出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
10:1 草蜢ê灾难
上主对摩西讲:「你入去见法老,因为我已经hō͘伊ê心,kah伊ê人臣ê心giám硬,thang hō͘我显明我chiahê神迹tī in中间,
10:2 mā ē hō͘你kā我tī埃及所做ê tāichì,kah我tī in中间所行chiahê神迹,传hō͘你ê kiáⁿ孙听,thang hō͘ lín知我是上主。」
10:3 摩西kah亚伦to̍h去见法老,kā伊讲:「上主—希伯来人ê上帝ánne讲:『你tī我ê面前m̄肯kakī 谦卑,beh到tang时?你tio̍h准我ê子民离开,hō͘ in来服事我。
10:4 你若m̄肯hō͘我ê人民离开,你看,明á载我beh hō͘草蜢入去你ê境内,
10:5 In会遮盖地面,致使看bē tio̍h土,koh ē食hitê tùi灾祸所chhun落来ê,to̍h是雹所phah无了ê,mā ē食田里为lín所发一切ê树木。
10:6 草蜢会充满你ê厝,kah你ê众人臣ê厝,以及所有埃及人ê厝,tùi你ê老父kah你ê祖先出世到taⁿ,m̄ bat看tio̍h ánne。』」摩西to̍h oa̍t-tńg身,离开法老出去。
10:7 法老ê人臣对伊讲:「Chitê人做咱ê罗网,ē到tang时chūn?Tio̍h准chiahê人去服事上主—in ê上帝!埃及已经败坏,你kám m̄知?」
10:8 就ánne,摩西kah亚伦受召倒tńg来见法老,法老kā in讲:「Lín去服事上主—lín ê上帝;独独hiahê想 beh去ê,到底是啥物款人?」
10:9 摩西讲:「阮beh kah阮ê少年人、老人去,mā beh chhōa阮ê kiáⁿ儿kah阮ê羊群、牛群做伙去,因为阮tio̍h守上主ê节。」
10:10 法老对in讲:「好là,我准lín kah lín ê gín-á去!愿上主kah lín同在,lín tio̍h谨慎,灾祸已经tī lín ê目chiu 前ā!
10:11 Án-ne bē做得,kantaⁿ lín chiahê大人thang去服事上主,因为这是lín所求ê。」to̍h tùi法老ê面前kā in赶出去。
10:12 上主kā摩西讲:「你伸手kí埃及地,hō͘草蜢起来埃及地,食地里一切ê菜蔬,to̍h是雹phah无了ê。」
10:13 摩西to̍h伸伊ê拐á,kí埃及地。上主to̍h hō͘东风kui日kui暝吹tī地里。到明á早起,东风to̍h kā草蜢吹来。
10:14 草蜢起来埃及全地,歇tī埃及ê四箍围,厉害到极。早前无有ánne ê草蜢,以后mā bē koh ánne。
10:15 因为in遮盖全地,致使地lóng乌暗,koh食地chiūⁿ一切雹所phah无了ê菜蔬kah树里ê果子。埃及全地,无论树木á是田里ê菜蔬,无留kah一项青翠ê物。
10:16 就ánne,法老赶紧叫摩西kah亚伦来,讲:「我得罪lín ê上帝—上主,mā得罪lín。
10:17 Taⁿ求你koh一pái赦免我ê罪,求lín ê上帝—上主hō͘我脱离chit pái ê死亡。」
10:18 摩西to̍h离开法老,去求上主。
10:19 上主就扫真透ê西风kā草蜢吹起来,赶入去红海,无留kah一只草蜢tī埃及ê四箍围。
10:20 总是,上主hō͘法老ê心硬,m̄准以色列人离开。
10:21 乌暗ê灾难
上主kā摩西讲:「你伸手ǹg天,hō͘埃及地乌暗,chitê乌暗会乌kah bē摸得。
10:22 摩西to̍h伸手ǹg天,埃及to̍h全地三日乌乌暗暗。
10:23 Chit三日,人看bē tio̍h人,mā无起来离开伊ê所在;独独以色列人ê厝lóng有光。
10:24 法老to̍h叫摩西来讲:「Lín去服事上主;独独lín ê羊群、牛群tio̍h留teh,lín ê gín-a2to̍h thang kah lín做伙去。」
10:25 摩西讲:「你mā tio̍h kā牲礼kah烧祭ê物交阮ê手,hō͘阮thang祭祀上主—阮ê上帝。
10:26 阮ê chengseⁿ mā tio̍h kah阮做伙去,连一只mā 无beh留teh,因为阮tio̍h tùi hit中间取来服事上主—阮ê上帝。阮koh iáu未到hia,mā m̄知tio̍h用啥物来服事上主。」
10:27 总是,上主hō͘法老ê心硬,m̄肯hō͘ in离开。
10:28 法老kā摩西讲:「你tio̍h离开我去,你tio̍h kakī 谨慎,m̄ thang koh再来见我ê面,因为你koh再见我ê面hit日,你ē死。」
10:29 摩西讲:「你ánne讲,好!我无beh koh再见你ê面ā。」
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。