尼希米记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
9:1 民众认罪
Chit月二四，以色列人聚集禁食，穿麻衫，sám火灰。
9:2 以色列ê kiáⁿ孙to̍h kah所有ê外邦人隔开，khiā-teh承认kakī ê罪恶kah in祖先ê罪过。
9:3 In khiā tī kakī ê所在，用hit日四分之一ê时间读上主—in ê上帝律法ê册，koh用四分之一ê时间认罪，敬拜上主—in ê上帝。
9:4 耶书亚、巴尼、甲篾、示巴尼、Bun-nî、示利比、巴尼kah Ke-ná-nî，lóng khiā tī利未人ê台顶，大声求叫上主—in ê上帝。
9:5 利未人耶书亚、甲篾、巴尼、Ha-siap-niah、示利比、Ho͘-te-iah、示巴尼、Pe-tha-hiah，讲：「Lín tio̍h khiā起来oló上主—lín ê上帝，tùi永远到永远。上主ah，祢荣光ê名是应该oló ê，赢过一切ê称呼kah oló。」
9:6 认罪ê祈祷
续落来，以色列人ánne祈祷：上主ah，独独祢是上主！祢创造天kah chiahê天ê天，kah天顶ê万军，地kah地chiūⁿê万物，海kah海中ê万物，这一切lóng是祢所保存ê。天军mā敬拜祢。
9:7 上主ah，祢是上帝，bat拣选亚伯兰，chhōa伊出迦勒底ê吾珥，赏赐伊ê名叫做亚伯拉罕。
9:8 祢看伊ê心tī祢ê面前尽忠，to̍h kah伊立约，应允kā迦南人、赫人、亚摩利人、比利洗人、耶布斯人、革迦撒人ê地hō͘伊ê kiáⁿ孙，koh有应验祢ê话，因为祢是公义ê。
9:9 祢有看tio̍h阮ê祖先tī埃及所受ê困苦，听in tī红海边ê哀求，
9:10 to̍h行神迹奇事，责罚法老kah伊ê人臣，以及伊国内ê众人。因为祢知in骄傲款待阮ê祖先，祢to̍h为kakī 得tio̍h名声，kah今á日相siâng。
9:11 祢tī in ê面前kā海分开，hō͘ in tùi海中ná亲像行干地过去，祢kā jiok in ê人hiat tī深海，ná亲像hiat石头tī大水中；
9:12 祢又koh tī日时用云柱引chhōa in，暗时祢用火柱kā in所行ê路照光。
9:13 祢mā降临tī西奈山，tùi天里kah in讲话，赏赐hō͘ in正直ê法度、真实ê法度、好ê律例kah诫命，
9:14 koh hō͘ in知祢安息ê圣日，mā托祢ê奴仆摩西用诫命、律例、法度kā in命令。
9:15 为tio̍h in腹肚iau，to̍h tùi天赏赐米粮；为tio̍h in嘴干，to̍h tùi石磐出水，koh命令in去承接祢所chiùchōa beh hō͘ in ê地。
9:16 总是，in kah阮ê祖先做tāichì骄傲，硬in ê颔颈，无遵thàn祢ê诫命；
9:17 m̄肯顺服，mā bē记得祢tī in中间所行ê奇事，竟然硬in ê颔颈，tī悖逆中kakī 设立首领，beh oa̍t tńg去in做奴隶ê地。总是，祢是欢喜赦免人，有恩典、怜悯，无快快受气，有满满慈爱ê上帝，祢无kā in放sak。
9:18 In虽然铸（tù）一只牛á，koh讲：「这是bat chhōa你出埃及ê上帝」，ánne大大激祢受气；
9:19 祢iáu koh大施怜悯，无kā in放sak tī旷野。日时，云柱无离开in，chhōa in行路；暗时，火柱mā无离开in，kā in照光tī in所tio̍h行ê路。
9:20 祢mā赏赐祢美好ê圣神来教示in，祢ê吗哪犹原hō͘ in食无soah，为tio̍h in嘴干，祢赏赐hō͘ in水。
9:21 Tī旷野四十年，祢养饲in，in to̍h无欠缺半项，in ê衫无破，in ê脚无phòng-phā。
