出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
13:1 头胎ê Lóng Tio̍h奉献
上主吩咐摩西讲：
13:2 「以色列中，无论人á是chengseⁿ，见若头chiūⁿ ê大kiáⁿ，lóng tio̍h分别做圣，归tī我，因为本来to̍h是我ê。」
13:3 无酵节
摩西kā人民讲：「Lín tio̍h记念chit日，to̍h是lín tùi埃及地，tùi做奴隶ê家出来，因为上主用大权能ê手chhōa lín tùi hia出来。有酵ê饼lóng m̄ thang食。
13:4 Chit日是lín出来ê日，是tī亚笔月中间。
13:5 后来，上主chhōa lín入去迦南、赫、亚摩利、希未、耶布斯hiahê族ê地，to̍h是对你ê祖先chiùchōa应允hō͘你ê，hitê流奶kah蜜ê地，hit时你tio̍h tī chit月间守chitê礼。
13:6 你tio̍h食无酵饼七日，到第七日to̍h是上主ê节。
13:7 Chit七日tio̍h食无酵饼，tī你ê四箍围，m̄ thang看tio̍h你有下酵ê饼，mā m̄ thang看tio̍h你有酵母。
13:8 当hit日，你tio̍h kā你ê kiáⁿ讲：『这是因为上主，tī我出埃及ê时，所kā我行ê tāichì。
13:9 这beh kā你做记号tī你ê手，做记念tī你ê头额，hō͘上主ê律法tiāⁿ-tiāⁿ tī你ê嘴，因为上主bat用大权能ê手chhōa你出埃及。
13:10 所以，ta̍k年到chitê期，你tio̍h守chitê例。』」
13:11 大kiáⁿ
「将来上主ē照他对你kah你ê祖先所chiùchōa ê，chhōa你入去迦南人ê地，kā chitê地赏赐hō͘你，
13:12 hit时，你tio̍h kā所有头胎ê chapo͘ kiáⁿ kah所有头水公ê chengseⁿ，归hō͘上主，chiahê lóng属上主。
13:13 见若头水生ê驴á，tio̍h用羊á替赎；若无beh替赎，to̍h tio̍h 扛断它ê颔颈。见若你头chiūⁿ ê chapo͘ kiáⁿ lóng tio̍h替赎。
13:14 日后，你ê kiáⁿ若问你讲：『这是啥物缘故？』你tio̍h对伊讲：『上主用大权能ê手，chhōa阮tùi埃及，tùi做奴隶ê家出来。
13:15 Hit时，法老固执m̄准阮离开，上主to̍h kā埃及地所有头胎ê，无论是人ê大kiáⁿ á是chengseⁿ ê头水ê lóng害死。因为ánne，我kā头水ê公ê献hō͘上主做祭，独独我ê大kiáⁿ lóng用替赎。
13:16 这beh做记号tī你ê手，做记念縖tī你ê头额，因为上主用大权能ê手，chhōa阮tùi埃及出来。』」
13:17 云柱kah火柱
法老准人民离开ê时，腓利士地ê路虽然khah近，总是，上帝无chhōa in tùi hia去，因为上帝讲：「恐惊人民tú tio̍h交战，to̍h ē后悔，倒tńg去埃及。」
13:18 所以，上帝chhōa人民弯tùi红海旷野hit条路去。以色列人lóng排队伍，tùi埃及地出去。
13:19 摩西带约瑟ê骨头kah伊去，因为约瑟bat迫切kah以色列人chiùchōa，对in讲：「上帝一定ē照顾lín，lín tio̍h带我ê骨头tùi chia做伙去。」
13:20 In tùi疏割出发，扎营tī近旷野ê E-thám。
13:21 上主行tī in ê头前，日时tī云柱中chhōa in ê路，暗时tī火柱中光照in，hō͘ in暝日lóng ē tàng行。
13:22 日时ê云柱，暗时ê火柱，lóng无离开人民ê头前。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。