六肘。
40:13 Koh量门tùi chitê侍卫房ê厝顶到hitê侍卫房ê厝顶,阔二十五肘;门kah门相对。
40:14 Koh做hiahê柱六十肘,tī门ê四箍围有院用柱做界。
40:15 Tùi入门ê头前到内面门ê门廊ê头前,共五十肘。
40:16 Chiahê侍卫房kah门内四箍围ê柱,以及in ê门廊lóng有关密ê窗;四箍围koh有窗ǹg内面;ta̍k支柱ê顶面有棕树。
40:17 外院
伊chhōa我入去外院,你看,有房间,tī院ê四箍围koh有铺石ê地;铺石地ê顶面有房三十间。
40:18 铺石ê地是tī hiahê门ê边á,kah hiahê门平长,这是下面铺石ê地。
40:19 伊tùi下面门ê头前量到内院头前ê外面,阔一百肘;东面、北面lóng是ánne。
40:20 北门
外院ǹg北ê门,伊量它ê长阔。
40:21 伊ê侍卫房chit pêng三间,hit-pêng三间;它ê柱kah它ê门廊lóng照头一个门ê办;长五十肘,阔二十五肘。
40:22 它ê窗、它ê门廊kah它ê棕树,lóng是照ǹg东ê门;人tùi七层ê崎á上到hia,头前有hiahê廊。
40:23 内院有门kah东pêng ê门、北pêng ê门相对;伊tùi门到门来量,一百肘。
40:24 南门
伊chhōa我ǹg南pêng去,你看,有门ǹg南,koh照前ê寸尺量它ê柱kah它ê门廊。
40:25 它ê内面kah它ê门廊四箍围lóng有窗,kah前所量ê窗仝款;长五十肘,阔二十五肘。
40:26 有七层崎á thang上到hia,头前有hiahê门廊;柱顶有棕树,chit pêng一欉,hit-pêng一欉。
40:27 内院有门ǹg南,tùi门到门伊ǹg南来量,一百肘。
40:28 内院ê南门
伊chhōa我tùi南门到内院,就照以前ê寸尺来量南门。
40:29 它ê房、它ê柱、它ê门廊,lóng照以前ê寸尺;它ê内面kah它ê门廊四箍围lóng有窗;长五十肘,阔二十五肘。
40:30 四箍围有门廊,长二十五肘,阔五肘。
40:31 它ê廊ǹg外院,柱顶有棕树,上八层崎á去到hia。
40:32 内院ê东门
伊chhōa我来到内院,ǹg东;伊量hitê门,照以前ê寸尺。
40:33 它ê房、它ê柱、它ê门廊,lóng照以前ê寸尺;它ê内面kah它ê门廊四箍围lóng有窗,长五十肘,阔二十五肘。
40:34 它ê廊ǹg外院,柱顶tī chit pêng kah hit-pêng lóng有棕树;上八层崎á去到hia。
40:35 内院ê北门
伊koh chhōa我来到北门,照以前ê寸尺来量。
40:36 Koh量它ê房、它ê柱、它ê门廊,内面四箍围lóng有窗,它ê长五十肘,阔二十五肘。
40:37 它ê柱ǹg外院,柱顶tī chit pêng kah hit-pêng lóng有棕树;上八层崎(kiā)á去到hia。
40:38 护龙房
门ê柱边有房kah它ê门,tī hia洗烧祭ê牲礼。
40:39 Tī门廊ê内面,chit pêng有两块桌,hit-pêng有两块桌;tī hit顶面thang来thâi烧祭、赎罪祭kah补过失ê祭ê牲礼。
40:40 上到ǹg北ê门口,chit pêng ê外面有两块桌,门廊hit-pêng mā有两块桌。
40:41 Tī门边chit pêng有四块桌,hit-pêng有四块桌,共八块;tī hit顶面thâi牲礼。
40:42 为tio̍h烧祭ê路用ê四块桌,是石头phah ê,长肘半,阔肘半,高一肘;thâi烧祭kah chiahê祭所用ê器具lóng hē tī hit顶面。
40:43 有钩,阔一巴掌,钉tiâu tī内面ê四箍围;桌顶有祭肉。
40:44 祭司ê房间
内底门ê外面,北门边ê内院有房间,是为tio̍h唱歌ê人来设ê;hiahê房间ǹg南,东门边mā有一间ǹg北。
40:45 伊kā我讲:「Chit间ǹg南ê房是hō͘担当顾厝ê祭司用ê;
40:46 hit间ǹg北ê房是hō͘担当顾坛ê祭司用ê;chiahê是利未族中ê撒督ê kiáⁿ孙,in to̍h近上主来服事。」
40:47 内院kah圣殿
伊koh量hitê院,长一百肘,阔一百肘;是四角形ê;坛是tī厝前。
40:48 伊chhōa我来到厝前ê门廊,量门廊ê ta̍k支柱,chit pêng五肘,hit-pêng五肘。门ê阔,chit pêng三肘,hit-pêng三肘。
40:49 门廊长二十肘,阔十一肘;有hō͘人peh上ê崎á;hiahê柱边koh有细支柱,chit pêng一支,hit-pêng一支。
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。