创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
47:1 约瑟入去kā法老讲：「我ê老父kah我ê兄弟带in ê羊群、牛群kah一切所有ê，tùi迦南地来，taⁿ tī歌珊ê地khiā起。」
47:2 约瑟tùi伊ê兄弟ê中间拣五人，chhōa in去见法老。
47:3 法老问约瑟ê兄弟讲：「Lín做啥物头路？」In kā法老讲：「你ê奴仆本身kah阮ê祖先，lóng是顾羊ê人。」
47:4 In koh kā法老讲：「迦南地饥荒真伤重，奴仆ê羊群无草thang食，所以，阮来是beh寄脚tī chia，taⁿ求你容允你ê奴仆tòa tī 歌珊地。」
47:5 法老kā约瑟讲：「你ê老父kah你ê兄弟来到你chia，
47:6 埃及地lóng tī你ê面前；hō͘你ê老父kah你ê兄弟tòa tī国内siōng好ê所在。In thang tòa tī歌珊ê地。你若知in中间khah有本事ê人，to̍h派in管顾我ê chengseⁿ。」
47:7 约瑟chhōa伊ê老父雅各入去khiā tī法老ê面前，雅各to̍h kā法老祝福。
47:8 法老问雅各讲：「你一生ê年日是gōa chē？」
47:9 雅各kā法老讲：「我寄脚tī世间ê年日是一百三十岁。我一生ê年日koh少，koh艰苦，不如我ê祖先寄脚tī世间ê年日。」
47:10 雅各koh kā法老祝福，to̍h tùi法老ê面前出去。
47:11 约瑟照法老ê命令，kā埃及国siōng好ê地，to̍h是兰塞ê地，hō͘伊ê老父kah伊ê兄弟tòa，做in ê产业。
47:12 约瑟用米粮奉养伊ê老父kah伊ê兄弟，以及伊ê老父全家，lóng照in ê人额来kā in供给。
47:13 大饥荒
饥荒真伤重，全地lóng无米粮，甚至埃及地kah迦南地ê人，in因为饥荒ê缘故，饿到晕去。
47:14 约瑟聚集埃及地kah迦南地所有ê银，to̍h是in来籴米粮ê银，kā hiahê银带到法老ê宫内。
47:15 埃及地kah迦南地ê银lóng用了，埃及群众lóng来见约瑟讲：「阮ê银lóng用了à，求你hō͘阮米粮，阮án怎tio̍h死tī你ê面前？」
47:16 约瑟讲：「若是银用了，lín thang牵lín ê chengseⁿ来，我为tio̍h lín ê chengseⁿ beh hō͘ lín米粮。」
47:17 Into̍h kā chengseⁿ赶到约瑟hia，约瑟to̍h用米粮换in ê马、羊群、牛群kah驴。Hit年，为tio̍h beh换in一切ê chengseⁿ，to̍h用米粮养饲in。
47:18 Hit年已经过去，第二年，in koh来见约瑟，kā伊讲：「阮bē瞒得我ê主，阮ê银lóng用了，chengseⁿ mā lóng归tī我ê主，阮tī我ê主ê面前，除阮ê身躯kah阮ê田地以外，无chhun kah半项。
47:19 阮án怎tio̍h tī你ê目chiu 前，人死，地抛荒？求你用米粮买阮kah阮ê地，阮kah阮ê地thang做法老ê路用。Koh请kā种籽hō͘阮，hō͘阮得tio̍h活，免死，土地mā免抛荒。」
47:20 就ánne，约瑟为法老买埃及所有ê地，埃及人因为hō͘饥荒所迫，ta̍k人lóng卖伊ê田地，hiahê地to̍h lóng归tī法老。
47:21 约瑟照chiahê城邑迁徙埃及ê人民，tùi埃及chit pêng到tī hit-pêng。
47:22 独独祭司ê地，法老无kā伊买，因为祭司有tùi法老得tio̍h定tio̍h ê量，in食法老所hō͘ in ê量，所以，in无卖in ê地。
47:23 约瑟kā人民讲：「我今á日为法老买lín kah lín ê地。你看，tī chia有种籽hō͘ lín，lín thang the̍h去种作。
47:24 到收成ê时，lín tio̍h kā五分之一纳hō͘法老，四份归lín，做田里ê种籽，mā做lín kah lín厝内ê人，以及lín ê gín-á ê食物。
47:25 In讲：「你有救阮ê性命，愿阮tī我ê主ê面前得tio̍h恩典，阮beh做法老ê奴仆。」
47:26 Án-ne，约瑟为埃及ê地设立定tio̍h ê例，到tī今á日；法老得tio̍h五分之一，独独祭司ê地无归法老。
47:27 雅各最后ê要求
以色列人tòa tī埃及国歌珊ê地，in tī hia建置产业，koh生湠极chē。
47:28 雅各tòa tī埃及地十七年，雅各一生ê年日是一百四十七岁。
47:29 以色列死ê日teh beh到，伊to̍h叫伊ê kiáⁿ约瑟来，kā伊讲：「我若tī你ê面前得tio̍h恩典，请你下手tī我ê大腿下对我咒chōa，用慈爱kah诚实款待我，m̄ thang kā我埋葬tī埃及。
47:30 我死ê时，你tio̍h kā我带出埃及，埋葬tī我ê老父kah阿公埋葬ê所在。」约瑟讲：「我ē照你ê话去做。」
47:31 雅各讲：「你tio̍h对我chiùchōa。」约瑟to̍h对伊chiùchōa。就ánne，以色列tī床头敬拜上帝。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。