9:22 祢kā列邦kah hiahê人民hō͘ in，分派in tī ta̍k角头，in to̍h得tio̍h西宏ê地、希实本王ê地kah巴珊王噩ê地。
9:23 祢加添in ê kiáⁿ孙，亲像天星ê chē；chhōa in到hitê地，to̍h是祢kā in ê祖先讲in beh入去承接ê地。
9:24 Án-ne，in ê kiáⁿ孙入去承接hitê地，祢tī in ê面前制压tòa tī hit所在ê人民，to̍h是迦南人，kā in kah in ê君王以及hit所在ê人民，lóng交tī in ê手，hō͘ in chhut-chāi kakī 意思来款待in。
9:25 In征服坚固ê城，肥ê土地，得tio̍h充满ta̍k种好物ê厝宅，开便便ê水井，葡萄园kah橄榄园ê果子树真chē。In得tio̍h食饱，身躯肥，因为祢ê大恩，in to̍h心内快乐。
9:26 总是，in m̄顺服，竟然悖逆祢，kā祢ê律法hiat tī尻脊后，祢ê先知劝解in，beh hō͘ in归向祢，in to̍hka7先知thâi死，大大激祢受气。
9:27 所以，祢kā in交hō͘对敌ê手，受in ê苦毒。In tú tio̍h苦难ê时就哀求祢，祢to̍h tùi天àⁿ落听，照祢ê大怜悯hō͘ in有拯救ê人，救in脱离对敌ê手。
9:28 总是，in得tio̍h平安了后，koh tī祢ê面前行pháiⁿ，所以，祢放sak in tī对敌ê手，hō͘对敌kā in管辖。In oa̍t倒tńg来哀求祢ê时，祢犹原tùi天àⁿ落听，tiāⁿ-tiāⁿ 照祢ê怜悯kā in拯救。
9:29 koh劝解in，ài beh引chhōa in归向祢ê律法。总是，in做tāichì骄傲，m̄遵thàn祢ê诫命，违犯祢hiahê法度，(人照ánne行，想beh得tio̍h活ê，) oa̍t-tńg肩胛头，硬in ê颔颈m̄肯遵thàn。
9:30 总是，祢宽容in真chē年，koh用祢ê圣神托祢hiahê先知，来对in做见证，in犹原m̄遵thàn，所以，祢kā in交tī列国ê人民ê手。
9:31 总是，祢有大怜悯，无kā in全部消灭，mā无放sak in；因为祢是有恩典koh有怜悯ê上帝。
9:32 Taⁿ阮ê上帝ah，祢是至大、有权能ê、thang惊畏、守约、施慈爱ê上帝。阮ê君王、首领、祭司、先知、祖先kah祢ê子民，tùi亚述列王ê时到今á日所tú tio̍h一切ê苦难，求祢m̄ thang掠做是小khóa tāichì。
9:33 总是，阮所tú ・tio̍h ê lóng是祢ê公义，因为祢所做ê是真实，阮所行ê是pháiⁿ。
9:34 阮ê君王、首领、祭司kah祖先，lóng无遵守祢ê律法，m̄遵thàn祢ê诫命kah祢ê见证，to̍h是祢对in所见证ê话。
9:35 In tī in ê本国，tī祢赏赐hō͘ in大福气kah祢tī in面前所赏赐阔大koh肥koh súi ê地，in无服事祢，mā无oa̍t-tńg身来离开in ê pháiⁿ行为。
9:36 阮今á日做奴仆，祢所赏赐hō͘阮祖先ê地，thang食它出产ê果子kah好ê物，你看，阮tī chitê地做人ê奴仆！
9:37 Chitê地出真chē物归tī列王，to̍h是祢因为阮ê罪，祢所设立来kā阮管辖ê王，in chhut-chāi kakī 意思管辖阮ê身躯kah阮ê chengseⁿ，阮tú tio̍h大患难。
9:38 民众签约
因为这一切ê tāichì，阮立确实ê约，kā它写明。阮ê首领、利未人kah祭司lóng盖印。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。