历代志上 线上收听:中文和合本 现代中文译本修订版 现代台语 台语圣经 客语 希伯来文读经 下载档案 关于语音圣经
29:1 为tio̍h起圣殿来献ê礼物
大卫王对会众讲：「我ê kiáⁿ所罗门是上主特别拣选ê，iáu koh少年幼chíⁿ；chitê工程真大，因为chitê殿m̄是为tio̍h人，to̍h是为tio̍h上主—上帝起ê。
29:2 我为tio̍h我ê上帝ê殿，已经尽气力，准备金做金器，准备银做银器，铜做铜器，铁做铁器，柴做柴器，koh有红玛瑙，kah thang镶ê宝石、光石，彩色ê石，以及ta̍k种ê宝石kah大理石极chē。
29:3 因为我欣慕我ê上帝ê殿，to̍h tī准备起圣殿ê材料以外，koh用我本身所积聚ê金银，献tī我ê上帝ê厝，
29:4 to̍h是俄斐ê金三千他连得，锻炼ê银七千他连得，来安装 chiahê厝ê墙。
29:5 金做金器，银做银器，kah师傅ê手所做chiahê工。今á日有啥人欢喜kā本身献hō͘上主？」
29:6 就ánne，众族长kah以色列ta̍k支族ê首领、营长、连长，以及监督hiahê kā王做工ê，lóng欢喜来献。
29:7 In为tio̍h上主殿ê路用，献金五千他连得kah一万达利克，银一万他连得，铜一万八千他连得，铁十万他连得。
29:8 见若有宝石ê lóng交带革顺人耶悦ê手，送入去上主殿ê金库。
29:9 因为in甘心献，人民lóng欢喜，因为in尽心献hō͘上主，大卫王mā大欢喜到极。
29:10 大卫O-ló上主
所以，大卫tī会众ê面前oló上主，大卫讲：「上主—阮ê祖先以色列ê上帝，是应该oló ê，tùi永远到永远！
29:11 上主ah，尊大、能力、荣光、得胜kah威严lóng是祢ê；所有tī天顶地下ê lóng是祢ê。上主ah，国mā是祢ê，祢是至koân，做万有ê头。
29:12 好额kah尊贵lóng是tùi祢来，祢mā掌管万有。Tī祢ê手有大权能kah大气力，hō͘人尊大，hō͘群众大气力，lóng出tī祢ê手。
29:13 阮ê上帝ah，taⁿ阮感谢祢，oló祢荣光ê名！
29:14 「我是啥物，我ê人民是啥物，阮竟然ē ánne欢喜奉献？因为万物lóng是tùi祢来，阮用祢ê物献hō͘祢。
29:15 阮tī祢ê面前是出外人，kah阮ê祖先仝款是寄脚ê。阮tī世间ê日子亲像影，无thang ǹg望久长tī ・leh。
29:16 上主—阮ê上帝ah，阮准备chiahê真chē材料，beh为tio̍h祢ê圣名起祢ê殿，lóng是tùi祢来ê，mā lóng是祢ê。
29:17 我ê上帝ah，我知祢鉴察人ê心，欢喜正直；讲tio̍h我，我用正直ê心欢喜献这一切ê物。Taⁿ我看tio̍h祢ê子民tī chia，lóng欢喜献hō͘祢，我to̍h欢喜。
29:18 上主—阮祖先亚伯拉罕、以撒、以色列ê上帝ah，求祢hō͘祢ê子民tiāⁿ-tiāⁿ 存chit款ê心思念头，准备in ê心来归向祢，
29:19 koh求祢赏赐我ê kiáⁿ所罗门有诚实ê心，来守祢ê命令、法度kah律例，做成chiahê所有ê tāichì，用我所准备ê来起殿。」
29:20 大卫对chiahê ē众讲：「Lín tio̍h oló上主—lín ê上帝。」就ánne，会众oló上主—in祖先ê上帝，àⁿ头拜上主kah王。
29:21 隔tńg工，in献祭hō͘上主，koh献烧祭hō͘上主，to̍h是献公ê牛一千只，公ê绵羊一千只，羊á一千只kah它ê灌奠，koh为以色列ê群众献真chē祭物。Hit日，in tī上主ê面前lim食大大欢喜。
29:22 In第二pái设立大卫ê kiáⁿ所罗门做王，为上主用油kā伊抹，hō͘伊做君王，mā用油抹撒督做祭司。
29:23 就ánne，所罗门坐tī上主所赏赐ê位，续接伊ê老父大卫做王，ta̍k项tāichì lóng兴通，以色列人民mā lóng遵thàn伊。
29:24 众首领、勇士kah大卫王ê众kiáⁿ，lóng顺服所罗门王。
29:25 上主hō͘所罗门tī以色列人民ê面前，非常尊大，hō͘伊做国王ê威风，赢过以色列以前ê王。
29:26 大卫统治ê记载
耶西ê kiáⁿ大卫做以色列人民ê王，
29:27 伊做以色列王，经过四十年，to̍h是tī希伯仑做王七年，tī耶路撒冷做王三十三年。
29:28 伊食长岁寿，年岁、好额kah荣光lóng满足就过身。伊ê kiáⁿ所罗门续接伊做王。
29:29 大卫王tùi头到尾ê tāichì，lóng记tī先见撒母耳kah拿单先知ê册，以及先见迦得ê册。
29:30 Hiahê册mā记载伊治理国政ê tāichì，kah伊ê大权能，以及伊kah以色列，kah四箍围ê列国，所经过ê时事。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。