诗篇 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
118:1 为tio̍h胜利感恩祈祷
Lín tio̍h感谢上主，因为他是好；因为他ê慈爱永远存在！
118:2 愿以色列讲：他ê慈爱永远存在。！
118:3 愿亚伦ê家讲：他ê慈爱永远存在！
118:4 愿敬畏上主ê人讲：他ê慈爱永远存在！
118:5 我tī危急ê中间求叫上主，上主to̍h应答我，kā我hē tī开阔ê所在。
118:6 有上主kah我同在，我to̍h无惊，人ē tàng对我án怎？
118:7 Tī hiahê帮赞ê中间，有上主kah我同在，所以，我ē看tio̍h hiahê怨恨我ê人受报应。
118:8 Óa靠上主，比óa靠人khah好；
118:9 óa靠上主，比óa靠王亲khah好。
118:10 万民kā我围困，我óa靠上主ê名来kā in剿灭。
118:11 In包围我，kā我围困，我óa靠上主ê名beh kā in剿灭。
118:12 In亲像蜂kā我包围，亲像烧刺phè ê火受phah-hoa；我óa靠上主ê名来kā in剿灭。
118:13 你出力beh kā我chhia倒，总是，上主帮赞我。
118:14 上主是我ê气力，是我ê诗歌；他mā hō͘我得tio̍h拯救。
118:15 Tī义人ê布棚内有欢喜ê声kah拯救ê声；上主ê正手显出大权能。
118:16 上主ê正手gia̍h koân；上主ê正手显出大权能。
118:17 我bē致到死，iáu会活leh，koh beh宣扬上主ê作为。
118:18 上主bat严厉kā我警戒；总是，他bē kā我交tī死亡。
118:19 Tio̍h kā我开义ê门；我beh入去感谢上主。
118:20 这是上主ê门；义ê人beh入去！
118:21 我beh感谢祢，因为祢已经应答我，koh已经成做我ê拯救！
118:22 师傅所弃sak ê石头，已经成做厝角头ê基石。
118:23 这是上主ê作为，咱ê目chiu kā它看做奇怪。
118:24 这是上主所定tio̍h ê日子，咱tī chit日ê中间tio̍h欢喜快乐！
118:25 上主ah，taⁿ求祢拯救！上主ah，taⁿ求祢hō͘阮发达！
118:26 奉上主ê名入来ê应该得tio̍h福气！阮tùi上主ê殿kā lín祝福！
118:27 上主是上帝，他ê光照阮；tio̍h用索á缚祭祀ê chengseⁿ，来到坛角。
118:28 祢是我ê上帝，我beh感谢祢！祢是我ê上主，我beh尊祢做高！
118:29 Lín tio̍h感谢上主，因为他是好！因为他ê慈爱永远存在！
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。